ມູນນິທິມາຣຸເບນີ ເພື່ອສົ່ງເສີມການສຶກສາຢູ່ ສປປ ລາວ (ມມສລ) ໄດ້ໃຫ້ການຊ່ວຍເຫຼືອນັກຮຽນຊົນເຜົ່າຢູ່ແຂວງສະຫວັນນະເຂດ ເປັນປີທີ 13 ເຊິ່ງໃນປີນີ້ ທາງມູນນິທິ ມາຣຸເບນີ ໄດ້ໃຫ້ການຊ່ວຍເຫຼືອເປັນອຸປະກອນການຮຽນ ແລະ ຊຸດນັກຮຽນ ໃຫ້ໂຮງຮຽນສາມັນກິນນອນຊົນເຜົ່າ ແຂວງສະຫວັນນະເຂດ ມູນຄ່າທັງໝົດ 85 ລ້ານກວ່າກີບ.
ພິທີມອບ-ຮັບເຄື່ອງຊ່ວຍເຫຼືອ ຈັດຂຶ້ນວັນທີ 17 ກັນຍາ 2020 ທີ່ນະຄອນໄກສອນ ພົມວິຫານ ໃຫ້ກຽດມອບໂດຍທ່ານ ຄາຊຸມິເນ ຄິຄຸຕະ ຄະນະບໍລິຫານງານມູນນິທິ ມາຣຸເບນີ ເພື່ອສົ່ງເສີມການສຶກສາຢູ່ ສປປ ລາວ ທັງເປັນຜູ້ຈັດການຫ້ອງການມາຣຸເບນີ ປະຈຳນະຄອນຫຼວງວຽງຈັນ ກ່າວຮັບໂດຍທ່ານ ສົມລິດ ອຸ່ນທະວີ ອຳນວຍການໂຮງຮຽນສາມັນກິນນອນຊົນເຜົ່າແຂວງສະຫວັນນະເຂດ ມີທ່ານ ຖາວອນ ອິນສີຊຽງໃໝ່ ຮອງຫົວໜ້າພະແນກສຶກສາທິການ ແລະ ກີລາແຂວງສະຫວັນນະເຂດ ມີພາກສ່ວນກ່ຽວຂ້ອງ ຄູ-ອາຈານ ແລະ ນ້ອງນັກຮຽນເຂົ້າຮ່ວມ.
ທ່ານ ຄາຊຸມິເນ ຄິຄຸຕະ ກ່າວວ່າ: ມູນນິທິມາຣຸເບນີ ເພື່ອສົ່ງເສີມການສຶກສາ ຢູ່ ສປປ ລາວ ສ້າງຕັ້ງຂຶ້ນ ໃນປີ 2008 ເນື່ອງໃນໂອກາດສະເຫຼີມສະຫຼອງວັນສ້າງຕັ້ງບໍລິສັດ ມາຣຸເບນີ ຄໍໂປ ເຣຊັນ (ຍີ່ປຸ່ນ) ຄົບຮອບ 150 ປີ ເຊິ່ງປີນີ້ເປັນປີທີ 13 ທີ່ທາງມູນນິທິມາຣຸເບນີ ໄດ້ໃຫ້ການຊ່ວຍເຫຼືອໂຮງຮຽນສາມັນກິນນອນຊົນເຜົ່າຢູ່ແຂວງສະຫວັນນະເຂດ ສຳລັບເຄື່ອງທີ່ເອົາມາຊ່ວຍເຫຼືອ ແມ່ນເຄື່ອງແບບນັກຮຽນ ໃຫ້ນັກຮຽນຈຳນວນ 420 ຄົນ ຍິງ 159 ຄົນ ແລະ ປຶ້ມຕຳລາຮຽນ ໂດຍມອບໃຫ້ໂຮງຮຽນສາມັນກິນນອນຊົນເຜົ່າ ນະຄອນໄກສອນ ພົມວິຫານ ຄິດວ່າອຸປະກອນການຮຽນເຫຼົ່ານີ້ ນ້ອງນັກຮຽນຈະນຳໃຊ້ເປັນປະໂຫຍດ ເພື່ອພັດທະນາຕົນເອງ ແລະ ສ້າງສາພັດທະນາປະເທດຊາດ ພ້ອມນີ້ ມູນນິ ທິມາຣຸເບນີ ຈະສືບຕໍ່ໃຫ້ການຊ່ວຍເຫຼືອ ແລະ ເລືອກເອົາວັດຖຸອຸປະກອນການຮຽນຕ່າງໆທີ່ມີປະໂຫຍດ ມາແຈກຢາຍໃຫ້ເຖິງມືນັກຮຽນ.