ຜູ້ຊ່ຽວຊານສາທາລະນະສຸກສະຫະລັດ ເປີດເຜີຍວ່າ ເຄີຍມີການວິໄຈພົບວ່າ ຜູ້ທີ່ເປັນໂລກອ້ວນ ເມື່ອໄດ້ຮັບວັກຊີນໄຂ້ຫວັດໃຫຍ່ ຈະມີປະສິດທິພາບໜ້ອຍກວ່າ ຄາດອາດເກີດຂຶ້ນກັບວັກຊີນ COVID-19 ເຊັ່ນກັນ.
ຜູ້ຊ່ຽວຊານເຕືອນວ່າ ປະສິດທິພາບວັກຊີນ COVID-19 ອາດຫຼຸດລົງໃນກຸ່ມເປັນ “ໂລກອ້ວນ” ນັກວິໄຈຈາກມະຫາວິທະຍາໄລນອດແຄໂຣໄລນາ (University of North Carolina; UNC) ເປິດເຜີຍວ່າ “ໂລກອ້ວນ (Obesity)” ເພີ່ມຄວາມສ່ຽງໃນການຕິດເຊື້ອ COVID-19 ແລະ ຫາກໄດ້ຮັບວັກຊີນ COVID-19 ອາດມີປະສິດທິຜົນໜ້ອຍລົງ ເນື່ອງຈາກການຕອບສະໜອງຂອງລະບົບພູມຄຸ້ມກັນອ່ອນແອລົງ.
ທ່ານ ເມລິນດາ ເບັກ (Melinda Beck) ສາສະດາຈານສະຖາບັນ ສາທາລະນະສຸກຂອງ UNC ກ່າວວ່າ ໃນຂະນະທີ່ການວິໄຈວັກຊີນ COVID-19 ຍັງຄົງດຳເນີນຕໍ່ໄປນັ້ນ ເຄີຍມີການວິໄຈກ່ອນໜ້ານີ້ ທີ່ພົບຄວາມເຊື່ອມໂຍງວ່າ ຜູ້ທີ່ເປັນໂລກອ້ວນ ເມື່ອໄດ້ຮັບວັກຊີນໄຂ້ຫວັດໃຫຍ່ ຈະມີປະສິດທິພາບໜ້ອຍກວ່າ ເຊິ່ງເຂົາຄາດວ່າເຫດໃນລັກສະນະດຽວກັນນີ້ ອາດເກີດຂຶ້ນກັບວັກຊີນ COVID-19 ເຊັ່ນກັນ.
“ຢ່າງໃດກໍຕາມ ເຮົາບໍ່ໄດ້ບອກວ່າ ວັກຊີນ COVID-19 ຈະໃຊ້ບໍ່ໄດ້ຜົນກັບປະຊາກອນທີ່ເປັນໂລກອ້ວນ ແຕ່ຄວນພິຈາລະນາວ່າໂລກອ້ວນ ອາດເປັນປັດໄຈທີ່ສົ່ງຜົນຕໍ່ປະສິດທິພາບການທົດສອບວັກຊີນ… ເຖິງແມ່ນວັກຊີນທີ່ປ້ອງກັນໄດ້ໜ້ອຍ ກໍຍັງໃຫ້ພູມຄຸ້ມກັນໂລກນັ້ນໆໄດ້ໃນລະດັບໜຶ່ງ” ເຂົາບອກ.
ນັກວິທະຍາສາດຂອງ UNC ໄດ້ກວດສອບຂໍ້ມູນຈາກການສຶກສາ 75 ຊິ້ນ ລະຫວ່າງເດືອນມັງກອນ ເຖິງມິຖຸນາ 2020 ເຊິ່ງກ່ຽວຂ້ອງກັບຜູ້ຕິດເຊື້ອ COVID-19 ຈຳນວນ 400.000 ຄົນ.
ພວກເຂົາພົບວ່າ ຜູ້ທີ່ເປັນໂລກອ້ວນ ມີຄວາມສ່ຽງໃນການຕິດ COVID-19 ຫຼາຍກວ່າຄົນທີ່ບໍ່ເປັນໂລກອ້ວນ ເຖິງ 46% ແລະ ມີຄວາມສ່ຽງທີ່ຈະຕ້ອງເຂົ້າຮັບການປິ່ນປົວໃນໂຮງໝໍເພີ່ມຂຶ້ນ 113%.
ນອກຈາກນີ້ ໂອກາດເຂົ້າຫ້ອງຄົນເຈັບໜັກຍັງສູງກວ່າຜູ້ທີ່ບໍ່ເປັນໂລກອ້ວນ ເຖິງ 74% ແລະ ຍັງມີຄວາມສ່ຽງທີ່ຈະເສຍຊີວິດຈາກໄວຣັສ COVID-19 ຫຼາຍຂຶ້ນເຖິງ 48% ໂລກອ້ວນ ເປັນປັດໄຈສ່ຽງທີ່ຮູ້ກັນດີຢູ່ແລ້ວວ່າ ອາດເຮັດໃຫ້ຜູ້ຕິດເຊື້ອໂລກ COVID-19 ມີອາການຮຸນແຮງຫຼາຍຂຶ້ນ.
ຊາວບ້ານ – ນຳສະເໜີ