ນັກຮຽນຊາວຫວຽດນາມ 3 ຄົນ ໄດ້ອອກແບບໝວກກັນຫະທົບທີ່ຈະຊ່ວຍໃຫ້ເຈົ້າໜ້າທີ່ທາງການແພດ ທີ່ຕ້ອງຕໍ່ສູ້ກັບເຊື້ອໄວຣັສ COVID-19 ສາມາດກິນເຂົ້າໜົມ ຫຼື ລູບຫນ້າລູບຕາຕົວເອງໄດ້ ໂດຍບໍ່ຕ້ອງເຮັດໃຫ້ຕົນເອງຕ້ອງສ່ຽງກັບການຕິດເຊື້ອ.
ການລະບາດຂອງພະຍາດ ເຮັດໃຫ້ຜູ້ຄົນຕ້ອງປ່ຽນຄວາມສະດວກສະບາຍກັບຄວາມປອດໄພ ຂອງອຸປະກອນປ້ອງກັນສ່ວນບຸກຄົນ (PPE) ໂດຍສະເພາະຢ່າງຍິ່ງ ບັນດາເຈົ້າໜ້າທີ່ ທີ່ຕໍ່ສູ້ກັບພະຍາດຢູ່ໃນແນວໜ້າ ເຊິ່ງຕ້ອງສວມຊຸດປ້ອງກັນເປັນໄລຍະເວລາຍາວນານ ແລະ ຈາກປະເດັນດັ່ງກ່າວ ກຸ່ມນັກຮຽນກຸ່ມນີ້ ໄດ້ຄິດອອກແບບໝວກທີ່ເຊື່ອມຕໍ່ກັບເຄື່ອງຊ່ວຍຫາຍໃຈ ທີ່ບໍ່ພຽງແຕ່ເຮັດໜ້າທີ່ປ້ອງກັນເຊື້ອໄວຣັສເທົ່ານັ້ນ ແຕ່ຍັງຊ່ວຍໃຫ້ເຈົ້າໜ້າທີ່ສາມາດເຮັດວຽກໄດ້ຍາວນານຂຶ້ນ.
ກຸ່ມນັກຮຽນໄດ້ປະດິດໝວກກັນກະທົບຊື່ ‘Vihelm’ ທີ່ເປັນການປະສົມຄຳລະຫວ່າງ Vietnam ແລະ helmet ໂດຍໝວກມີຊ່ອງຖົງມືທີ່ເຮັດໃຫ້ຜູ້ສວມສາມາດສອດມືເຂົ້າໄປຂ້າງໃນໝວກ ເພື່ອເຊັດເຫື່ອອອກຈາກໃບໜ້າ ຫຼື ເຊັດໜ້າກາກໃນຂະນະທີ່ໝວກຍັງຄົງປິດສະໜິດໄດ້ “ສິ່ງທີ່ແຕກຕ່າງຢ່າງເຫັນໄດ້ແຈ້ງຂອງໝວກໜ່ວຍນີ້ ຄືຊ່ອງຖົງມື ທ່ານສາມາດໃຊ້ມັນເພື່ອສຳຜັດໃບໜ້າຂອງທ່ານໄດ້ຢ່າງປອດໄພ” ເຈິ່ນ ຫວຽນ ແຄັງ ຮານ ອາຍຸ 14 ປີ ໜຶ່ງໃນນັກຮຽນທີ່ໄດ້ຮັບລາງວັນ Best Invention Design Award ຈາກເວທີການປະກວດສິ່ງປະດິດນະວັດຕະກຳນານາຊາດ ທີ່ ການາດາ ເມື່ອເດືອນກ່ອນກ່າວ.
ໝວກກັນກະທົບທີ່ເບິ່ງລ້ຳຍຸກນີ້ ຍັງມີຊ່ອງວ່າງດ້ານໃນໝວກ ເຊິ່ງສາມາດໃສ່ຂອງກິນໄດ້ ແລະ ມີທໍ່ທີ່ເຊື່ອມກັບເຄື່ອງ PAPR ສຳລັບຈ່າຍອາກາດບໍລິສຸດໃຫ້ຜູ້ສວມ.
ເຖິງແມ່ນອຸປະກອນຊິ້ນນີ້ ຈະຖືວ່າມີຄວາມປອດໄພຫຼາຍກວ່າຜ້າອັດປາກຕາມມາດຕະຖານ ແຕ່ອຸປະກອນກໍອາດເຮັດໃຫ້ຜູ້ສວມໃສ່ ບໍ່ຮູ້ສຶກສະບາຍໄປກວ່າ PPE ຮູບແບບອື່ນ ເນື່ອງຈາກຊ່ອງດ້ານໃນໝວກອາດສຽດສີ ຫຼື ຂູດກັບຫົວຂອງຜູ້ສວມໄດ້.
ທັງນີ້ ບໍລິສັດ VinSmart ທີ່ເປັນກິດຈະການໃນເຄືອຂອງບໍລິສັດ Vingroup ກຸ່ມບໍລິສັດເອກະຊົນລາຍໃຫຍ່ຂອງຫວຽດນາມ ໄດ້ລົງນາມຂໍ້ຕົກລົງທີ່ຈະຊ່ວຍນັກຮຽນກຸ່ມນີ້ ຜະລິດໝວກກັນກະທົບ Vihelm ເວີຊັນທີ່ໄດ້ຮັບການພັດທະນາປັບປຸງຈົນສົມບູນ.