ງານວິໄຈພົບວ່າ “ສານກໍ່ມະເຮັງ” ທີ່ຢູ່ໃນຄວັນ ຈາກການປິ້ງຈີ່ອາຫານເທິງເຕົາ ສາມາດເຂົ້າສູ່ຮ່າງກາຍໄດ້ ເຖິງແມ່ນພຽງເຮົາຮັບຄວັນຢູ່ໃກ້ເຕົາ.
ງານວິໄຈພົບວ່າ ຫາກເຮົາຮັບປະທານອາຫານປິ້ງຈີ່ຢູ່ໜ້າເຕົາທີ່ເຮົາປິ້ງຈີ່ເອງ ເຮົາອາດໄດ້ຮັບສານກໍ່ມະເຮັງຈາກທັງການຮັບປະທານອາຫານ ການສູບດົມຄວັນ ແລະ ດູດຊຶມຜ່ານທາງຜິວໜັງ.
ທີມວິໄຈທີ່ກວາງໂຈວ ປະເທດຈີນ ສະຫຼຸບຜົນຈາກການຮວບຮວມຂໍ້ມູນຈາກການທົດລອງກັບອາສາສະໝັກທັງ 20 ຄົນ ທີ່ຖືກແບ່ງອອກເປັນ 3 ກຸ່ມ ກຸ່ມທຳອິດໃຫ້ລອງກິນອາຫານປິ້ງຈີ່ ສູບດົມຄວັນ ແລະ ຮັບຄວັນຜ່ານຜິວໜັງ ກຸ່ມທີ່ 2 ພຽງ ສູບດົມຄວັນ ແລະ ຮັບຄວັນຜ່ານຜິວໜັງ ກຸ່ມທີ່ 3 ຮັບຄວັນຜ່ານຜິວໜັງຢ່າງດຽວ ແລະ ເຮັດການກວດຫາສານກໍ່ມະເຮັງຫຼັງເຮັດການທົດລອງ ພົບວ່າກຸ່ມທີ່ກິນອາຫານປິ້ງຈີ່ ສ່ຽງໄດ້ຮັບສານກໍ່ມະເຮັງຫຼາຍທີ່ສຸດ ແຕ່ລອງລົງມາກັບເປັນກຸ່ມທີ່ຮັບຄວັນຜ່ານຜິວໜັງ ແລ້ວອັນດັບສຸດທ້າຍຄືກຸ່ມທີ່ສູບດົມຄວັນ.
ສານກໍ່ມະເຮັງທີ່ມັກພົບໃນອາຫານປິ້ງຈີ່ ໄດ້ແກ່ສານພິດທີ່ຊື່ ພີເອເອຊ (polycyclic aromatic hydrocarbon) ເຊິ່ງເປັນຊະນິດດຽວກັບທີ່ເກີດໃນຄວັນໄຟ ຄວັນທູບ ຄວັນຢາສູບ ຄວັນໂຮງງານ ແລະ ຄວັນອື່ນໆທີ່ເກີດຈາກການເຜົາໄໝ້ທີ່ບໍ່ສົມບູນ.
ສານນີ້ເກີດຈາກໄຂມັນໃນຊີ້ນສັດທີ່ສົດໆ ລົງເທິງຖ່ານຂະນະທີ່ໃຫ້ຄວາມຮ້ອນຕ່ຳ ແລະ ເມື່ອອາກາດມີຈຳກັດ ເຮັດໃຫ້ການເຜົາໄໝ້ບໍ່ສົມບູນ ຈຶ່ງເກີດຄວັນທີ່ມີສານພີດເອເອຊລອຍຂຶ້ນມາເກາະທີ່ຜິວອາຫານ ໂດຍສານນີ້ຈະມີຫຼາຍໃນບໍລິເວນທີ່ໄໝ້ກອບຂອງອາຫານປິ້ງຈີ່ນັ້ນ.
ຈາກທີ່ຫຼາຍຄົນຄິດວ່າ ການຮັບປະທານອາຫານປິ້ງຈີ່ທີ່ໄໝ້ດຳ ຈະເຮັດໃຫ້ເຮົາສ່ຽງຮັບສານກໍ່ມະເຮັງຫຼາຍຂຶ້ນແຕ່ພຽງຢ່າງດຽວ ແຕ່ອັນທີ່ຈິງແລ້ວ ເມື່ອສານກໍ່ມະເຮັງຢູ່ໃນຄວັນ ດັ່ງນັ້ນ ຫາກເຮົາສູບດົມຄວັນ ຫຼື ແມ່ນແຕ່ພຽງການຢືນ ຫຼື ນັ່ງຢູ່ໃກ້ເຕົາຂະນະເຮັດການປິ້ງຈີ່ອາຫານຢູ່ ເຮົາກໍສາມາດຮັບສານກໍ່ມະເຮັງໄດ້ເຊັ່ນກັນ.
