ລະດູການຮັບໃບປະກາດມາເຖິງ ການສະຫຼອງຊື່ນຊົມກໍເປັນທຳມະດາ ເພາະການຮຽນສຶກສາປະລິນຍາ 4-5 ປີ ແຕ່ບໍ່ຄວນໃຫ້ພໍ່ແມ່ຜິດຫວັງ ເພາະບາງຄົນໃຊ້ຈ່າຍໃສ່ການຮຽນໝົດຊັບສິນຫຼວງຫຼາຍ ບາງກໍລະນີພໍ່ແມ່ຂາຍດິນດອນຕອນຫຍ້າເພື່ອສົ່ງເສີມລູກຮຽນ ຢາກໃຫ້ລູກມີຄວາມຮູ້ເພື່ອຈະມີອາຊີບລ້ຽງຊີວິດ ແຕ່ກົງກັນຂ້າມ ມີນັກຮຽນ ນັກສຶກສາເຂົ້າຮ້ານກິນດື່ມ ບັນເທີງ ແທນທີ່ຈະເຂົ້າຮ້ານປຶ້ມ ແລະ ຫ້ອງສະໝຸດ ນີ້ກໍເປັນສິ່ງທີ່ໜ້າຄິດ.
ກໍລະນີເວົ້າແຕ່ປາກ ແຕ່ພາກປະຕິບັດຕົວຈິງ ຍັງບໍ່ເກີດຜົນ ນັ້ນກໍຄວນບຸກບືນ ຢ່າເຫີ່ການລາຍ ງານແບບທິດສະດີດອກໄມ້ບານ ຍາມໃດກໍມ່ວນໃນຫູ ນັກສຶກສາຄວນລາຍງານຕົວຈິງ ຕ້ອງເປີດເອິກ ມັນຈຶ່ງຈະກ້າວໜ້າໄດ້ ບາງທີເຮັດຜິດຜັດແກ້ໂຕໜ້າຕາເສີຍ ເຮັດໃຫ້ຂາດຄວາມເຊື່ອ ຖື ສຳລັບຄູ-ອາຈານ ຢ່າລືມວ່າເວລາເຮົາສອນ ເຂົາໃຫ້ເຮັດດີ ແຕ່ຜູ້ສອນຜັດບໍ່ປະພຶດເປັນແບບ ຢ່າງ ຍ່ອມຕົກໃນລັກສະນະມືຖືສາກ ປາກຖືສິນ ນັກຮຽນ-ນັກສຶກສາທີ່ຢາກໄດ້ໃບປະກາດບໍ່ຄວນເຫີ່ຫຼົງກະແສ ຫຼົງພູມໃຈພຽງແຕ່ໃບປະລິນຍາຕິດຝາເຮືອນໂຊ ແຕ່ຄວນມີສະຕິຕັ້ງໂຕໃຫ້ດີ ເວລາຮຽນຕ້ອງໄດ້ຕັ້ງໃຈສຶກສາເອົາຄວາມຮູ້ໃຫ້ສົມກັບວຸດທິການສຶກສາ.
ຜູ້ຂຽນເຫັນວ່າ ຄູຍາມໃດກໍຍັງເປັນຜູ້ມີບົດບາດສຳຄັນໃນການແນະນຳບົດຮຽນຊີວິດ ແລະ ຂະບວນການສຶກສາຄົ້ນຄວ້າແກ່ນັກຮຽນ ເພື່ອ ວ່ານັກຮຽນ-ນັກສຶກສາເຂົາຈະສາມາດຕໍ່ເຕີມຄວາມຮູ້ ທັງຄົ້ນຄວ້າວິໄຈທາງວິຊາການສູງຂຶ້ນ ບໍ່ແມ່ນວ່າຄູສອນນັກຮຽນໃຫ້ເຂົ້າຫ້ອງສະໝຸດ ແຕ່ໂຕເອງຜັດບໍ່ຄ່ອຍເຂົ້າເລີຍແບບນີ້ຄືຊິບໍ່ໄຫວ! ຄູແນະນຳໃຫ້ນັກຮຽນອ່ານຄົ້ນຄວ້າ ແຕ່ຄູບໍ່ນຳ ພາຄົ້ນຄວ້າເປັນແບບຢ່າງ ຫຼື ວ່າພໍເຖິງເວລາຂຶ້ນສອນຢິບເອົາປຶ້ມຂຶ້ນຫ້ອງສອນ ໂດຍບໍ່ໃສ່ໃຈພັດທະນາຄວາມຮູ້ໂຕເອງ.
ນັກຮຽນຜູ້ທີ່ຈະຈົບຮັບໃບປະກາດໃນຊຸມປີ ຂ້າງໜ້າຄວນຕັ້ງສະຕິໃຫ້ດີ ຕັ້ງເປົ້າໝາຍໃນການສຶກສາຄົ້ນຄວ້າໃຫ້ມີຄວາມຮູ້ແທ້ ຄູເອງກໍຄວນເອົາໃຈໃສ່ແທ້ໃນອາຊີບຂອງຕົນ ປະສານກົມກຽວສົ່ງເສີມກັນແທ້ ຈຶ່ງຈະກ້າວໜ້າໄດ້ !.
ສະເໜີແລກປ່ຽນ.
ໂດຍ: ດັ້ນກີບເມກ