ກອງປະຊຸມໃຫຍ່ຄັ້ງທີ III ຂອງສະມາຄົມສິລະປະແຄນລາວ ໄດ້ຈັດຂຶ້ນວັນທີ 8 ຕຸລາ 2020 ທີ່ສູນກາງແນວລາວສ້າງຊາດ ເຊິ່ງກອງປະຊຸມຄັ້ງນີ້ ເປັນຂີດໝາຍເຕີບໃຫຍ່ຂະຫຍາຍຕົວສູ່ບາດກ້າວໃໝ່ຂອງສະມາຄົມສິລະປະແຄນລາວ ໂດຍຈະໄດ້ສຸມໃສ່ພິຈາລະນາບັນດາເນື້ອໃນສຳຄັນຄື: ຕີລາຄາຜົນງານການເຄື່ອນໄຫວຂອງສະໂມສອນສິລະປະແຄນລາວໃນໄລຍະຜ່ານມາ ແລະ ກຳນົດທິດທາງແຜນການເຄື່ອນໄຫວໃນໄລຍະ 5 ປີຕໍ່ໜ້າ (2020-2025) ຄົ້ນຄວ້າຮັບຮອງເອົາກົດລະບຽບຂອງສະມາຄົມສິລະປະແຄນລາວ ຄັດເລືອກເອົາຄະນະບໍລິງານສະມາຄົມຊຸດທີ III ຜ່ານມະຕິກອງປະຊຸມໃຫຍ່ ແລະ ຮັບຟັງການໂອ້ລົມຂອງຂັ້ນເທິງ.
ກອງປະຊຸມຄັ້ງນີ້ ເປັນປະທານຂອງທ່ານ ຈະເລີນ ເຢຍປາວເຮີ ລັດຖະມົນຕີປະຈຳສຳນັກງານນາຍົກລັດຖະມົນຕີ ປະທານຄະນະຂົນຂວາຍສ້າງຕັ້ງສະມາຄົມສິລະປະແຄນລາວ ມີທ່ານ ກິແກ້ວ ໄຂຄຳພິທູນ ລັດຖະມົນຕີກະຊວງຖະແຫຼງຂ່າວ ວັດທະນະທຳ – ທ່ອງທ່ຽວ ແລະ ທ່ານ ສົມສະຫວາດ ເລັ່ງສະຫວັດ ອະດີດກຳມະການກົມການເມືອງສູນກາງພັກ ອະດີດຮອງນາຍົກລັດຖະມົນຕີ ພ້ອມດ້ວຍຜູ້ຕາງໜ້າຈາກກະຊວງ ອົງການທຽບເທົ່າ ພາກສ່ວນທຸລະກິດ ແລະ ສະມາຊິກສະມາຄົມແຄນລາວທົ່ວປະເທດເຂົ້າຮ່ວມ.
ສຳລັບການຄັດເລືອກຄະນະບໍລິຫານງານສະມາຄົມແຄນລາວຊຸດທີ 3 ນີ້ ໄດ້ເລືອກເອົາທ່ານ ຄຳພັນ ເໝືອນສິດທິດາ ເປັນປະທານ ທ່ານ ຈັນແສງ ພິມມະວົງ ແລະ ດວງຈຳປີ ວຸທິສຸກ ເປັນຮອງ ທ່ານ ນາງ ກົງເດືອນ ເນດຕະວົງ ທ່ານ ຄຳຫຼ້າ ດວງພະສຸກ ທ່ານນາງ ດາວັນ ວິຈິດວົງສາ ແລະ ທ່ານ ຄຳແສນ ພິລາວົງ ເປັນຄະນະ ພ້ອມນັ້ນ ໄດ້ຄັດເລືອກເອົາທ່ານ ດວງຈຳປີ ວຸທິສຸກ ເປັນປະທານກວດກາ ແລະ ທ່ານ ຄຳແສນ ພິລາວົງ ເປັນຮອງປະທານກວດກາ ນອກນັ້ນ ໄດ້ເລືອກເອົາທ່ານ ສົມສະຫວາດ ເລັ່ງສະຫວັດ ເປັນປະທານກິດຕິມະສັກຜູ້ທີ 1 ແລະ ທ່ານ ຈະເລີນ ເຢຍປາວເຮີ ເປັນປະທານກິດຕິມະສັກຜູ້ທີ 2.
# ຂ່າວ & ພາບ: ຂັນທະວີ