ກອງປະຊຸມສຸກເສີນ ຂອງຄະນະກຳມະການຄຸ້ມຄອງໄພພິບັດຂັ້ນສູນກາງ ເພື່ອຕອບໂຕ້ໄພພິບັດນ້ຳຖ້ວມ ທີ່ກຳລັງເກີດຂຶ້ນຢູ່ບັນດາແຂວງພາກກາງ ແລະ ພາກໃຕ້ຂອງ ສປປ ລາວ ຈັດຂຶ້ນວັນທີ 20 ຕຸລາ 2020 ຢູ່ກະຊວງແຜນການ ແລະ ການລົງທຶນ ໂດຍການເປັນປະທານຂອງທ່ານ ສອນໄຊ ສີພັນດອນ ຮອງນາຍົກ ລັດຖະມົນຕີ ລັດຖະມົນຕີກະຊວງແຜນການ ແລະ ການລົງທຶນ ທັງເປັນປະທານຄະນະກຳມະການຄຸ້ມຄອງໄພພິບັດຂັ້ນສູນກາງ ມີບັນດາທ່ານຮອງລັດຖະມົນຕີ ຮອງປະທານ ແລະ ຄະນະກຳມະການຄຸ້ມຄອງໄພພິບັດຂັ້ນສູນກາງ ບັນດາທ່ານຜູ້ປະສານງານຈາກບັນດາກະຊວງ ແຂວງສະຫວັນນະເຂດ ແລະ ແຂວງອັດຕະປື ເຂົ້າຮ່ວມ.
ທ່ານ ສອນໄຊ ສີພັນດອນ ກ່າວວ່າ: ປັດຈຸບັນ ບັນຫາໄພພິບັດທີ່ສາເຫດເກີດມາຈາກການປ່ຽນແປງຂອງດິນຟ້າອາກາດ ເປັນຕົ້ນ ໄພນ້ຳຖ້ວມ ແຜ່ນດິນໄຫວ ຄື່ນສຶນາມິ ລົມພະຍຸພັດ ພະຍາດລະບາດ ແລະ ອື່ນໆ ໄດ້ກາຍເປັນສິ່ງທ້າທາຍຢ່າງໃຫຍ່ຫຼວງຕໍ່ພາກພື້ນ ແລະ ສາກົນ ເພາະບັນຫາໄພພິບັດດັ່ງກ່າວ ໄດ້ເກີດຂຶ້ນເປັນປະຈຳ ແລະ ເພີ່ມຄວາມຮຸນແຮງຂຶ້ນເລື້ອຍໆ ເຊິ່ງສ້າງຜົນກະທົບ ແລະ ຄວາມເສຍຫາຍຢ່າງຫຼວງຫຼາຍຕໍ່ສຸຂະພາບ ຊີວິດ ຊັບສິນຂອງລັດ ລວມໝູ່ ປະຊາຊົນ ເສດຖະກິດ ແລະ ການດຳລົງຊີວິດຂອງຄົນໃນສັງຄົມ ທັງໃນໄລຍະສັ້ນ ແລະ ໄລຍະຍາວ ເຊັ່ນ: ເຫດການໄພພິບັດນ້ຳຖ້ວມໃນປີ 2018 ແລະ ປີ 2019 ຜ່ານມາ ປັດຈຸບັນ ລັດຖະບານ ສປປ ລາວ ຍັງສືບຕໍ່ສຸມໃສ່ການຊ່ວຍເຫຼືອຟື້ນຟູຄືນຫຼັງໄພພິບັດ ໂດຍສະເພາະແມ່ນສະພາບການແກ້ໄຂຟື້ນຟູຢູ່ເມືອງສະໜາມໄຊ ແຂວງອັດຕະປື.
ແນວໃດກໍຕາມ ໄລຍະທ້າຍປີ 2019 ຫາຕົ້ນປີ 2020 ກໍຄືປັດຈຸບັນ ສປປ ລາວ ຂອງພວກເຮົາ ນອກຈາກໄດ້ຮັບຜົນກະທົບຢ່າງໜັກໜ່ວງຈາກບັນຫາການລະບາດຂອງພະຍາດ ໂຄວິດ-19 ແລ້ວ ຍັງໄດ້ຮັບຜົນກະທົບຈາກໄພພິບັດທາງທຳມະຊາດ ເປັນຕົ້ນ ໄພນ້ຳຖ້ວມ ແຫ້ງແລ້ງ ດິນເຈື່ອນ ລົມພະຍຸ ແຜ່ນດິນໄຫວ ການລະບາດຂອງພະຍາດອະຫິວາໝູອາຟຣິກາ ບັນຫາສັດຕູພືດທຳລາຍພື້ນທີ່ການຜະລິດຂອງປະຊາຊົນ ການລະບາດຂອງໄຂ້ຍຸງລາຍ ແລະ ອື່ນໆ ເຊິ່ງທັງໝົດເຫຼົ່ານີ້ ໄດ້ສົ່ງຜົນກະທົບໂດຍກົງຕໍ່ສຸຂະພາບ ຊີວິດ ແລະ ຊັບສິນຂອງປະຊາຊົນ ສ້າງຄວາມເສຍຫາຍຕໍ່ພື້ນຖານໂຄງລ່າງເສດຖະກິດຂອງປະເທດ ເປັນຕົ້ນ ເຫດການໄພນ້ຳຖ້ວມທີ່ກຳລັງເກີດຂຶ້ນ ຢູ່ 8 ເມືອງ ຂອງແຂວງສະຫວັນນະເຂດ ຄື: ເມືອງພີນ ເຊໂປນ ນອງ ທ່າປາງທອງ ສອງຄອນ ຈຳພອນ ຊົນບູລີ ແລະ ເມືອງວິລະບູລີ ສົ່ງຜົນກະທົບໂດຍກົງຕໍ່ປະຊາຊົນຢູ່ 125 ບ້ານ 5.130 ກວ່າຄອບຄົວ 29.000 ກວ່າຄົນ ມີການຍົກຍ້າຍປະຊາຊົນຈຳນວນ 41 ບ້ານ ສ້າງຄວາມເສຍຫາຍຕໍ່ເນື້ອທີ່ການຜະລິດຂອງປະຊາຊົນ ສັດລ້ຽງ ຊົນລະປະທານ ເສັ້ນທາງ ຂົວ ໂຮງຮຽນ ສຸກສາລາ ແຫຼ່ງນ້ຳກິນ-ນ້ຳໃຊ້ ແລະ ອື່ນໆ ແມ່ນໄດ້ຮັບຄວາມເສຍຫາຍຢ່າງໜັກ ມາຮອດປັດຈຸບັນ ລະດັບນ້ຳຍັງໄດ້ມີການເພີ່ມລະດັບ ແລະ ອາດເຮັດໃຫ້ເກີດມີນ້ຳຖ້ວມອີກຄັ້ງ ເຊັ່ນ: ເມືອງເຊໂປນ ເມືອງນອງ ແລະ ເມືອງວິລະບູລີ.
# ພາບ & ຂ່າວ: ສີພອນ