ການສະກັດກັ້ນເພື່ອບໍ່ໃຫ້ມີການໃຊ້ຄວາມຮຸນແຮງ ການນາບຄູ່ຕໍ່ແມ່ຍິງນັ້ນ ແມ່ນໜຶ່ງໃນບັນດາມາດຕະການເພື່ອບັນລຸເປົ້າໝາຍຂອງບົດບາດ ຍິງ-ຊາຍ ບົນພື້ນຖານຄວາມສະ ເໝີພາບທາງດ້ານການເມືອງ ເສດຖະກິດ ແລະ ສັງຄົມ ຄໍລຳປະຈຳວັນນີ້ ຂໍສະເໜີບາງບົດຮຽນຈາກຍີ່ປຸ່ນ ອິນໂດເນເຊຍ ແລະ ໄທ ໃນການປົກປ້ອງແມ່ຍິງບໍ່ໃຫ້ຕົກເປັນເຫຍື່ອຂອງການໃຊ້ຄວາມຮຸນແຮງ ແລະ ການລວນລາມທາງເພດ.
ທີ່ຍີ່ປຸ່ນ: ໃນຕົ້ນເດືອນມີນາ 2017 ທາງການຍີ່ປຸ່ນໄດ້ຮັບຮອງເອົາຮ່າງກົດໝາຍສະບັບປັບປຸງ ກ່ຽວກັບອາຊະຍາກຳທາງເພດ ເພື່ອປ່ຽນແທນກົດໝາຍສະບັບເກົ່າທີ່ມີອາຍຸໃຊ້ງານມາແລ້ວ 110 ປີ (ໃນປີ 2017) ກົດໝາຍສະບັບປັບປຸງໄດ້ກຳນົດໂທດໜັກຂຶ້ນສຳລັບຜູ້ທີ່ກໍ່ຄະດີອາຊະຍາກຳທາງເພດ ໄປພ້ອມກັບປັບປຸງຂັ້ນຕອນການພິຈາລະນາຕັດສິນຄະດີດັ່ງກ່າວໃຫ້ງ່າຍດາຍຂຶ້ນ ໃນຊຸມປີກ່ອນໜ້ານັ້ນ ບັນດາຜູ້ທີ່ຕົກເປັນເຫຍື່ອການໃຊ້ຄວາມຮຸນແຮງທາງເພດ ແລະ ກຸ່ມຄົນທີ່ສະໜັບສະໜູນພວກເຂົາເຈົ້າ (ບັນດາເຫຍື່ອ) ໄດ້ອອກສຽງທັກທ້ວງວ່າ ກົດໝາຍສະບັບເກົ່າ ຊຶ່ງມີຜົນສັກສິດ ໃນປີ 1907 ນັ້ນລ້າສະໄໝ ແລະ ການກຳນົດໂທດຕໍ່ຜູ້ກໍ່ຄະດີທາງເພດກໍເບົາບາງໂພດ ກົດໝາຍສະບັບປັບປຸງໄດ້ກຳນົດໂທດຕ່ຳສຸດ ສຳລັບຜູ້ຂົ່ມຂືນກະທຳສຳເລົາຄົນອື່ນ ເປັນເວລາ 5 ປີ ເພີ່ມຂຶ້ນຈາກ 3 ປີ ໃນກົດໝາຍສະບັບເກົ່າ ກົດໝາຍສະບັບປັບປຸງທີ່ໄດ້ໃຫ້ຄຳນິຍາມ “ເຫຍື່ອການຂົ່ມຂືນ” ທີ່ໄດ້ກວມເອົາທັງເພດຍິງ ແລະ ຊາຍ.
