ເພື່ອແນໃສ່ຍົກລະດັບໃຫ້ນັກສຳມະນາກອນ ເຂົ້າໃຈເພີ່ມເຕີມກ່ຽວກັບຈຸດປະສົງ ແລະ ເປົ້າໝາຍເສລີ ພາຍໃຕ້ປະຊາຄົມເສດຖະກິດອາຊຽນ ເພື່ອເຮັດໃຫ້ປະເທດມີການແຂ່ງຂັນ ແລະ ເຊື່ອມໂຍງກັບລະບົບການຄ້າສາກົນດີຂຶ້ນ ກະຊວງການຕ່າງປະເທດສິງກະໂປ ຈຶ່ງສືບຕໍ່ໃຫ້ທຶນເຝິກອົບຮົມ ຫົວຂໍ້ “ຍົກລະດັບການແຂ່ງຂັນດ້ານການຄ້າ ເພື່ອການເຊື່ອມໂຍງພາກພື້ນ” ໃຫ້ພະນັກງານລັດຖະກອນລາວ 12 ທ່ານ ໂດຍຜ່ານວິດີໂອທາງໄກ ຂຶ້ນວັນທີ 13-16 ຕຸລາ 2020 ຢູ່ສູນຮ່ວມມືລາວ-ສິງກະໂປ ໂດຍມີທ່ານ ມາກາເຣດ ລຽງ ວິທະຍາກອນຈາກກະຊວງການຕ່າງປະເທດສິງກະໂປ ເປັນຜູ້ຖ່າຍທອດຄວາມຮູ້ໃຫ້.
ທ່ານນາງ ຄຳພັດ ພູນສຸກ ສຳມະນາກອນຈາກກະຊວງອຸດສາຫະກຳ ແລະ ການຄ້າ ໄດ້ສະແດງຄວາມຂອບໃຈລັດຖະບານສິງກະໂປ ທີ່ໄດ້ຈັດຊຸດເຝິກອົບຮົມດັ່ງກ່າວ ເຊິ່ງໄດ້ຊ່ວຍຍົກລະດັບທັກສະຂອງພະນັກງານ-ລັດຖະກອນລາວ ແລະ ເປັນຊຸດເຝິກອົບຮົມທີ່ມີປະໂຫຍດຫຼາຍ ເພາະມັນໄດ້ພັດທະນາວິຊາສະເພາະວຽກງານ ແລະ ໄດ້ຄວາມຮູ້ໃນຫຼາຍຂົງເຂດ ເຊັ່ນ: ຫຼັກການສຳຄັນຂອງຂໍ້ຕົກລົງອາຊຽນ ກໍຄືຂໍ້ຕົກລົງການຄ້າອາຊຽນ ຂໍ້ຕົກລົງທາງສິນຄ້າ ການເຊື່ອມໂຍງອາຊຽນ ວ່າດ້ວຍຂໍ້ຕົກລົງການບໍລິການ ແລະ ຂໍ້ຕົກລົງການລົງທືນຮອບດ້ານອາຊຽນ ການກຳນົດລະບຽບຂອງບ່ອນກຳເນີດສິນຄ້າ ແລະ ການບໍລິການ ແນວຄິດການຮ່ວມມືຮອບດ້ານໃນພາກພື້ນ ແລະ ຂໍ້ຕົກລົງການຄ້າເສລີລະດັບໃຫຍ່ໃນພາກພື້ນອາຊີ-ປາຊີ ຟິກ ແລະ ອື່ນໆ.
# ຂ່າວ & ພາບ: ສະບາໄພ