ການຈັດຕັ້ງປະຕິບັດຄາດໝາຍສູ້ຊົນຂອງມະຕິກອງປະຊຸມໃຫຍ່ຄັ້ງທີ VI ຂອງອົງຄະນະພັກນະຄອນຫຼວງວຽງຈັນ (ນວ) ໃນ 5 ປີຜ່ານມາສາມາດບັນລຸໄດ້ຜົນສຳເລັດຫຼາຍດ້ານ ໂດຍສະເພາະ ການຮັບປະກັນໃຫ້ ນວ ມີສະຖຽນລະພາບທາງດ້ານການເມືອງ ມີຄວາມສະຫງົບປອດໄພ ແລະ ເປັນລະບຽບຮຽບຮ້ອຍທາງສັງຄົມຢ່າງໜັກແໜ້ນ ໄດ້ຮັບການຈັດຕັ້ງຜັນຂະຫຍາຍ ແລະ ບັນລຸຜົນສຳເລັດໂດຍພື້ນຖານ.
ສະຫາຍ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ ເລຂາຄະນະພັກ ເຈົ້າຄອງ ນວ ໃຫ້ສຳພາດຕໍ່ສື່ມວນຊົນວັນທີ 22 ກັນຍາ 2020 ວ່າ: ຄືທີ່ພວກເຮົາຮູ້ນຳກັນໃນກອງປະຊຸມໃຫຍ່ຄັ້ງທີ VI ຂອງອົງຄະນະພັກ ນວ ເດືອນສິງຫາ 2015 ຜູ້ແທນໄດ້ຮັບຮອງເອົາມະຕິສຳຄັນໃນການພັດທະນາ ນວ ຢ່າງຮອບດ້ານ ໃນນັ້ນ ໄດ້ເນັ້ນໜັກ 6 ວິໄສທັດຮອດປີ 2030 ເນັ້ນ 6 ຍຸດທະສາດຮອດປີ 2025 ເນັ້ນ 6 ໂຄງການບຸກທະລຸ 22 ໂຄງການໃຫຍ່ລະດັບຊາດ 18 ຄາດໝາຍໃຫຍ່ 8 ໜ້າທີ່ພື້ນຖານຮອດປີ 2020 ແລະ ບັນຫາສຳຄັນອື່ນໆຈຳນວນໜຶ່ງ.
ຜ່ານການຈັດຕັ້ງປະຕິບັດຕົວຈິງຈາກມະຕິຄືດັ່ງກ່າວ ຄະນະພັກ-ອົງການປົກຄອງ ນວ ລວມທັງສະພາປະຊາຊົນ ແລະ ພະນັກງານ ສະມາຊິກພັກ ຕະຫຼອດຮອດປະຊາຊົນຊາວ ນວ ໄດ້ພ້ອມກັນເອົາໃຈໃສ່ຈັດຕັ້ງຜັນຂະຫຍາຍຢ່າງຕັ້ງໜ້າ ແລະ ເອົາການເອົາງານ ມາຮອດປັດຈຸບັນ ເຫັນວ່າທຸກນະໂຍບາຍ ແຜນງານ ໂຄງການ ແລະ ຄາດໝາຍ ລ້ວນແຕ່ໄດ້ຮັບການຈັດຕັ້ງປະຕິບັດ ແລະ ບັນລຸຜົນສຳເລັດໂດຍພື້ນຖານ ເວົ້າສະເພາະຄາດໝາຍຮັບປະກັນໃຫ້ ນວ ມີສະຖຽນລະພາບທາງດ້ານການເມືອງ ມີຄວາມສະຫງົບປອດໄພ ແລະ ມີຄວາມເປັນລະບຽບຮຽບຮ້ອຍທາງດ້ານສັງຄົມຢ່າງໜັກແໜ້ນນັ້ນ ຄະນະພັກ-ອົງການປົກຄອງໄດ້ຍືດຖືເປັນວຽກງານບູລິມະສິດ ແລະ ນຳພາຈັດຕັ້ງປະຕິບັດຢ່າງເປັນປະຈຳວັນ ແລະ ລົງຮອດຮາກຖານ ໂດຍໄດ້ປະຕິບັດຢ່າງເຂັ້ມງວດພໍສົມຄວນ ຕາມແຜນນະໂຍບາຍ ກົດໝາຍປ້ອງກັນຊາດ-ປ້ອງກັນຄວາມສະຫງົບ ທັງໄດ້ເພີ່ມເຕີມນິຕິກຳຂັ້ນທ້ອງຖິ່ນເຊັ່ນ: ຂໍ້ຕົກລົງວ່າດ້ວຍເປົ້າໝາຍສ້າງ ນວ ສະຫງົບສຸກໃນໄລຍະໃໝ່ ມີ 5 ເປົ້າໝາຍ 24 ຕົວຊີ້ວັດ ຂໍ້ຕົກລົງວ່າດ້ວຍມາດຕະການຫຼຸດຜ່ອນອຸບັດເຫດ ແລະ ການຮັກສາຄວາມປອດໄພຕາມທ້ອງຖະໜົນທົ່ວ ນວ ມີ 6 ເປົ້າໝາຍ ແລະ 5 ມາດຕະການ ຄຳສັ່ງວ່າດ້ວຍການເປີດຂະບວນການແຂ່ງຂັນຮັກຊາດ ແລະ ພັດທະນາ ຕິດພັນກັບຮັກ ແລະ ຮ່ວມໃຈກັນພັດທະນາ ນວ ເປັນຕົ້ນ ຂະບວນ 3 ຫຼຸດ 3 ເພີ່ມ ມະຕິວ່າດ້ວຍການຫັນສະມາຊິກພັກ ພະນັກງານ-ລັດຖະກອນ ລົງຮາກຖານກັບທີ່ຢູ່ບ້ານຂອງຕົນ ເພື່ອຊ່ວຍໜູນ ແລະ ເພີ່ມຄວາມເຂັ້ມແຂງໃຫ້ໜ່ວຍພັກ ແລະ ອົງການປົກຄອງບ້ານ ໃນການສ້າງສາພັດທະນາບ້ານຕາມ 4 ເນື້ອໃນ 4 ຄາດໝາຍ ຕາມມະຕິຂອງກົມການເມືອງສູນກາງພັກກຳນົດໄວ້ໃນພາກປະບັດຕົວຈິງ ນວ ໄດ້ຈັດຕັ້ງກຳລັງສະກັດກັ້ນ ແລະ ແກ້ໄຂປາກົດການຫຍໍ້ທໍ້ໃນສັງຄົມໃນແຕ່ລະ 6 ເດືອນ ແລະ ໄຕມາດຕາມດຳລັດດັ່ງກ່າວ ໃນນັ້ນ ສຸມໃສ່ແກ້ໄຂບັນຫາຢາເສບຕິດ ອາຊະຍາກຳ ແລະ ຂໍ້ຂັດແຍ່ງຄະດີຄວາມຕ່າງໆໃນສັງຄົມ ການປຸ້ນຈີ້ຊີງຊັບ ລັກຊັບ ໄພສັງຄົມ ຈັດສັນຄວາມເປັນລະບຽບຮຽບຮ້ອຍ ການລະບາຍຄວາມແອອັດ-ລົດຕິດໃນພາກເຊົ້າ-ແລງ ເອົາໃຈໃສ່ຈັດຕັ້ງເວນຍາມສຳນັກງານ ອົງການ ບ້ານ ປະຕິບັດປ້ອງກັນງານບຸນໃຫຍ່ ກອງປະຊຸມສຳຄັນ ປ້ອງກັນຄວາມສະຫງົບໃນສະພາບໂລກລະບາດໂຄວິດ-19 ຢ່າງເຂັ້ມແຂງ ແລະ ມີປະສິດທິຜົນສົມຄວນ ໄປພ້ອມໆກັບການເຄື່ອນໄຫວຕົວຈິງ ນວ ໄດ້ເອົາໃຈໃສ່ຕໍ່ການກໍ່ສ້າງຈັດວາງ ນຳໃຊ້ ບັນຊາ ກວດກາກຳລົງປະກອບອາວຸດປະຊາຊົນ ແລະ ກຳລັງປ້ອງກັນຕົວເອງຢ່າງເປັນລະບົບ ທັງໄດ້ເຝີກອົບຮົມ ຍົກລະດັບຄວາມສາມາດປ້ອງກັນພື້ນທີ່ຂອງຕົນ ຈາກການເຄື່ອນໄຫວ ໄດ້ເຮັດໃຫ້ພື້ນທີ່ ນວ ມີສະຖຽນລະພາບທາງການເມືອງໜັກແໜ້ນ ມີຄວມສະຫງົບປອດໄພ ແລະ ມີຄວາມເປັນລະບຽບຮຽບຮ້ອຍໃນສັງຄົມ ປະຊາຊົນມີຄວາມຢູ່ເຢັນເປັນສຸກ ທັງເປັນການອຳນວຍສະດວກໃຫ້ແກ່ການສ້າງສາພັດທະນາປະເທດຊາດໄດ້ຢ່າງເຂັ້ມແຂງ.