ທີ່ອິນໂດເນເຊຍ: ໃນກາງເດືອນທັນວາ ປີ 2019 ທ່ານ ເອຣິກ ໂທເຮຍ (Erick Thohir) ລັດຖະມົນຕີກະຊວງລັດວິສາຫະກິດ ອິນໂດເນເຊຍໄດ້ອອກຄຳສັ່ງໃຫ້ບັນດາຫົວໜ່ວຍລັດວິສາຫະກິດໃນທົ່ວປະເທດເອົາມາດຕະການປົກປ້ອງພະນັກງານເພດຍິງຈາກການລວນລາມທາງເພດ ເຫດການທີ່ເປັນຊະນວນໃຫ້ມີຄຳສັ່ງນີ້ອອກມາກໍເພາະວ່າ ມີກໍລະນີບັນດານາງອາກາດ (ສາວໂອແຕັສ) ປະຈຳສາຍການບິນ ແຫ່ງຊາດ ກາຣູດາ (Garuda) ທີ່ເປັນບໍລິສັດ ລັດວິສາຫະກິດຖືກບັນດາເຈົ້ານາຍໃນບໍລິສັດຂູດຮີດທາງເພດ ເລື່ອງລີ້ລັບສັບຊ້ອນກ່ຽວກັບວ່າ ບັນດານາງອາກາດຖືກບັງຄັບໃຫ້ມີເພດສຳພັນກັບກຸ່ມການນຳຂອງບໍລິສັດ ໄດ້ຖືກເປີດເຜີຍຜ່ານສື່ສັງຄົມອອນລາຍ ເຫດການຄັ້ງນີ້ ໄດ້ເຮັດໃຫ້ບັນດາຫົວໜ້າຂັ້ນຄະນະອຳນວຍການຂອງບໍລິສັດ ຊື່ ເຮຮີ ອັກເຄຍ ແລະ ໂຣນີ ເອກາມີຊາ ຟົ້ງອອກຈາກຕຳແໜ່ງ ຂ່າວບອກວ່າ ທ້າວ ໂຣນີ ຄົນນີ້ລະເປັນຫົວໂປ່ໂຕການ ຊອກຫາເຫຼົ່ານາງອາກາດໄປບຳເລີ ບັນດາເຈົ້ານາຍໃນບໍລິສັດ ທ່ານລັດຖະມົນຕີກະຊວງລັດວິສາຫະກິດ ໄດ້ໃຫ້ຄຳໝັ້ນສັນຍາວ່າ ຈະບໍ່ປ່ອຍໃຫ້ພະນັກງານຍິງຕົກເປັນເຫຍື່ອກາມຈາກບັນດາເຈົ້ານາຍໜ້າຕາອຳມະ ຫິດອີກຕໍ່ໄປ.
ທີ່ປະເທດໄທ: ໃນເດືອນກັນຍາ 2019 ແຫຼ່ງຂ່າວໜັງສືພີມວຽງຈັນທາມ ໄດ້ໃຫ້ຮູ້ວ່າ: ບັນດາອົງການຈັດຕັ້ງ ກໍຄື ມູນນິທິທີ່ພົວພັນກັບສະຫວັດດີພາບຄວາມປອດໄພຂອງແມ່ຍິງ ໄດ້ຮ່ວມກັນເປີດຂະບວນການເພື່ອຊ່ວຍເຫຼືອບໍ່ໃຫ້ແມ່ຍິງ ຕົກເປັນເຫຍື່ອຂອງການໃຊ້ຄວາມຮຸນແຮງທາງເພດ ພາຍໃນນະຄອນຫຼວງກຸງເທບ ໜ້າທີ່ຕົ້ນຕໍຂອງຂະບວນການດັ່ງກ່າວ ກໍຄື ຊອກຮູ້ ແລະ ເກັບກຳຂໍ້ມູນກ່ຽວກັບເຂດ ຫຼື ສະຖານທີ່ຕ່າງໆພາຍໃນນະຄອນຫຼວງ ເຊິ່ງມີສະພາບຄວາມສ່ຽງທີ່ແມ່ຍິງຈະຖືກລວນລາມທາງເພດ ເມື່ອເກັບກຳ ແລະ ຂຶ້ນບັນຊີເຂດສ່ຽງສຳລັບແມ່ຍິງໄດ້ຄົບຖ້ວນແລ້ວ ຄະນະຈັດຕັ້ງຂະບວນການກໍໄດ້ສະເໜີຂໍ້ມູນລະອຽດໃຫ້ທາງການຈັດຕັ້ງຂອງລັດມີມາດຕະການເພື່ອແກ້ໄຂບໍ່ໃຫ້ແມ່ຍິງຕົກເປັນເຫຍື່ອຄວາມຮຸນແຮງທາງເພດໃນບັນດາເຂດສ່ຽງເຫຼົ່ານັ້ນ.