ທ່ານ ນາງ ໄຊສົມບັດ ວົງພັກດີ ຫົວໜ້າຫ້ອງການການເງິນເມືອງຈັນທະບູລີ ນະຄອນຫຼວງວຽງຈັນ ໄດ້ຂຶ້ນຜ່ານບົດສະຫຼຸບການເຄື່ອນໄຫວວຽກງານຂອງຫ້ອງການການເງິນເມືອງຈັນທະບູລີ ປະຈຳ 8 ເດືອນ ແລະ ທິດທາງ 4 ເດືອນ ປີ 2020 ໃນກອງປະຊຸມເປີດກວ້າງຄົບຄະນະບໍລິຫານງານພັກເມືອງຈັນທະບູລີ ທີ່ຈັດຂຶ້ນໃນອາທິດຜ່ານມາວ່າ: ໃນ 8 ເດືອນຜ່ານມາ ມີຈຳນວນພື້ນຖານທຸລະກິດທັງໝົດພາຍໃນເມືອງຈັນທະບູລີ 7.888 ພື້ນຖານ ໃນນັ້ນ ກົມສ່ວຍອາກອນຄຸ້ມຄອງ 132 ພື້ນຖານ ພະແນກສ່ວຍສາອາກອນ ນວ ຄຸ້ມຄອງ 1.394 ພື້ນຖານ ເມືອງຈັນທະບູລີຄຸ້ມຄອງຈຳນວນ 6.362 ພື້ນຖານ ໃນນີ້ ຂັ້ນເມືອງຄຸ້ມຄອງຈຳນວນ 5.032 ພື້ນຖານ ຂັ້ນບ້ານຄຸ້ມຄອງ 1.330 ພື້ນຖານ ແລະ ມີຈຳນວນຕອນດິນທັງໝົດ 1.920 ຕອນ ເນື້ອທີ່ 4.073.016 ຕາແມັດ ໃນນັ້ນ ເຊົ່ານຳຊັບສິນເມືອງ 208 ຕອນ ເຊົ່ານຳ ນວ 52 ຕອນ ເຊົ່ານຳກົມຊັບສິນ 29 ຕອນ ບຸກຄົນນຳໃຊ້ 982 ຕອນ ດິນຍົກເວັ້ນ 188 ຕອນ ບໍ່ມີເອກະສານນຳໃຊ້ 461 ຕອນ.
ເມືອງຈັນທະບູລີ ໄດ້ມອບໝາຍຕົວເລກລາຍຮັບຈາກ ນວ ໃຫ້ຈັດຕັ້ງປະຕິບັດແຜນການລາຍຮັບໃນປີ 2020 ແຜນເບື້ອງຕົ້ນແມ່ນ 82,82 ຕື້ກີບ ແຜນດັດແກ້ 67,72 ຕື້ກີບ ຜ່ານການຈັດຕັ້ງປະຕິບັດລາຍຮັບຕົວຈິງແຕ່ວັນທີ 1 ມັງກອນ ຫາ ວັນທີ 15 ກັນຍາ 2020 ສາມາດຈັດຕັ້ງການເກັບລາຍຮັບເຂົ້າງົບປະມານໄດ້ 43,17 ຕື້ກີບ ເທົ່າກັບ 52,12%ຂອງແຜນການປີ ແລະ ເທົ່າກັບ 63,74%ຂອງແຜນດັດແກ້ ໃນນັ້ນ ມອບໃຫ້ສ່ວຍສາອາກອນປະຕິບັດໄດ້ 42,78 ຕື້ກີບ ເທົ່າກັບ 52,83% ຂອງແຜນການປີ ເທົ່າກັບ 52,83% ຂອງແຜນການປີ ເທົ່າກັບ 63,72% ຂອງແຜນດັດແກ້ ຊັບສິນຂອງລັດປະຕິບັດໄດ້ 373,69 ລ້ານກີບ ເທົ່າກັບ 65,58%ຂອງແຜນການປີ ເຊິ່ງຕົວເລກປະຕິບັດໄດ້ 43,17 ຕື້ກີບ ທຽບໃສ່ໄລຍະດຽວກັນຂອງປີຜ່ານມາ (52,75 ຕື້ກີບ) ຫຼຸດລົງ 9,58 ຕື້ກີບ ສາເຫດທີ່ສົ່ງຜົນໃຫ້ເກັບລາຍຮັບເຂົ້າງົບປະມານບໍ່ໄດ້ຕາມແຜນການນັ້ນ ຍ້ອນໃນທ້າຍເດືອນມີນາ ຫາ ມິຖຸນາ 2020 ໃນໄລຍະດັ່ງກ່າວແມ່ນໄດ້ເກີດການແຜ່ລະບາດຂອງພະຍາດໂຄວິດ-19 ເຖິງວ່າປັດຈຸບັນລັດຖະບານຈະມີມາດຕະການຜ່ອນຜັນໃນເດືອນກໍລະກົດ 2020 ສະພາບກໍຍັງບໍ່ທັນປົກກະຕິ ໂດຍສະເພາະຜົນກະທົບທາງອ້ອມທີ່ຕິດພັນກັບຫົວໜ່ວຍຖືບັນຊີ ຂະແໜງບໍລິການ ໂດຍສະເພາະບໍລິສັດທ່ອງທ່ຽວ ກິດຈະການໂຮງແຮມ ຮ້ານອາຫານ ຂາຍປີ້ຍົນຈຳນວນໜຶ່ງຍັງເປີດຊົ່ວຄາວ ຫຼື ເປີດ ແຕ່ບໍ່ມີຜູ້ໃຊ້ບໍລິການຢ່າງເຕັມສ່ວນ ຂະແໜງການຄ້າ ເຖິງຈະເປີດ ແຕ່ການຊື້ຄ້າຍັງບໍ່ທັນຄຶກຄື້ນເທົ່າທີ່ຄວນ ແລະ ຫົວໜ່ວຍຄ່າເຊົ່າສ່ວນຫຼາຍເປັນຊາວຈີນເຊົ່າ ບໍ່ສາມາດຕໍ່ສັນຍາເຊົ່າ ເນື່ອງຈາກບໍ່ສາມາດເດີນທາງເຂົ້າ ສປປ ລາວ ໄດ້ ຍ້ອນສາເຫດດັ່ງກ່າວ ຈຶ່ງເຮັດໃຫ້ການແຈ້ງອາກອນໂດຍທົ່ວໄປມີລັກສະນະແຈ້ງຕ່ຳ ແຈ້ງສູນ ແລະ ບໍ່ມາແຈ້ງເປັນຈຳນວນຫຼາຍ ສົ່ງຜົນກະທົບໂດຍກົງຕໍ່ການເກັບລາຍຮັບຂອງເມືອງບໍ່ໄປຕາມແຜນການ.