ກົມຄຸ້ມຄອງພະລັງງານ ກະຊວງພະລັງງານ ແລະ ບໍ່ແຮ່ (ພບ) ໄດ້ຈັດກອງປະຊຸມຖອດຖອນບົດຮຽນກ່ຽວກັບວຽກງານຄວາມປອດໄພຂອງເຂື່ອນໄຟຟ້າທົ່ວປະເທດຄັ້ງທີ I ຂຶ້ນວັນທີ 17-18 ກັນຍາ 2020 ຢູ່ລັດວິສາຫະກິດໄຟຟ້າລາວ ໂດຍເປັນປະທານຂອງທ່ານ ປອ ສີນາວາ ສຸພານຸວົງ ຮອງລັດຖະມົນກະຊວງ ພບ ມີທ່ານ Nicola PONTARA ຜູ້ອຳນວຍການກຸ່ມທະນາຄານໂລກ ປະຈຳລາວ ພ້ອມດ້ວຍຜູ້ຕາງໜ້າຈາກບັນດາບໍລິສັດ ໂຄງການພັດທະນາເຂື່ອນໄຟຟ້າທົ່ວປະເທດ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ປອ ສີນາວາ ສຸພານຸວົງ ກ່າວວ່າ: ປັດຈຸບັນ ການປະຕິບັດວຽກງານຄວາມປອດໄພຂອງເຂື່ອນ ແລະ ບໍລິຫານຈັດການອ່າງນ້ຳເພື່ອຄວາມປອດໄພ ມີລັກສະນະເອກະລາດ ນິຕິກຳຍັງບໍ່ພຽງພໍ ໜ່ວຍງານເຮັດວຽກສະເພາະດ້ານຄວາມປອດໄພຂອງເຂື່ອນຕ້ອງໄດ້ສ້າງຂຶ້ນຕື່ມຢ່າງເປັນລະບົບຄົບຊຸດ ບໍ່ມີສູນບັນຊານ້ຳຂັ້ນອ່າງໂຕ່ງ ແລະ ບໍ່ທັນມີສູນບັນຊານ້ຳແຫ່ງຊາດ ເຊິ່ງເປັນສາເຫດໜຶ່ງທີ່ເຮັດໃຫ້ການຄຸ້ມຄອງຄວາມປອດໄພ ແລະ ການຄຸ້ມຄອງນ້ຳຂອງເຂື່ອນໃນຊຸມປີຜ່ານມາພົບຄວາມຫຍຸ້ງຍາກຫຼາຍດ້ານ ຍ້ອນປະສົບການໃນການຄຸ້ມຄອງຄວາມປອດໄພຂອງເຂື່ອນມີຂີດຈຳກັດ ດ້ານລະບຽບການສະເພາະ ການຈັດຕັ້ງທີ່ເຮັດໜ້າທີ່ຄຸ້ມຄອງຂອງພາກລັດ ແລະ ເຈົ້າຂອງໂຄງການຍັງບໍ່ເປັນລະບົບຄົບຊຸດ ການແລກປ່ຽນຂໍ້ມູນກໍຍັງບໍ່ຕໍ່ເນື່ອງ-ກົມກຽວກັນ ການບໍລິຫານນ້ຳຂອງເຂື່ອນ ເປັນລັກສະນະໄລຍະສັ້ນ ການວາງແຜນໄລຍະຍາວບໍ່ຊັດເຈນ ການວາງແຜນຮ່ວມກັນລະຫວ່າງເຂື່ອນດ້ວຍກັນບໍ່ລະອຽດ ແລະ ອື່ນໆ ເຊີ່ງໄດ້ເປັນອຸປະສັກໃນການຄຸ້ມຄອງຄວາມປອດໄພຂອງເຂື່ອນ ການບໍລິຫານອ່າງນ້ຳຂອງບັນດາເຂື່ອນໄຟຟ້າໃນຂອງເຂດທົ່ວປະເທດ ສະນັ້ນ ຈຶ່ງເປັນສິ່ງທ້າທາຍຕໍ່ຄວາມປອດໄພ ການປ້ອງກັນນ້ຳຖ້ວມ ແລະ ປ້ອງກັນໄພແຫ້ງແລ້ງ ຕໍ່ກັບຂະແໜງການທີ່ນຳໃຊ້ນ້ຳພໍສົມຄວນ.
