ອຸນຫະພູມຂອງໂລກທີ່ເພີ່ມສູງຂຶ້ນທຸກຂະນະ ອາກາດຮ້ອນຫຼາຍຂຶ້ນ ກໍ່ໃຫ້ເກີດສະພາວະໂລກຮ້ອນ ສົ່ງຜົນກະທົບຫຼາຍສິ່ງຫຼາຍຢ່າງ ຜົນກະທົບທີ່ສຳຄັນກໍແມ່ນລະບົບນິເວດວິທະຍາ ການລະເຫີຍຂອງນ້ຳທະເລ ມະຫາສະໝຸດ ແມ່ນ້ຳລຳທານ ເພີ່ມທະວີຂຶ້ນຈົນສົ່ງຜົນໃຫ້ມີຝົນຕົກເພີ່ມຫຼາຍຂຶ້ນ ແຕ່ຢູ່ພຽງບາງເຂດບໍລິເວນເທົ່ານັ້ນ ແລະ ກໍ່ໃຫ້ເກີດບັນຫາອຸທົກກະໄພ ສ່ວນເຂດບໍລິເວນທີ່ຝົນບໍ່ຕົກ ຈະກໍ່ໃຫ້ເກີດບັນຫາໄພແລ້ງ ເຊິ່ງຈະເຊື່ອມໂຍງຕໍ່ໄປຍັງບັນຫາຄວາມໝັ້ນຄົງທາງດ້ານລະບົບສັງຄົມ ແລະ ເສດຖະກິດ ຜົນກະທົບຕໍ່ຜົນຜະລິດທາງດ້ານກະສິກຳ ຈາກສະພາບດິນຟ້າອາກາດທີ່ປັ່ນປ່ວນຜັນແປ ການຂາດແຄນສະບຽງອາຫານ ແລະ ນ້ຳຈາກໄພທຳມະຊາດ ເກີດສະພາວະການເສຍສົມດຸນຕາມທຳມະຊາດ ລວມທັງສຸຂາພະລານາໄມທີ່ເກີດຈາກໂລກລະບາດຮຸນແຮງ ຫຼື ອາດເຮັດໃຫ້ເກີດການກາຍພັນ ຫຼື ເກີດຄວາມຜິດປົກກະຕິໃນຮຸ່ນລູກ-ຫຼານຂຶ້ນ.
ເມື່ອຫວນຄືນເບິ່ງ ຢ້ອນກັບໄປເຖິງສາເຫດຂອງບັນຫາພາວະໂລກຮ້ອນ ກໍຈະພົບເຫັນວ່າ ເກີດຈາກການເຜົາຜານເຊື້ອເພີງ ເພື່ອຜະລິດພະລັງງານ ແລະ ປ່ອຍກາຊຄາຣບອນໄດອັອກໄຊ ເຂົ້າສູ່ຊັ້ນບັນຍາກາດ ກໍ່ໃຫ້ເກີດສະພາວະເຮືອນແກ້ວ ເຊິ່ງເປັນເຫດໃຫ້ເກີດພາວະໂລກຮ້ອນຂຶ້ນ ດັ່ງນັ້ນ ການແກ້ບັນຫານັ້ນ ແມ່ນການຫຼຸດການປ່ອຍກາຊຄາຣບອນໄດອັອກໄຊ ເຂົ້າສູ່ຊັ້ນບັນຍາກາດ ຫຼື ການປະຫຍັດການໃຊ້ພະລັງງານໃນຮູບແບບຕ່າງໆລົງ.
ພາວະໂລກຮ້ອນໃນປັດຈຸບັນ ເປັນບັນຫາສຳຄັນທີ່ມະນຸດຊາດທຸກຊີວິດຕ້ອງຮັບຮູ້ ແລະ ເຂົ້າໃຈ ແລະ ຮ່ວມມືຮ່ວມໃຈກັນຫາວິທີປ້ອງກັນ ແລະ ແກ້ໄຂ ຖ້າບໍ່ດັ່ງນັ້ນ ພວກເຮົາຈະໄດ້ຮັບໄພອັນຕະລາຍຮ້າຍແຮງທີ່ບໍ່ເພິ່ງປາຖະໜາຢາກພົບເຫັນຕາມມາ ເຊັ່ນ: ລະດັບນ້ຳທະເລທີ່ສູງຂຶ້ນ ຈົນກືນກິນພື້ນທີ່ຝັ່ງຂອງໂລກ ແຜ່ນນ້ຳກ້ອນຂວ້າໂລກເໜືອລະລາຍ ເກີດຄວາມແຫ້ງແລ້ງ ເກີດໄຟໄໝ້ປ່ານັບມື້ນັບຫຼາຍຂຶ້ນ ໂດຍມີການຄາດຄະເນໄວ້ວ່າ ສິ່ງທີ່ມີຊີວິດຫຼາຍລ້ານປີຈະດັບສູນເຊື້ອພັນພາຍໃນ ປີ 2050.
ຕາມທັດສະນະຂອງຜູ້ຂຽນ ເຊິ່ງຜ່ານການສຶກສາຄົ້ນຄວ້າຈາກສະຖາບັນວິທະຍາສາດດ້ານສິ່ງແວດລ້ອມ ທີ່ເມືອງຄີວຊູ ປະເທດຍີ່ປຸ່ນ ການແກ້ໄຂບັນຫາພາວະໂລກຮ້ອນ ຕ້ອງສ້າງລະບຽບ ແລະ ວາງມາດຖານທີ່ໝັ້ນຄົງຢ່າງເປັນລະບົບ ໂດຍເລີ່ມຈາກການປູກຝັງຄ່ານິຍົມການປະຫຍັດພະລັງງານໃນລະດັບເຍົາວະຊົນ ເຊິ່ງຖືເປັນພື້ນຖານທີ່ສຳຄັນທີ່ສຸດໃນລະບົບສັງຄົມ ໂດຍການອະທິບາຍຊີ້ແຈງ ແລະ ໃຫ້ຄວາມຮູ້ເຖິງສາເຫດ ແລະ ຜົນກະທົບຈາກພາວະໂລກຮ້ອນ ລວມທັງວິທີການປ້ອງກັນ ແລະ ແກ້ໄຂບັນຫາໃນເຊີງຮູບປະທຳ ຈາກນັ້ນ ກໍຂະຫຍາຍໄປສູ່ສະຖາບັນຄອບຄົວ ແລະ ສຸດທ້າຍ ສູ່ລະບົບສັງຄົມທົ່ວໄປທີ່ມີຂະໜາດກວ້າງຂວາງ.
ໂດຍ: ຄົນເດີມ