ພາຍຫຼັງທີ່ໄດ້ມີການແຂ່ງຂັນບານເຕະທີມຊາຍ (ປະເພດ 11 ຄົນ) ລາຍການຄອມມານໂດລາວລີກ 2 ລະດູການ 2020 ເມື່ອວັນທີ 25 ກໍລະກົດ 2020 ປັດຈຸບັນ ສາມາດໄດ້ 2 ສະໂມສອນຜ່ານ ເຂົ້າຊີງຊະນະເລີດເປັນທີ່ຮຽບຮ້ອຍແລ້ວ ເປັນການພົບກັນລະຫວ່າງສະໂມສອນ ເອັດທີທີ ເອັຟຊີ ແລະ ສະໂມສອນກອງທັບ ເອັຟຊີ ໂດຍນັດຊີງຊະນະເລີດ ແລະ ຊີງອັນດັບທີ 3 ຈະສືບຕໍ່ແຂ່ງຂັນວັນທີ 17 ຕຸລາ 2020 ຢູ່ສູນເຝິກບານເຕະແຫ່ງຊາດ ສະໜາມ 1 ແລະ ສະໜາມ 2 ບ້ານຫ້ວຍຫົງ ເມືອງຈັນທະບູລີ.
ການແຂ່ງຂັນລາຍການຄອມມານໂດລາວລີກ 2 ລະດູການ 2020 ນັດທີ 2 ແລະ ເປັນນັດສຸດທ້າຍຂອງຮອບ 4 ທີມ ລະຫວ່າງຄູ່ທີ 1 ເອັດທີທີ ເອັຟຊີ ພົບກັບ ເຄພີເອັດ ເອັບຊີ (ໃນນັດທີ 1 ເອັດທີທີ ອອກນຳໄປກ່ອນ 4-1 ປະຕູ) ແລະ ເມືອງຫາດ ຢູໄນເຕັດ ພົບກັບ ກອງທັບ ເອັຟຊີ (ນັດທຳອິດ ກອງທັບຊະນະດ້ວຍສະກໍ 2-1) ຈັດຂຶ້ນວັນທີ 3 ຕຸລາ 2020 ໃນນັດນີ້ຖ້າຫາກທີມໃດຊະນະໄດ້ຜ່ານເຂົ້າຊີງຊະນະເລີດ ລາຍການຄອມມານໂດລາວລີກ 2 ລະດູການ 2020 ເພື່ອຄວ້າສິດເລື່ອນຊັ້ນໄປຫຼິ້ນໃນລີກສູງສຸດຂອງລາວ ຫຼື ເປບຊີລາວລີກ 1 ໃນລະດູການໜ້າທັນທີ.
ຜ່ານການແຂ່ງຂັນຜົນປາກົດວ່າ: ເປັນໄປຕາມຄາດໝາຍເຖິງວ່າສະໂມສອນ ເອັດທີທີ ຈະພາດທ່າເສຍໃຫ້ ເຄພີເອັດ 2-0 ປະຕູ ກໍຕາມ ແຕ່ລວມສະກໍ 2 ນັດ ເອັດທີທີ ຊະນະ 4-3 ປະຕູ ຜ່ານເຂົ້າຮອບຊີງຊະນະເລີດ ພົບກັບສະໂມສອນ ກອງທັບ ທີ່ຊະນະ ເມືອງຫາດ ຢູໄນເຕັດ 3-1 ປະຕູ ລວມຜົນ 2 ນັດ ກອງທັບ ຊະນະ 5-2 ປະຕູ ສົ່ງຜົນໃຫ້ທັນສອງສະໂມສອນດັ່ງກ່າວ ຜ່ານເຂົ້າຮອບຊີງຊະນະເລີດ ສ່ວນເມືອງຫາດ ແລະ ເຄພີເອັດ ໄປຊີງອັນດັບທີ 3 ໃນການແຂ່ງຂັນເຕະບານລາຍການຄອມມານໂດລາວລີກ 2 ລະດູການ 2020 ວັນທີ 17 ຕຸລານີ້.
ລາຍການຄອມມານໂດລາວລີກ 2 ລະດູການ 2020 ປີນີ້ມີ 14 ສະໂມສອນເຂົ້າຮ່ວມແຂ່ງຂັນ ແບ່ງອອກເປັນ 2 ກຸ່ມ ກໍຄື ກຸ່ມ A ປະກອບມີ ວຽງຈັນເຄພີເອັດ ກອງທັບກາຣູດາ 369 ເຮັດບີທີ 941 ແຄນລາວ ແລະ ນະຄອນຫຼວງ ສ່ວນກຸ່ມ B ເມືອງຫາດ ວິທະຍາໄລລາວ-ທ໋ອບ ວິທະຍາໄລເຄວສ ບີແກນ ເອັດທີທີ ທຣີນີຕີ ແລະ ເອັດຊີອີ ການແຂ່ງຂັນ ແຕ່ລະກຸ່ມແຂ່ງຂັນແບບພົບກັນໝົດ ຄັດເລືອກເອົາທີມທີ່ມີຄະແນນດີທີ່ສຸດອັນດັບທີ 1-2 ຜ່ານເຂົ້າໄປຫຼິ້ນໃນຮອບ 4 ທີມສຸດທ້າຍ ຈາກນັ້ນ ໃນຮອບຮອງຊະນະເລີດກໍມາແຂ່ງຂັນ 2 ນັດໄປ-ກັບ ສ່ວນການແຂ່ງຂັນຊີງອັນດັບທີ 3 ແລະ ຊີງຊະນະເລີດແຂ່ງຂັນແບບນັດດຽວ.