ພິທີມອບ-ຮັບເງິນນະໂຍບາຍ ກອງທຶນເຮືອນນ້ຳໃຈ ໃຫ້ແກ່ພະນັກງານບຳນານ ເສຍອົງຄະ ແລະ ພິການທີ່ທຸກຍາກຂາດບ່ອນທີ່ເພິ່ງພາອາໄສ ຈັດຂຶ້ນວັນທີ 18 ກັນຍາ 2020 ທີ່ພະແນກແຮງງານ ແລະ ສະຫວັດດີການສັງຄົມ ນະຄອນຫຼວງວຽງຈັນ ໂດຍການມອບຂອງທ່ານ ສີຫຸນ ສິດທິລືໄຊ ຮອງເຈົ້າຄອງນະຄອນຫຼວງວຽງຈັນ ແລະ ຕາງໜ້າຮັບຈາກອົງການປົກຄອງ 4 ເມືອງ (ນາຊາຍທອງ ໄຊທານີ ສີໂຄດຕະບອງ ແລະ ເມືອງປາກງື່ມ) ມີທ່ານ ນາງ ລຳພອຍ ສີອັກຄະຈັນ ຫົວໜ້າພະແນກແຮງງານ ແລະ ສະຫວັດດີການສັງຄົມນະຄອນຫຼວງວຽງຈັນ ພ້ອມພາກສ່ວນກ່ຽວຂ້ອງເຂົ້າຮ່ວມ.
ການມອບເງິນຄັ້ງນີ້ ເພື່ອເປັນການສືບຕໍ່ຈັດຕັ້ງປະຕິບັດກອງທຶນເຮືອນນ້ຳໃຈໃຫ້ແກ່ພະນັກງານບຳນານ ພະນັກງານເສຍອົງຄະ ແລະ ພິການທີ່ທຸກຍາກ ຂາດບ່ອນເພິ່ງພາອາໄສ ໂດຍສະເພາະແມ່ນຜູ້ທີ່ໄດ້ເຄື່ອນໄຫວປະຕິວັດຢູ່ຮາກຖານການເມືອງຂອງພັກ ເພື່ອປົດປ່ອຍປະເທດຊາດ ຜູ້ທີ່ເສຍສະຫຼະເລືອດເນື້ອ ເຫື່ອແຮງ ສະຕິປັນຍາຂອງຕົນຢ່າງຕັ້ງໜ້າ ເຂົ້າໃນພາລະກິດລວມຂອງຊາດໃນໄລຍະຜ່ານມາ ເຊິ່ງປະກອບມີ 5 ທ່ານ ຍິງ 1 ທ່ານ ທີ່ຢູ່ເມືອງ ໄຊທານີ ນາຊາຍທອງ ສີໂຄດຕະບອງ ແລະ ເມືອງປາກງື່ມ ມູນຄ່າ 450.000.000 ກີບ ໃນນີ້ ປຸກສ້າງເຮືອນຫຼັງໃໝ່ 1 ຫຼັງ ມູນຄ່າ 130.000.000 ກີບ ສ້ອມແປງເຮືອນເກົ່າ 4 ຫຼັງ ມູນຄ່າຫຼັງລະ 80.000.000 ກີບ ລວມມູນຄ່າ 320.000.000 ກີບ.
