ພິທີມອບ-ອຸປະກອນກີລາຍົກນ້ຳໜັກຄົນພິການ ພາຍໃຕ້ໂຄງການຊ່ວຍເຫຼືອວັດທະນະທຳຂັ້ນຮາກຖານ ຂອງລັດຖະບານ ແລະ ປະຊາຊົນຍີ່ປຸ່ນ ຈັດຂຶ້ນວັນທີ 8 ຕຸລາ 2020 ຢູ່ຄະນະກຳມະການໂອແລມປິກແຫ່ງຊາດລາວ ໂດຍກ່າວມອບແມ່ນທ່ານ ທາເກວະກະ ເຄໂຊ ເອກອັກຄະລາຊະທູດຍີ່ປຸ່ນ ປະຈຳ ສປປ ລາວ ແລະ ກ່າວຮັບຂອງທ່ານນາງ ແສງເດືອນ ຫຼ້າຈັນທະບູນ ລັດຖະມົນຕີກະຊວງສຶກສາທິການ ແລະ ກີລາ ທັງເປັນປະທານຄະນະກຳມະການພາຣາແລມປິກແຫ່ງຊາດລາວ ໂດຍມີທ່ານຫົວໜ້າກົມກີລາມວນຊົນ ທ່ານຮອງປະທານອົງການ ADDP ພ້ອມດ້ວຍພາກສ່ວນກ່ຽວຂ້ອງ ເຂົ້າຮ່ວມເປັນສັກຂີພິຍານ.
ທ່ານ ທາເກວະກະ ເຄໂຊກ່າວວ່າ: ລັດຖະບານຍີ່ປຸ່ນ ໄດ້ມອບເງິນປະມານ 18.000 ໂດລາສະຫະລັດໃຫ້ແກ່ໂຄງການນີ້ ນອກຈາກນີ້ ອົງການ ADDP ຍັງໄດ້ໃຫ້ການຮ່ວມມືຢ່າງເຕັມທີ່ ໃນການຈັດຕັ້ງປະຕິບັດໂຄງການນີ້ ຂ້າພະເຈົ້າດີໃຈຫຼາຍທີ່ນັກກີລາຍົກນ້ຳໜັກພາຣາແລມປິກຈະສາມາດນຳໃຊ້ອຸປະກອນທີ່ມີມາດຕະຖານລະດັບສາກົນ ໂດຍຜ່ານການຮ່ວມມືຂອງທັງສອງປະເທດ ລາວ-ຍີ່ປຸ່ນ ໂດຍສະເພາະປີນີ້ ເປັນປີແຫ່ງການສ້າງຕັ້ງສາຍພົວພັນທາງການທູດ ລາວ-ຍີ່ປຸ່ນ ຄົບຮອບ 65 ປີ.
ໂອກາດນີ້ ທ່ານນາງ ແສງເດືອນ ຫຼ້າຈັນທະບູນ ກ່າວວ່າ: ການຊ່ວຍເຫຼືອອຸປະກອນຄັ້ງນີ້ ສຸດທີ່ມີຄວາມໝາຍສຳຄັນຂອງສອງປະເທດພວກເຮົາ ເພາະແມ່ນການຊ່ວຍເຫຼືອເພື່ອການພັດທະນາຄົນພິການໃຫ້ມີໂອກາດເຄື່ອນໄຫວທາງດ້ານກີລາ-ກາຍະກຳ ແລະ ສ້າງໄດ້ບັນຍາກາດສົດໃສຢູ່ໃນສັງຄົມ ພິເສດ ແມ່ນຕໍ່ການພັດທະນາກີລາຍົກນ້ຳໜັກຄົນພິການລາວ ໃຫ້ມີອຸປະກອນການເຝິກແອບ-ເຝິກຊ້ອມ ໄດ້ມາດຕະຖານສາກົນ ເພື່ອເຂົ້າຮ່ວມການແຂ່ງຂັນກີລາໃນລະດັບສາກົນ ກໍຄືການເຂົ້າຮ່ວມງານກີລາພາຣາແລມປິກ ໂຕກຽວ ປີ 2021 ທີ່ຈະມາເຖິງນີ້ ໃຫ້ມີຜົນສຳເລັດ.
# ຂ່າວ & ພາບ: ສີພອນ