ທ່ານ ອາຄົມ ພົມມະຫານ ປະທານບໍລິສັດທ່ອງທ່ຽວລາວກຣີນ ຜູ້ສຳປະທານຕາດຮ້ອຍຄົວ ສຳພາດບໍ່ດົນມານີ້ວ່າ: ບໍລິສັດທ່ອງທ່ຽວ ລາວກຣີນ ໄດ້ເຂົ້າມາພັດທະນາຕາດຮ້ອຍຄົວເລີ່ມແຕ່ປີ 2015 ແລະ ໄດ້ເປີດບໍລິການນັກທ່ອງທ່ຽວຢ່າງເປັນທາງການນັບແຕ່ເດືອນສິງຫາປີ 2018 ໃນເນື້ອທີ່ 20 ກວ່າເຮັກຕາ ເຊິ່ງມີຫຼາຍກິດຈະກຳເຊັ່ນ: ຊົມນ້ຳຕົກຕາດ ຂີ່ສະລິງ ຊົມສວນດອກໄມ້ ຍ່າງຂົວບ້ວງຢູ່ລະຫວ່າງກາງຕົ້ນໄມ້ໃຫຍ່ຈາກຕົ້ນນີ້ໄປຫາຕົ້ນອື່ນ ໄຕ່ເຊືອກໄປຕາມຕົ້ນໄມ້ຕ່າງໆ ໄຕ່ຂົວໄມ້ທີ່ເຊື່ອມຕໍ່ລະຫວ່າງຕາດ ຜ່ານປ່າດົງໃຫຍ່ໄປຫາສວນອຸທະຍານທີ່ປະດັບໄປດ້ວຍດອກໄມ້ຫຼາຍຊະນິດ ບໍລິການນອນກາງເຕັ່ນ ຫ້ອງພັກ ສ້າງຕະຫຼາດຊຸມຊົນ ໃນໄລຍະເບື້ອງຕົ້ນທີ່ເປີດໃຫ້ບໍລິການ ມີນັກທ່ອງທ່ຽວໃຫ້ຄວາມສົນໃຈເຂົ້າມາທ່ອງທ່ຽວເປັນຈຳນວນຫຼວງຫຼາຍ ສະເລ່ຍ 300-350 ຄົນຕໍ່ວັນ ໃນນີ້ 70% ແມ່ນນັກທ່ອງທ່ຽວພາຍໃນ ແລະ 30% ແມ່ນນັກທ່ອງທ່ຽວຕ່າງປະເທດ.
ພາຍຫຼັງທີ່ມີການລະບາດຂອງພະຍາດໂຄວິດ-19 ເປັນຕົ້ນມາ ນັກທ່ອງທ່ຽວທີ່ເຂົ້າມາທ່ຽວຊົມນ້ຳຕົກຕາດຮ້ອຍຄົວຫຼຸດລົງຢ່າງຕໍ່ເນື່ອງ ແລະ ໄດ້ປິດກິດຈະການຊົ່ວຄາວໄລຍະໜຶ່ງ ຕາມມາດຕະການທີ່ລັດຖະບານວາງອອກ ເພື່ອປ້ອງກັນການລະບາດຂອງພະຍາດໂຄວິດ-19 ພາຍຫຼັງລັດຖະບານມີມາດຕະການຜ່ອນຜັນໃນການປ້ອງກັນ ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ຕາດຮ້ອຍຄົວໄດ້ຮັບການປັບປຸງຫຼາຍຢ່າງຄືນໃໝ່ ເພື່ອໃຫ້ເຂົ້າກັບສະຖານະການທີ່ເກີດຂຶ້ນ ໂດຍເລີ່ມຈາກການບໍລິຫານ ໂດຍໃຫ້ພະນັກງານທີ່ມີຢູ່ 70 ກວ່າຄົນເຂົ້າເຮັດວຽກ ແລະ ໃຫ້ພັກ 2 ວັນຕໍ່ອາທິດ ແລ້ວຈ່າຍເງິນເດືອນ 70% ນອກຈາກນີ້ ຄ່າທີ່ພັກ ອາຫານ ແລະ ຄ່າກິດຈະກຳຕ່າງໆແມ່ນຫຼຸດ 50% ເຊິ່ງການປັບຕົວໃນຮູບແບບນີ້ ກໍເພື່ອຄວາມຢູ່ລອດ ແລະ ສົ່ງເສີມລາວທ່ຽວລາວ ກໍຄືການດຶງດູດນັກທ່ອງທ່ຽວພາຍໃນເຂົ້າມາທ່ອງທ່ຽວໃຫ້ນັບມື້ເພີ່ມຂຶ້ນ.
# ພາບ & ຂ່າວ: ອົ່ນ ໄຟສົມທອງ