ມອບ-ຮັບ ຫົວໜ້າຄະນະຄຸ້ມຄອງເຂດເສດຖະກິດພິເສດ ນວ

ພິທີມອບ-ຮັບຕຳແໜ່ງ ຫົວໜ້າຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ (ຄຂສພ ນວ) ລະຫວ່າງຜູ້ເກົ່າ ແລະ ຜູ້ໃໝ່ ຈັດຂຶ້ນວັນທີ 13 ຕຸລາ 2020 ຢູ່ຫ້ອງການສົ່ງເສີມ ແລະ ຄຸ້ມຄອງເຂດເສດຖະກິດພິເສດ ກະຊວງແຜນການ ແລະ ການລົງທຶນ (ຜທ) ໂດຍມີທ່ານ ນາງ ຄຳຈັນ ວົງແສນບູນ ຮອງລັດຖະມົນຕີກະຊວງ ຜທ ທ່ານ ອາດສະພັງທອງ ສີພັນດອນ ຮອງເຈົ້າຄອງ ນວ ແລະ ພາກສ່ວນກ່ຽວຂ້ອງເຂົ້າຮ່ວມ.

ທ່ານ ນາງ ທຳມາ ເພັດວິໄຊ ຫົວໜ້າກົມຈັດຕັ້ງ ແລະ ພະນັກງານ ກະຊວງ ຜທ ໄດ້ຜ່ານຂໍ້ຕົກລົງຂອງທ່ານຮອງນາຍົກລັດຖະມົນຕີ ລັດຖະມົນຕີກະຊວງ ຜທ ວ່າດ້ວຍການອະນຸມັດໃຫ້ພະນັກງານອອກພັກຜ່ອນຮັບອຸດໜູນບຳນານ ແລະ ຜ່ານຂໍ້ຕົກລົງວ່າດ້ວຍການແຕ່ງຕັ້ງຫົວໜ້າຄະນະຄຸ້ມຄອງເຂດເສດຖະກິດພິເສດ ນວ ເຊິ່ງຕົກລົງເຫັນດີແຕ່ງຕັ້ງທ່ານ ທະນົງໄຊ ຄຸດໄພທູນ ເລຂາໜ່ວຍພັກ ຮອງຫົວໜ້າ ຄຂສພ ນວ ເປັນຫົວໜ້າຄະນະ ຄຂສພ ນວ ຜູ້ໃໝ່ ປ່ຽນແທນທ່ານ ສຸບັນ ຈຸນລະຊາ ຫົວໜ້າ ຄຂສພ ນວ ຜູ້ເກົ່າ ທີ່ອອກພັກການຮັບອຸດໜູນບຳນານ

ທ່ານ ນາງ ຄຳຈັນ ວົງແສນບູນ ກ່າວວ່າ: ວຽກງານການພັດທະນາ ແລະ ຄຸ້ມຄອງເຂດເສດຖະກິດພິເສດ ເປັນວຽກງານໜຶ່ງທີ່ສຳຄັນ ແລະ ໄດ້ຮັບຄວາມເອົາໃຈໃສ່ຊີ້ນຳຢ່າງໃກ້ຊິດຕິດແທດຈາກພັກ ແລະ ລັດຖະບານ ເວົ້າລວມ ເວົ້າສະເພາະ ກໍຄືຄະນະນຳກະຊວງ ຜທ ແລະ ອົງການປົກຄອງ ນວ ເພື່ອເຮັດໃຫ້ວຽກງານການພັດທະນາ ແລະ ຄຸ້ມຄອງເຂດເສດຖະກິດພິເສດ ໄດ້ຮັບການປັບປຸງເຂົ້າສູ່ລະບົບດີຂຶ້ນເລື້ອຍໆ ສາມາດປະກອບສ່ວນຢ່າງຕັ້ງໜ້າ ເຂົ້າໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ແລະ ແຜນພັດທະນາເສດຖະກິດ-ສັງຄົມໃນແຕ່ລະໄລຍະ ໂດຍສະເພາະການພັດທະນາພື້ນຖານໂຄງລ່າງ ການດຶງດູດການລົງທຶນ ແລະ ອື່ນໆ ສະນັ້ນ ເພື່ອເຮັດໃຫ້ວຽກງານຄຸ້ມຄອງເຂດເສດຖະກິດພິເສດຢູ່ລາວ ກໍຄື ນວ ໃຫ້ນັບມື້ເຕີບໃຫຍ່ຂະຫຍາຍຕົວຢ່າງຕໍ່ເນື່ອງ ແລະ ໝັ້ນທ່ຽງ ຮຽກຮ້ອງໃຫ້ພວກເຮົາຕ້ອງສືບຕໍ່ປັບປຸງ ແລະ ກໍ່ສ້າງບຸຄະລາກອນທີ່ຮັບຜິດຊອບໃນຂົງເຂດນີ້ໃຫ້ເຕີບໃຫຍ່ເຂັ້ມແຂງ ສົມຄູ່ກັບຄວາມຮຽກຮ້ອງຕ້ອງການຂອງວຽກງານຕົວຈິງຂອງການພັດທະນາ ແລະ ໜ້າທີ່ການເມືອງຂອງພັກ ແລະ ລັດຖະບານໃນໄລຍະໃໝ່ ໃຫ້ມີຜົນສຳເລັດເປັນກ້າວໆ.

ປັດຈຸບັນ ເຂດເສດຖະກິດພິເສດທົ່ວປະເທດ ມີຫົວໜ່ວຍທຸລະກິດຈາກພາຍໃນ ແລະ ຕ່າງປະເທດເຂົ້າມາລົງທຶນຢູ່ລາວຫຼາຍກວ່າ 800 ບໍລິສັດ ສະເພາະໃນເຂດເສດຖະກິດພິເສດ ນວ ສາມາດດຶງດູດການລົງທຶນພາຍໃນ ແລະ ຕ່າງປະເທດໄດ້ທັງໝົດ 218 ບໍລິສັດ ມີທຶນຈົດທະບຽນ 903 ລ້ານກວ່າໂດລາສະຫະລັດ ຫຼື ປະມານ 8.330 ຕື້ກີບ ແຜນການລົງທຶນ 5.053 ລ້ານກວ່າໂດລາສະຫະລັດ ຫຼື ປະມານ 46.630,91 ຕື້ກີບ ມູນຄ່າການລົງທຶນຕົວຈິງ ມາເຖິງປັດຈຸບັນມີ 2.697 ລ້ານໂດລາສະຫະລັດ ຫຼື ປະມານ 24.880,94 ຕື້ກີບ ແລະ ມອບພັນທະໃຫ້ລັດຖະບານໄດ້ 5,9 ລ້ານໂດລາສະຫະລັດ ສ້າງວຽກເຮັດງານທຳໄດ້ 5.675 ຄົນ ໃນນັ້ນ ມີຄົນລາວ 5.115 ຄົນ ນຳເຂົ້າວັດຖຸດີບເປັນສິນຄ້າ ມູນຄ່າ 2.849 ລ້ານໂດລາສະຫະລັດ ຫຼືປະມານ 26.286,15 ຕື້ກີບ ແລະ ມີການສົ່ງອອກສິນຄ້າມູນຄ່າ 220 ລ້ານກວ່າໂດລາສະຫະລັດ ຫຼືປະມານ 2.029,77 ຕື້ກີບ.