ຄະນະນັກວິໄຈກຳລັງສຶກສາປະສິດທິຜົນ ຂອງອຸປະກອນແບບສວມໃສ່ເພື່ອໃຊ້ລະບຸອາການເລີ່ມຕົ້ນຂອງພະຍາດຕ່າງໆ ລວມເຖິງ COVID-19.
ຂະນະນີ້ ຫຼາຍໆຄົນໃຊ້ອຸປະກອນສວມໃສ່ ຢ່າງເຊັ່ນ Fitbit ຫຼືໂມງ Apple Watch ເພື່ອວັດອັດຕາການເຕັ້ນຂອງຫົວໃຈ ແລະ ການອອກກຳລັງກາຍອື່ນໆຢູ່ແລ້ວ ແຕ່ໃນຕອນນີ້ ນັກວິໄຈກຳລັງສຶກສາວ່າເຕັກໂນໂລຊີຊະນິດນີ້ ຈະສາມາດໃຊ້ບອກສັນຍານເລີ່ມຕົ້ນຂອງ ໂຄວິດ-19 ໄດ້ຫຼືບໍ່ ທັງນີ້ ມີການທົດສອບ ອຸປະກອນດັ່ງກ່າວທີ່ມະຫາວິທະຍາໄລ West Virginia University ຂອງສະຫະລັດ ນັກວິໄຈທີ່ມະຫາວິທະຍາໄລ ລາຍງານເມື່ອເດືອນພຶດສະພາວ່າ ອຸປະກອນນີ້ສາມາດລະບຸອາການ ຂອງ COVID -19 ໃນໄລຍະເລີ່ມຕົ້ນໄດ້ລ່ວງໜ້າເຖິງສາມວັນກ່ອນທີ່ຜູ້ປ່ວຍຈະຮູ້ຕົວ.
ນັກວິໄຈເຮັດການທົດສອບອຸປະກອນທີ່ມີຊື່ເອີ້ນວ່າ Oura Ring ເຊິ່ງມີລັກສະນະເປັນ ແຫວນທີ່ໃຊ້ສວມໃສ່ຢູ່ເທິງນິ້ວມື ແລະ ມີໃຊ້ ມານານປະມານສອງປີແລ້ວ ແຫວນນີ້ຖືກ ອອກແບບມາເພື່ອໃຊ້ກວດວັດສະມັດຖະພາບຂອງຮ່າງກາຍຂະນະອອກກຳລັງກາຍ ຕະຫຼອດຈົນຄຸນນະພາບຂອງການນອນ ແລະ ສຸຂະພາບຂອງຫົວໃຈ ໂດຍແຫວນດັ່ງກ່າວຈະສົ່ງຂໍ້ມູນທີ່ຮວບຮວມໄດ້ໄປຍັງແອັບ ເຊິ່ງ ຈະປະເມີນການເຮັດກິດຈະກຳຕ່າງໆຂອງຜູ້ໃຊ້ ແອັບດັ່ງກ່າວ ໃຊ້ລະບົບປັນຍາປະດິດ ຫຼື AI ໃນການທຳນາຍອາການເລີ່ມຕົ້ນຂອງ COVID -19 ເຊັ່ນອຸນຫະພູມຮ່າງກາຍທີ່ສູງ ແລະ ການມີບັນຫາໃນການຫາຍໃຈ.
ນັກວິໄຈກ່າວວ່າ ການທົດສອບໃນໄລຍະ ຕົ້ນ ສະແດງໃຫ້ເຫັນວ່າລະບົບນີ້ສາມາດຄາດການອາການເລີ່ມຕົ້ນທີ່ກ່ຽວຂ້ອງກັບ COVID -19 ໄດ້ເຖິງສາມວັນລ່ວງໜ້າ ແລະ ມີອັດຕາຄວາມສຳເລັດຫຼາຍກວ່າ 90%.
ທ່ານ Ali Rezai ຫົວໜ້າສະຖາບັນ Rockefeller Neuroscience Institute ເຊື່ອວ່າ ລະບົບນີ້ຈະສາມາດຊ່ວຍປົກປ້ອງເຈົ້າໜ້າທີ່ດ້ານສຸຂະພາບ ແລະ ຜູ້ປະຕິບັດງານສຸກເສິນ ໃນການຮັບມືກັບ COVID -19 ແລະ ພະຍາດທີ່ແຜ່ລະບາດຢ່າງວ່ອງໄວຊະນິດອື່ນໆ ໄດ້
ເມື່ອໄວໆນີ້ ສະມາຄົມບານບ້ວງ NBA ຕັດສິນໃຈສັ່ງຊື້ແຫວນ Oura Ring ໃຫ້ກັບຜູ້ຫຼິ້ນເພື່ອຈະໄດ້ກວດພົບອາການຂອງ COVID -19 ໂດຍໄວທີ່ສຸດເທົ່າທີ່ຈະເປັນໄປໄດ້.
ໂຄງການວິໄຈອີກອັນໜຶ່ງ ມີຂຶ້ນທີ່ສະຖາບັນ ວິໄຈ Scripps ໃນເມືອງຊານດິເອໂກ ລັດກາ ລິຟໍເນຍ ການສຶກສາທີ່ໃຊ້ຊື່ວ່າ DETECT ກວດສອບຂໍ້ມູນຈາກອຸປະກອນທີ່ສວມໃສ່ ໂດຍອາສາສະໝັກກວ່າ 30.000 ຄົນ ເພື່ອທີ່ຈະເບິ່ງວ່າອຸປະກອນສວມໃສ່ດັ່ງກ່າວ ສາ ມາດທຳນາຍອາການເລີ່ມຕົ້ນຂອງ COVID -19 ໃນກຸ່ມຄົນທີ່ຍັງບໍ່ສະແດງອາການໄດ້ ຫຼື ບໍ່.
