ສູນສື່ສານເພື່ອສຸຂະພາບ ແລະ ສຸຂະສຶກສາ ກະຊວງສາທາລະນະສຸກ ຈັດກອງປະຊຸມສ້າງຄວາມເຂົ້າໃຈເພີ່ມເຕີມໃຫ້ສື່ມວນຊົນ ກ່ຽວກັບການປ້ອງກັນໂຄວິດ-19 ແລະ ພະຍາດທີ່ມີການລະບາດອື່ນໆ ວັນທີ 8 ຕຸລາ ທີ່ສູນສື່ສານເພື່ອສຸຂະພາບ ແລະ ສຸຂະສຶກສາ ເປັນປະທານຂອງທ່ານ ພອນປະເສີດ ອຸນາພົມ ຫົວໜ້າກົມອະນະໄມ ແລະ ສົ່ງເສີມສຸຂະພາບ ກະຊວງສາທາລະນະສຸກ ມີຜູ້ຕາງໜ້າອົງການອະນາໄມໂລກປະຈຳລາວ ສື່ມວນຊົນ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ກອງປະຊຸມຄັ້ງນີ້ ແມ່ນແນໃສ່ເພື່ອສ້າງຄວາມເຂົ້າໃຈໃຫ້ແກ່ສື່ມວນຊົນ ກ່ຽວກັບຄວາມຄືບໜ້າການເຝົ້າລະວັງໂຄວິດ-19 ໃນສະພາບປັດຈຸປັນຂອງ ສປປ ລາວ ແລະ ເພື່ອເປັນການສົນທະນາເຖິງວິທີການ ແລະ ຂະບວນການໃນການໂຄສະນາຕໍ່ກັບສະພາບລະບາດໂຄວິດ-19 ໃນປັດຈຸບັນ ລວມທັງພະຍາດອື່ນໆທີ່ຕ້ອງເຝົ້າລະວັງ ແລະ ສຸມໃສ່ການໂຄສະນາ ເປັນຕົ້ນແມ່ນພະຍາດໄຂ້ຍຸງລາຍ ພະຍາດທີ່ມາກັບນ້ຳ ແລະ ພະຍາດທີ່ກັນໄດ້ດ້ວຍວັກຊິນ.
ກອງປະຊຸມໄດ້ດຳເນີນເປັນເວລາເຄີ່ງວັນ ບັນດາຜູ້ເຂົ້າຮ່ວມ ໄດ້ຮັບຟັງການສະເໜີ ການເຝົ້າລະວັງພະຍາດໂຄວິດ-19 ໃນສະພາບປັດຈຸບັນຂອງ ສປປ ລາວ ແນະນຳພະຍາດອື່ນໆທີ່ຕ້ອງເຝົ້າລະວັງ ແລະ ເຮັດການໂຄສະນາ ຈາກນັ້ນກໍໄດ້ມີການແລກປ່ຽນສົນທະນາເຊິ່ງກັນ ແລະ ກັນ ແນໃສ່ເພື່ອກ້າວໄປໃນການໂຄສະນາໃຫ້ສັງຄົມໄດ້ຮັບຮູ້ ແລະ ເຂົ້າໃຈວິທີການປ້ອງກັນກ່ຽວກັບພະຍາດໂຄວິດ-19 ແລະ ພະຍາດອື່ນໆ.
# ຂ່າວ & ພາບ: ບຸນມີ ສີວິໄລ