ກິນອາຫານປິ້ງຈີ່ ຢ່າງໃຫ້ປອດໄພຕໍ່ສານກໍ່ມະເຮັງຫຼາຍທີ່ສຸດ.
ຄວາມຈິງແລ້ວ ການບໍ່ກິນອາຫານປິ້ງຈີ່ ຫຼື ກິນໃຫ້ໜ້ອຍທີ່ສຸດ ໜ້າຈະເປັນທາງອອກທີ່ດີທີ່ສຸດ ໃນການຫຼຸດຄວາມສ່ຽງການຮັບສານກໍ່ມະເຮັງ ຈາກອາຫານປິ້ງຈີ່ ແຕ່ຫາກຍັງຢາກກິນອາຫານປິ້ງຈີ່ຢູ່ແດ່ ສາມາດຫຼຸດຄວາມສ່ຽງອັນຕະລາຍຈາກສານກໍ່ມະເຣັງໄດ້ ດັ່ງນີ້:
1. ເລືອກຊີ້ນສັດທີ່ມີໄຂມັນໜ້ອຍໃນການນຳມາປຸງອາຫານ ຫຼື ຕັດສ່ວນທີ່ເປັນໄຂມັນອອກໄປໃຫ້ໄດ້ຫຼາຍທີ່ສຸດ ກ່ອນເຮັດການປິ້ງຈີ່.
2. ນຳຊີ້ນສັດໄປປຸງໃຫ້ສຸກກ່ອນນຳມາປິ້ງຈີ່ ເຊັ່ນ ຕົ້ມ ລວກ ຫຼື ນຳໄປເຮັດໃຫ້ສຸກດ້ວຍໄມໂຄຣເວຟ ເພື່ອຫຼຸດການເກີດສານພີເອເອຊຂະນະປິ້ງຈີ່.
3. ຢູ່ໃຫ້ຫ່າງຈາກເຕົາປິ້ງຈີ່ໃຫ້ໄດ້ຫຼາຍທີ່ສຸດ.
4. ໃຊ້ເຕົາໄຟຟ້າໄຮ້ຄວັນ ທີ່ສາມາດຄວບຄຸມລະດັບຄວາມຮ້ອນໄດ້ຢ່າງແມ່ນຢຳ ຫຼຸດສ່ຽງອັນຕະລາຍໄດ້ຫຼາຍກວ່າເຕົາຖ່ານ.
5. ຫາກຕ້ອງປິ້ງຈີ່ເທິງເຕົາຖ່ານ ຄວນເລືອກຖ່ານກ້ອນ ຫຼາຍກວ່າຖ່ານປົ່ນລະອຽດ ຫຼື ອາດເລືອກເປັນຟືນຈາກໄມ້ເນື້ອແຂງ ເພື່ອໃຫ້ຂະບວນການເຜົາໄໝ້ເກີດຂຶ້ນຢ່າງຊ້າໆ.
6. ນຳຊີ້ນສັດ ຫຼື ອາຫານຕ່າງໆ ຫໍ່ໃບຕອງກ່ອນປິ້ງຈີ່ ຈະຊ່ວຍຫຼຸດປະລິມານໄຂມັນທີ່ຈະໄຫຼຢອດລົງໄປເທິງຖ່ານ ຫຼຸດສານກໍ່ມະເຮັງທີ່ເກີດຂຶ້ນ ລະຫວ່າງຂະບວນການປິ້ງຈີ່ໄດ້.
7. ເມື່ອຈະຮັບປະທານອາຫານປິ້ງຈີ່ ຄວນຕັດສ່ວນທີ່ໄໝ້ດຳອອກໄປໃຫ້ໄດ້ຫຼາຍທີ່ສຸດກ່ອນຮັບປະທານ.
8. ຫຼັງປຸງອາຫານປິ້ງຈີ່ ຄວນປ່ຽນເສື້ອຜ້າທີ່ປົນເປື້ອນຄວັນ ແລະ ອາບນ້ຳທັນທີ.
ຊາວບ້ານ – ນຳສະເໜີ