ບຸນນະມັດສະການພະທາດຫຼວງວຽງຈັນປີນີ້ ຈັດຕາມປະເພນີພຽງ 3 ວັນ

ບຸນນະມັດສະການພະທາດຫຼວງວຽງຈັນ ປະຈຳປີ 2020 ຈະໄດ້ຈັດເປັນເວລາ 3 ວັນຄື: ວັນທີ 29 ຕຸລາ ກົງກັບມື້ຂຶ້ນ 13 ຄ່ຳ ເດືອນ 12 ລາວ ພສ 2563 ເວລາ 8:00 ໂມງເປັນຕົ້ນໄປ ຈະມີການຫ້າງຫາກະກຽມຕົບແຕ່ງ ປະດັບປະດາສະຖານທີ່ທາງດ້ານນອກ ແລະ ດ້ານໃນກົມມະລຽນພະທາດຫຼວງ ເວລາ 16:00 ໂມງ ຈະມີພິທີສູດປະລິມຸງຄຸນ ເປີດປະຕູພະທາດ ເວລາ 20:00 ໂມງ ພິທີວຽນທຽນ ແຫ່ຜາສາດເຜິ້ງ ມວນຊົນຊາວບ້ານ ແລະ ຄົບງັນຕາມປະເພນີ ວັນທີ 30 ຕຸລາ ກົງກັບມື້ຂຶ້ນ 14 ຄ່ຳ ເດືອນ 12 ລາວ ເວລາ 13:00 ໂມງ ເຕົ້າໂຮມຜາສາດເຜິ້ງຈາກ 4 ຕົວເມືອງ ຢູ່ວັດໜອງບອນ ເວລາ 13:30-18:00 ໂມງ ເຄື່ອນຂະບວນແຫ່ຜາສາດເຜິ້ງສູ່ກົມມະລຽນພະທາດຫຼວງ ໃນນັ້ນຈະມີຂະບວນແຫ່ທັ່ງບັ້ງ ດົນຕີພື້ນເມືອງ ເມື່ອຮອດພະທາດຫຼວງແລ້ວແຫ່ອ້ອມພະທາດ 3 ຮອບ ຖວາຍຜາສາດເຜິ້ງ ຟັງທຳມະເທສະນາ 1 ກັນ ແລະ ຄົບງັນຕາມຮີດຄອງປະເພນີ ວັນທີ 31 ຕຸລາ ກົງກັບມື້ຂຶ້ນ 15 ຄ່ຳ ເດືອນ 12 ລາວ ເວລາ 7:00-8:30 ໂມງ ພິທີໄຫວ້ພະຮັບສິນ ຟັງທຳມະເທສະໜາ ຖວາຍສັງກະທານ ຄາລະວະໃຫ້ພອນຢາດນ້ຳ ພິທີຕັກບາດ ແລະ ບິນທະບາດຂອງພະສົງສາມະເນນ ເວລາ 12:00 ໂມງ ເຕົ້າໂຮມນັກກີລາຕີຄີຢູ່ວັດທາດຫຼວງໃຕ້ ເວລາ 12:30 ໂມງ ພິທີອັງເຊີນລູກຄີຢູ່ຫໍເຈົ້າໄຊເສດຖາເຂົ້າສູ່ພະທາດຫຼວງ ຫຼັງຈາກສຳເລັດພິທີແລ້ວ ແຫ່ຂະບວນລູກຄີສູ່ສະໜາມຫຼວງ ແລະ ເປີດການແຂ່ງຂັນຕີຄີ ເວລາ 19:00 ໂມງ ພິທີວຽນທຽນຢູ່ກົມມະລຽນພະທາດຫຼວງ ແລະ ຈູດບັ້ງໄຟບູຊາອົງພະທາດ (ມີການຈັດສັນຈຳນວນຜູ້ເຂົ້າຮ່ວມໃຫ້ມີຄວາມເໝາະສົມ) ນອກຈາກປະເພນີຢູ່ພະທາດຫຼວງແລ້ວ ຍັງມີປະເພນີກ່ຽວພັນກັບງານບຸນພະທາດຫຼວງຢູ່ສະຖານທີ່ວັດອື່ນໆອີກ.

ສຳລັບກິດຈະກຳການຄົບງັນ ເນື່ອງຈາກປີນີ້ຢູ່ໃນສະພາບການເຝົ້າລະວັງການແຜ່ລະບາດຂອງພະຍາດໂຄວິດ-19 ຈະບໍ່ມີການຈັດຕະຫຼາດນັດວາງສະແດງ ແລະ ຈຳໜ່າຍສິນຄ້າ ອະນຸຍາດໃຫ້ມີແຕ່ການບໍລິການຈຳນວນໜຶ່ງທີ່ມີຄວາມຈຳເປັນ ແລະ ຕິດພັນກັບກິດຈະກຳທາງດ້ານປະເພນີ ເປັນຕົ້ນ ການບໍລິການເຄື່ອງທີ່ລະນຶກ ເຄື່ອງບູຊາ ດອກໄມ້ທູບທຽນ ບໍລິການຫ້ອງນ້ຳສະອາດ ບໍລິການຝາກລົດຈັກ-ລົດໃຫຍ່ ແລະ ອາຫານການກິນຕາມຈຸດທີ່ມີການບໍລິການເປັນປົກກະຕິຢູ່ແລ້ວ ສ່ວນວຽກງານປ້ອງກັນຊາດ-ປ້ອງກັນຄວາມສະຫງົບ ຈະໄດ້ເອົາໃຈໃສ່ຈັດວາງກຳລັງເພື່ອເຮັດໜ້າທີ່ກວດກາ ປ້ອງກັນເວນຍາມຕະຫຼອດໄລຍະການຈັດງານບຸນໃຫ້ມີຄວາມສະຫງົບ ເປັນລະບຽບຮຽບຮ້ອຍ ພິເສດຈະໄດ້ປະສານງານກັບຄະນະສະເພາະກິດ ປ້ອງກັນ ຄວບຄຸມ ແລະ ແກ້ໄຂການແຜ່ລະບາດຂອງເຊື້ອພະຍາດໂຄວິດ-19 ເພື່ອຈະມີມາດຕະການປ້ອງກັນຢ່າງເຂັ້ມງວດ ໃນນີ້ ມວນຊົນທີ່ຈະມາກາບໄຫວ້ບູຊາພະທາດຫຼວງ ແມ່ນໃຫ້ໃສ່ຜ້າອັດປາກ-ອັດດັງ ມີເຈວລ້າງມືເປັນຂອງຕົນເອງ ສຳຄັນອີກຕ້ອງຮ່ວມມືກັນຮັກສາໄລຍະຫ່າງບໍ່ໃຫ້ແອອັດ ຜູ້ທີ່ມີອາການປວດຄີງໄຂ້ ແມ່ນໃຫ້ຮັກສາຕົນເອງຢູ່ເຮືອນ ແລະ ອື່ນໆ.