ບໍລິສັດ ພຣູເດັນໂຊລ໌ ປະກັນໄພຊີວິດລາວ ຈຳກັດ ນຳສະເໜີແອັບພລີເຄເຊິນ ເພົ້າສ໌ “Pulse” ເຊິ່ງເປັນແອັບພລີເຄເຊິນໃນລາວ ທີ່ຊ່ວຍຜູ້ໃຊ້ຈັດການດ້ານສຸຂະພາບໂດຍບໍ່ມີການເສຍຄ່າໃຊ້ຈ່າຍໃດໆ Pulse ນຳໃຊ້ລະບົບປັນຍາປະດິດ (AI) ເປັນເຄື່ອງມືໃນການໃຫ້ຂໍ້ມູນຢ່າງຖືກຕ້ອງ ຊັດເຈນ ແກ່ຜູ້ໃຊ້ຕະຫຼອດເວລາ ໂດຍຜູ້ໃຊ້ສາມາດເຂົ້າເຖິງຂໍ້ມູນດ້ານສຸຂະພາບ ແລະ ສາມາດຊອກຫາຂໍ້ມູນໂຮງໝໍ ແລະ ຄລີນິກ ທີ່ໃກ້ຄຽງໃນຍາມສຸກເສີນ.
ພິທີນຳສະເໜີແອັບພລີເຄເຊິນດັ່ງກ່າວ ຈັດຂຶ້ນວັນທີ 19 ຕຸລາ 2020 ຢູ່ໂຮງແຮມຄຣາວພລາຊາ ໂດຍມີທ່ານ Veejay Madhavan ຜູ້ອຳນວຍການໃຫຍ່ຂອງພຣູເດັນໂຊລ໌ ລາວ ທ່ານ ເນົາ ບຸດຕາ ຫົວໜ້າຫ້ອງການກະຊວງສາທາລະນະສຸກ ພ້ອມດ້ວຍຜູ້ຕາງໜ້າບັນດາກະຊວງ ຄູ່ຮ່ວມທຸລະກິດ ແລະ ແຂກຖືກເຊີນ ເຂົ້າຮ່ວມ.
Pulse ໄດ້ນຳສະເໜີຄັ້ງທຳອິດເດືອນສິງຫາ 2019 ຢູ່ປະເທດມາເລເຊຍ ແລະ ນຳໃຊ້ແລ້ວຢູ່ 11 ປະເທດ ທົ່ວອາຊີ ທີ່ຢູ່ໃນເຄືອ Prudential Corporate Asia ນັບແຕ່ໄດ້ນຳສະເໜີເຖິງປັດຈຸບັນ Pulse ຖືກດາວໂຫຼດຫຼາຍກວ່າ 9 ລ້ານຄັ້ງ ສາມາດດາວໂຫຼດໄດ້ໃນ Apple/Google Play Stores ໃນກຳປູເຈຍ ຮົງກົງ ອິນໂດເນເຊຍ ລາວ ມາເລເຊຍ ມຽນມາ ຟິລິບປີນສິງກະໂປ ໄຕ້ຫວັນ ໄທ ແລະ ຫວຽດນາມ ຂໍ້ມູນເພີ່ມເຕີມເຂົ້າເບິ່ງທີ່ເວັບໄຊ www.wedopulse.com.
# ພາບ & ຂ່າວ: ສະບາໄພ