ສຳລັບການຈັດຕັ້ງປະຕິບັດຄາດໝາຍສູ້ຊົນ ເຮັດໃຫ້ຍອດຜະລິດຕະພັນພາຍໃນ (GDP) ເພີ່ມຂຶ້ນສະເລ່ຍ 11% ຕໍ່ປີ ໂຄງປະກອບເສດຖະກິດຫັນປ່ຽນຕາມກົນໄກເສດຖະກິດຕະຫຼາດ ແລະ ໃຫ້ບັນລຸຄາດໝາຍກົນໄກເສດຖະກິດຕະຫຼາດ ແລະ ໃຫ້ບັນລຸຄາດໝາຍດ້ານກະສິກຳເພີ່ມຂຶ້ນ 7% ກວມເອົາ 14% ຂອງ GDP ອຸດສາຫະກຳ ເພີ່ມຂຶ້ນ 16% ກວມເອົາ 49% ຂອງ GDP ແລະ ດ້ານການບໍລິການເພີ່ມຂຶ້ນ 11% ກວມເອົາ 37% ຂອງ GDP ຕໍ່ຄາດໝາຍນີ້ ການປະຕິບັດເຫັນວ່າໃນ 2 ປີທຳອິດ ສາມາດບັນລຸໄດ້ ແຕ່ໄລຍະ 3 ປີສຸດທ້າຍຍັງບໍ່ສາມາດບັນລຸໄດ້ແຜນການ ອັນເນື່ອງມາຈາກໄດ້ຮັບຜົນກະທົບຂອງສະພາບເສດຖະກິດໂລກຖົດຖອຍ ແລະ ພາຍໃນປະເທດຫຍຸ້ງຍາກ ເກີດມີໄພນ້ຳຖ້ວມປີ 2018 ແລະ ປີ 2020 ເກີດພະຍາດໂຄວິດ-19 ເຮັດໃຫ້ຈັງຫວະການເຕີບໂຕຂອງເສດຖະກິດ ນວ ກໍຄືປະເທດເຮົາຫຼຸດລົງຫຼາຍເທົ່າຕົວ ເຊິ່ງລວມຍອດຜະລິດຕະພັນພາຍໃນຂອງ ນວ ປີ 2020 ບັນລຸໄດ້ 52.509,67 ຕື້ກີບ ເທົ່າກັບ 6,32% ຂອງ GDP ສະເລ່ຍລາຍຮັບຕໍ່ຫົວຄົນ 54 ລ້ານກີບຕໍ່ປີ.
ການປະຕິບັດຄາດໝາຍແກ້ໄຂຄວາມທຸກຍາກ ໂດຍສະເພາະການລືບລ້າງຄວາມທຸກຍາກຂັ້ນຄອບຄົວຂອງປະຊາຊົນຢູ່ ນວ ໄດ້ສຳເລັດໂດຍພື້ນຖານມາແຕ່ປີ 2015 ປັດຈຸບັນໄດ້ມີການປະເມີນຜົນຄວາມທຸກຍາກຄືນໃໝ່ ຕາມດຳລັດ 384/ນຍ ເຫັນວ່າຍັງມີຄວາມທຸກຍາກຢູ່ເລັກນ້ອຍ ໂດຍສະເພາະຄວາມທຸກຍາກສ່ວນບຸກຄົນ ເປັນຕົ້ນຜູ້ມີລາຍຮັບບໍ່ເຖິງ 20 ໂດລາຕໍ່ຄົນຕໍ່ວັນ ດ້ານການປະຕິບັດເປົ້າໝາຍຍຸດທະສາດຫຼຸດພົ້ນອອກຈາກນະຄອນດ້ອຍພັດທະນາ ໂດຍສະເພາະ ຕົວຊີ້ວັດທາງດ້ານພື້ນຖານໂຄງລ່າງ ເສັ້ນທາງ ມີຄວາມຫຍຸ້ງຍາກ ປັດຈຸບັນ ບັນລຸໄດ້ພຽງແຕ່ 50% ຫຼື ປະມານ 300 ບ້ານ ເຊິ່ງບັນຫາອັນໜັກໜ່ວງໃນເວລານີ້ ຍັງມີສະພາບໜີ້ສາທາລະນະອັນເກີດຈາກຄວາມຕ້ອງການເພື່ອກໍ່ສ້າງ ຂະຫຍາຍທາງໃນຕົວເມືອງ ແລະ ຊານເມືອງແບບລົງທຶນກ່ອນ ປັດຈຸບັນ ສາມາດບັນລຸຄາດໝາຍຂອງການວາງແຜນແກ້ໄຂໄດ້ແລ້ວ 40% ສະຫັດສະວັດດ້ານການພັດທະນາ ສາມາດບັນລຸເປົ້າໝາຍໂດຍພື້ນຖານ ຍັງພຽງແຕ່ 4 ຕົວຊີ້ວັດຍ່ອຍຂອງຂະແໜງການສາທາລະນະສຸກ ແລະ ສຶກສາ ທີ່ກຳລັງສຸມໃສ່ຈັດຕັ້ງປະຕິບັດໃຫ້ບັນລຸຕາມແຜນການທີ່ວາງໄວ້.