ພິທີຖະແຫຼງຂ່າວ ກະກຽມຈັດການແຂ່ງຂັນກີລາກ໊ອຟມິດຕະພາບ ເພື່ອສ້າງຂະບວນການສະຫຼອງວັນຊາດທີ 2 ທັນວາ ຄົບຮອບ 45 ປີ ຈັດຂຶ້ນວັນທີ 30 ຕຸລາ 2020 ຢູ່ຮ້ານອາຫານສາຍໃຈ ນະຄອນ ຫຼວງວຽງຈັນ ໂດຍມີທ່ານ ກອງສີ ແສງມະນີ ອະດີດຮອງລັດຖະມົນຕີກະຊວງສຶກສາທິການ ແລະ ກີລາ ປະທານສະຫະພັນກີລາກ໊ອຟແຫ່ງຊາດລາວ ມີທ່ານ ຟານແທັງຕວັນ ຜູ້ຕາງໜ້າຈາກທະນາຄານ ຊາຄອມແບັງ ຜູ້ໃຫ້ການສະໜັບສະໜູນ ພ້ອມດ້ວຍຄະນະບໍລິຫານງານ ພາກສ່ວນທີ່ກ່ຽວຂ້ອງ ແລະ ສື່ມວນຊົນເຂົ້າຮ່ວມ.
ໂອກາດນີ້ ທ່ານ ກອງສີ ແສງມະນີ ກ່າວວ່າ: ການຈັດການແຂ່ງຂັນໃນຄັ້ງນີ້ ແມ່ນເປັນການແຂ່ງຂັນແບບມິດຕະພາບ ລະຫວ່າງນັກກີລາກ໊ອຟ ແລະ ຜູ້ໃຫ້ການສະໜັບສະໜູນ ບໍ່ແມ່ນເປັນການຫາລາຍໄດ້ແຕ່ຢ່າງໃດ ເຊິ່ງມີຄວາມໝາຍຄວາມສຳຄັນຫຼາຍ ໃນການສ້າງຂະບວນການສະເຫຼີມສະຫຼອງວັນຊາດທີ 2 ທັນວາ ຄົບຮອບ 45 ປີ ສະນັ້ນ ຖືໂອກາດນີ້ ຂໍຝາກເຖິງບັນດານັກກີລາກ໊ອຟທັງຊາວລາວ ແລະ ຊາວຕ່າງຊາດທີ່ມາດຳເນີນທຸລະກິດຢູ່ ສປປ ລາວ ໃນຂອບເຂດທົ່ວປະເທດ ເຂົ້າຮ່ວມເຮັດໃຫ້ການແຂ່ງຂັນໃນຄັ້ງນີ້ດຳເນີນໄປດ້ວຍບັນຍາກາດທີ່ມີສີສັນຟົດຟື້ນ ເລີ່ມເປີດຮັບສະໝັກແຕ່ມື້ນີ້ເປັນຕົ້ນໄປ ແລະ ປິດຮັບສະໝັກໃນວັນທີ 18 ພະຈິກ 2020 ສ່ວນວັນແຂ່ງຂັນຈະໄດ້ຈັດຂຶ້ນວັນທີ 21 ພະຈິກ 2020 ຢູ່ສະໜາມກ໊ອຟ ລ໋ອງແທ໋ງ ລ໋ອງວຽນ ນະຄອນຫຼວງວຽງຈັນ ສຳລັບນັກກີລາ ລົງທະບຽນເຂົ້າຮ່ວມແຂ່ງຂັນ 850.000 ກີບຕໍ່ໜຶ່ງຄົນ ສ່ວນລາງວັນແມ່ນມີເຖິງ 11 ຂັນລາງວັນ.
# ຂ່າວ & ພາບ: ສີພອນ