ຍຸດທະສາດເພື່ອເຈາະຕະຫຼາດໂລກໃຫ້ແກ່ການສົ່ງອອກສິນຄ້າໃນຍຸກນີ້ນັ້ນ ຕ້ອງເອົາໃຈໃສ່ບາງບັນຫາສຳຄັນຕົ້ນຕໍ ນັ້ນກໍຄື ເລື່ອງຊັບສິນທາງ ປັນຍາ ດັ່ງບົດຮຽນຂອງຫວຽດນາມ ແລະ ສປ ຈີນ.
ທີ່ ຫວຽດນາມ: ໃນທ້າຍເດືອນກໍລະກົດ ປີ 2019 ຢູ່ນະຄອນໂຮ່ຈີມິງ ໄດ້ມີກອງປະຊຸມປຶກສາຫາລື ເພື່ອສົ່ງເສີມການຄ້າໃນຂອບສັນຍາການຄ້າເສລີລະຫວ່າງຫວຽດນາມ ແລະ ເອີຣົບ ໃຫ້ໄດ້ປະໂຫຍດສູງສຸດ ໃນກອງປະຊຸມໄດ້ມີຄຳເຫັນເດັດໆ ຈາກຜູ້ເຂົ້າຮ່ວມ ເຊິ່ງລ້ວນແຕ່ເປັນການນຳຂອງ ວົງການ ການຄ້າ ຕົວຢ່າງ ຄຳເຫັນຂອງທ່ານ ຫງຽວນຮວຍນາມ (Nguyen Hoai Nam) ປະທານສະມາຄົມນັກທຸລະກິດຫວຽດນາມ ປະຈຳປະ ເທດຝຣັ່ງ ທີ່ໃຫ້ຄຳແນະນຳວ່າ: ເພື່ອໃຫ້ໄດ້ຮັບຜົນ ປະໂຫຍດສູງສຸດຈາກສັນຍາຕົກລົງການຄ້າເສລີລະຫວ່າງ ຫວຽດນາມ ແລະ ເອີຣົບ ນັ້ນ ອຸດສາຫະກຳການຜະລິດເພື່ອສົ່ງອອກຂອງຫວຽດນາມ ນອກຈາກຮັບປະກັນເງື່ອນໄຂອັນຈຳເປັນທົ່ວໄປ ເຊັ່ນ: ມາດຕະຖານຄວາມປອດໄພຂອງອາຫານ ລະບຽບກ່ຽວກັບທີ່ມາຂອງສິນຄ້າ ແລະ ການປົກປ້ອງແຮງງານແລ້ວ ຍັງຕ້ອງເອົາໃຈໃສ່ບັນຫາ ສິດທິທາງຊັບສິນທາງປັນຍາ ທີ່ລະບຸໄວ້ໃນເອກະສານສັນຍາ ນັ້ນກໍຄື ພັນທະຕາມສັນຍາທີ່ຕ້ອງປະ ຕິບັດ ເຊິ່ງລວມມີເລື່ອງລິຂະສິດ ການປະດິດ ແລະ ການບົ່ງບອກພື້ນທີ່ທາງພູມສາດ ທ່ານ ນາມ ໄດ້ເຕືອນບັນດາອຸດສາຫະກຳຂອງຫວຽດນາມວ່າ ເວລາລິເລີ່ມສ້າງ ແລະ ພັດທະນາຍຸດທະສາດກ່ຽວ ກັບຍີ່ຫໍ້ຜະລິດຕະພັນນັ້ນ ສິ່ງທີ່ຕ້ອງຄິດຫາກ່ອນ ອື່ນທັງໝົດ ກໍຄື ເລື່ອງຊັບສິນທາງປັນຍາ ກອງປະຊຸມໄດ້ຮັບຟັງຕົວຢ່າງທີ່ເກີດຂຶ້ນກັບຜະລິດຕະພັນນ້ຳປາຍີ່ຫໍ້ດັງ “ຟູກວກ” ຂອງຫວຽດນາມ ທີ່ມີຂາຍຢູ່ ທົ່ວໄປ ໃນເອີຣົບ ແລະ ສະຫະລັດອາເມຣິກາ ທັງໆທີ່ເປັນຜະລິດຕະພັນທີ່ຜະລິດຢູ່ເກາະຟູກວກຂອງຫວຽດນາມແທ້ໆ ແຕ່ປ້າຍທີ່ຕິດຢູ່ສິນຄ້າຜັດບອກ ວ່າ ຜະລິດຈາກປະເທດອື່ນໆ ຄຳແນະນຳສຳຄັນ ອີກຈຳນວນໜຶ່ງຈາກທ່ານປະທານສະມາຄົມນັກທຸລະກິດຫວຽດນາມ ປະຈຳປະເທດຝຣັ່ງ ກໍຄື ນັກທຸລະກິດຫວຽດນາມ ຄວາມຈຳກັດຜະລິດຕະພັນທີ່ ມີຜົນກະທົບໂດຍກົງ ແລະ ໂດຍທາງອ້ອມຕໍ່ສິ່ງ ແວດລ້ອມ ເຊັ່ນ: ຜະລິດຕະພັນທີ່ຫຸ້ມຫໍ່ດ້ວຍຢາງ (ປຼັສຕິກ) ຫຼື ທີ່ບັນຈຸໃນກະປອງ ເພາະວ່າ ລູກຄ້າ ໃນຕະຫຼາດເອີຣົບນັ້ນມີຄວາມເປັນຫ່ວງເລື່ອງສິ່ງ ແວດລ້ອມຫຼາຍທີ່ສຸດ ຜະລິດຕະພັນທີ່ໃຊ້ຢາງຫຸ້ມຫໍ່ ຫຼື ບັນຈຸໃນກະປອງນັ້ນ ມີຄວາມສ່ຽງທີ່ຈະຖືກ ເກືອດຫ້າມສູງ ຄຳເຫັນທີ່ໜ້າສົນໃຈຈາກຜູ້ນຳ ດ້ານທຸລະກິດອີກຈຳນວນໜຶ່ງ ກໍຄື ຜະລິດຕະພັນ ກະສິກຳຈາກຫວຽດນາມ ທີ່ສົ່ງອອກໄປເອີຣົບນັ້ນ ຄວນເປັນປະເພດແປຮູບຈະດີກວ່າ ສິນຄ້າສົດໆ ຍ້ອນທີ່ຕັ້ງທາງພູມສາດຂອງຫວຽດນາມຢູ່ໄກ ຈາກເອີຣົບຫຼາຍ ເມື່ອສົມທຽບກັບບັນດາປະເທດ ໃນເຂດອາຟຣິກາເໜືອ ຜູ້ຂຽນເຫັນວ່າຄຳແນະ ນຳດີໆຈາກກອງປະຊຸມນີ້ຈະເປັນບົດຮຽນໃຫ້ພວກເຮົາເບິ່ງໄວ້ ເພື່ອສົ່ງເສີມການສົ່ງອອກສິນຄ້າ ໄປຕ່າງປະເທດໃຫ້ສອດຄ່ອງກັບຄວາມຕ້ອງ ການຂອງຕະຫຼາດ ແລະ ເງື່ອນໄຂທີ່ຈຳເປັນອື່ນໆ.
ທີ່ ສປ ຈີນ: ຂ່າວຕ່າງປະເທດໃຫ້ຮູ້ ໃນກາງເດືອນ ກໍລະກົດ 2018 ວ່າ: ສານປະຊາຊົນສູງສຸດຈີນ ໄດ້ລິເລີ່ມສ້າງບັນດາຫ້ອງການສານ ເພື່ອແກ້ໄຂ ຄະດີທີ່ພົວພັນກັບຊັບສິນທາງປັນຍາ ແນໃສ່ປົກ ປ້ອງເຄື່ອງໝາຍການຄ້າທີ່ມີຊື່ສຽງ ໂດ່ງດັງ ສານ ຊັບສິນທາງປັນຍານີ້ ໄດ້ສ້າງຂຶ້ນຢູ່ຕາມເຂດແຄ້ວນບ່ອນທີ່ຮຽກຮ້ອງໃຫ້ມີການປົກປ້ອງສິ່ງປະດິດສ້າງ ໃໝ່ໆທີ່ພວມເຕີບໂຕ ເລີ່ມແຕ່ຕົ້ນຫາກາງປີ 2017 ສານປະຊາຊົນສູງສຸດຈີນ ໄດ້ຕົກລົງເປີດບໍ ລິການຫ້ອງການສານຊັບສິນທາງປັນຍາຢູ່ໃນ 16 ຕົວເມືອງໃຫຍ່ໆຂອງຈີນ ໃນນັ້ນ ລວມມີນະຄອນ ນານຈິງ ຮາງຈູ ວູຫານ ແລະ ຊູຈູ.