ນັກວິໄຈຈາກສະຖາບັນ Scripps ໄດ້ສະ ແດງເຖິງປະໂຫຍດຂອງເຕັກໂນໂລຊີປະເພດ ສວມໃສ່ນີ້ເພື່ອທຳນາຍອາການຂອງຜູ້ຕິດເຊື້ອໄວຣັສ ການຄົ້ນພົບດັ່ງກ່າວ ລົງພິມຢູ່ໃນວາລະສານ The Lancet ຂອງອັງກິດເມື່ອຕົ້ນ ປີທີ່ຜ່ານມາ.
ຂໍ້ໄດ້ປຽບສຳຄັນຂອງການໃຊ້ອຸປະກອນ ແບບສວມໃສ່ເພື່ອຊ່ວຍສອດສ່ອງອາການ ລ່ວງໜ້າ ກໍຄື ອຸປະກອນທີ່ວ່ານີ້ຈະວັດອັດ ຕາການເຕັ້ນຂອງຫົວໃຈເວລານອນ ເພາະ ການເຕັ້ນຂອງຫົວໃຈມັກບໍ່ປ່ຽນແປງກ່ອນ ການຕິດເຊື້ອໄວຣັສ ແຕ່ນັກວິໄຈໄດ້ພົບວ່າ ອັດຕາການເຕັ້ນຂອງຫົວໃຈຂອງຜູ້ໃຊ້ບາງ ຄົນເລີ່ມປ່ຽນໄປສີ່ວັນກ່ອນທີ່ຈະມີອາການໄຂ້
ດັ່ງນັ້ນ ການເຕັ້ນຂອງຫົວໃຈຈຶ່ງເປັນເຄື່ອງ ບົ່ງຊີ້ອາການລ່ວງໜ້າທີ່ມີປະໂຫຍດ ລວມທັງ ສາມາດວັດໄດ້ງ່າຍ ແລະ ແມ່ນຢຳດ້ວຍການໃຊ້ອຸປະກອນແບບສວມໃສ່ໂດຍທົ່ວໄປດ້ວຍ.
ທ່ານ Jennifer Radin ຫົວໜ້ານັກວິໄຈທີ່ສະຖາບັນ Scripps ກ່າວກັບສຳນັກຂ່າວຕ່າງ ປະເທດວ່າ ຜົນຂອງການສຶກສາທັງສອງຢ່າງ ຊີ້ໃຫ້ເຫັນວ່າອຸປະກອນທີ່ວ່ານີ້ ມີສັກກະຍະພາບໃນການລະບຸຜູ້ທີ່ຕິດເຊື້ອ ແຕ່ຍັງບໍ່ມີອາ ການສະແດງອອກມາ ທ່ານ Jennifer Radin ກ່າວດ້ວຍວ່າ ເນື່ອງຈາກ 40% ຂອງຜູ້ປ່ວຍ COVID -19 ບໍ່ມີໄຂ້ ດັ່ງນັ້ນ ອຸປະກອນນີ້ຈະ ເປັນສິ່ງທີ່ສາມາດໃຊ້ໃນການຄັດແຍກຜູ້ຕິດ ເຊື້ອໄດ້ດີກວ່າການວັດອຸນຫະພູມ.
ນັກວິໄຈຈາກສະຖາບັນ Scripps ຫວັງ ວ່າຈະສາມາດພິສູດໄດ້ວ່າ ຂໍ້ມູນຈາກອຸປະກອນສວມໃສ່ມີຄວາມໜ້າເຊື່ອຖື ແລະ ສາມາດນຳມາໃຊ້ຢ່າງໄດ້ຜົນຫຼາຍກວ່າການວັດອຸນຫະພູມ.
ສ່ວນທ່ານ ດຣ. Eric Topol ຜູ້ອຳນວຍການສະຖາບັນ Scripps ບອກກັບແຫຼງຂ່າວ ວ່າ ແນວຄິດໃນເລື່ອງການໃຊ້ອຸປະກອນ ສວມໃສ່ນັ້ນ ເປັນເລື່ອງທີ່ໜ້າຈະໃຫ້ຄວາມ ຫວັງ ເພາະຊາວອາເມຣິກາຫຼາຍກວ່າ 100 ລ້ານຄົນກໍໃຊ້ໂມງສະມາດວອດ ຫຼື ອຸປະກອນ ກວດວັດສະມັດຖະພາບຮ່າງກາຍອື່ນໆກັນຢູ່ແລ້ວ.
ຢ່າງໃດກໍຕາມ ເຖິງແມ່ນວ່າອຸປະກອນດັ່ງ ກ່າວຈະສາມາດໃຫ້ຂໍ້ມູນທີ່ສຳຄັນແກ່ນັກວິ ໄຈໄດ້ ແຕ່ທ່ານ ດຣ. Topol ກ່າວວ່າ ການທີ່ຈະໄດ້ຮັບຂໍ້ສະຫຼຸບທີ່ດີນັ້ນ ຈະຕ້ອງອາໄສຄົນຈຳນວນຫຼາຍທີ່ເຂົ້າຮ່ວມໃນການສຶກສາ.