ດ້ວຍເຫດນີ້ພວກເຮົາໃນນາມອົງການຄຸ້ມຄອງດ້ານເຕັກນິກການພັດທະນາໂຄງການເຂື່ອນໄຟຟ້າ ຄຸ້ມຄອງອ່າງນ້ຳຂອງເຂື່ອນ ກົມຄຸ້ມຄອງພະລັງງານ ກະຊວງພະລັງງານ ແລະ ບໍ່ແຮ່ ຈຶ່ງໄດ້ຈັດກອງປະຊຸມດັ່ງກ່າວຂຶ້ນ ເພື່ອແລກປ່ຽນບົດຮຽນ ປະສົບການ ຫາວິທີທາງແກ້ໄຂຮ່ວມກັນ ເພື່ອຫຼີກລ່ຽງຜົນກະທົບທີ່ອາດຈະເກີດຂື້ນຕໍ່ສັງຄົມ ລວມທັງການກະກຽມຄວາມພ້ອມແຜນຮັບມືສຸກເສີນທຸກກໍລະນີ ເພື່ອໃຫ້ຫຼຸດຜ່ອນຄວາມສ່ຽງ ຄວາມເສຍຫາຍທາງດ້ານເສດຖະກິດ-ສັງຄົມ ແລະ ສິ່ງແວດລ້ອມ ເຮັດໃຫ້ການພັດທະນາຂະແໜງ ພບ ໃຫ້ເຕີບໃຫຍ່ຂະຫຍາຍຕົວຕາມທິດທາງຍືນຍົງ ມີຄວາມໜັ້ນຄົງ ສະອາດ ສີຂຽວ ຮັບປະກັນເຕັກນິກ ແລະ ປອດໄພຕໍ່ສິ່ງແວດລ້ອມ-ສັງຄົມ.
ປັດຈຸບັນ ລາວເຮົາມີແຫຼ່ງຜະລິດໄຟຟ້າທັງໝົດ 78 ແຫ່ງ ມີກຳລັງຕິດຕັ້ງທັງໝົດ 9.972 ເມກາວັດ ສາມາດຜະລິດພະລັງງານໄຟຟ້າໄດ້ 52.211 ລ້ານກິໂລວັດໂມງຕໍ່ປີ ມີໂຄງການໄຟຟ້າຖ່ານຫີນ 1 ແຫ່ງ ໂຄງການພະລັງງານໄຟຟ້າຊີວະມວນ 4 ແຫ່ງ ແລະ ໂຄງການໄຟຟ້າແສງຕາເວັນ 6 ແຫ່ງ ມີລະບົບສາຍສົ່ງແຮງສູງ ແຮງກາງ ແລະ ແຮງຕ່ຳ ຍາວ 65.563 ກວ່າກິໂລແມັດ ມີສະຖານີຈ່າຍໄຟຟ້າ 74 ແຫ່ງ ໄດ້ສະໜອງກະແສໄຟຟ້າເພື່ອໃຫ້ການບໍລິການຢູ່ໃນທົ່ວສັງຄົມຢູ່ໃນພາກອຸດສາຫະກຳ ກະສິກຳ ຊົນລະປະທານ ການລ້ຽງສັດ ຫັດຖະກຳ ການທ່ອງທ່ຽວ ຄົມມະນາຄົມ ຂົນສົ່ງ ແລະ ຂະແໜງການອື່ນໆ ພ້ອມນັ້ນ ສາມາດສະໜອງໄຟຟ້າຮັບໃຊ້ໄດ້ 100% ຢູ່ທຸກເທດສະບານແຂວງ ນະຄອນຫຼວງ ເທດສະບານເມືອງ ແລະ ນະຄອນ ມີບ້ານໄດ້ຊົມໃຊ້ໄຟຟ້າທົ່ວປະເທດກວມ 93% ແລະ ມີຄອບຄົວໄດ້ຊົມໃຊ້ໄຟຟ້າແບບຖາວອນແລ້ວ 95%.
ກອງປະຊຸມຄັ້ງນີ້ຜູ້ເຂົ້າຮ່ວມຍັງໄດ້ຮັບຟັງເຜີຍແຜ່ ແລະ ແລກປ່ຽນບັນດານິຕິກຳ ພາລະບົດບາດຂອງຂະແໜງການຕ່າງໆພາກລັດ ທີ່ພົວພັນກັບການຄຸ້ມຄອງຄວາມປອດໄພຂອງເຂື່ອນ ເພື່ອໃຫ້ບັນດາຜູ້ປະກອບການໄດ້ຮັບຊາບ ແລະ ໃຫ້ຄວາມຮ່ວມມືໃນການຈັດຕັ້ງປະຕິບັດ ຖອດຖອນບົດຮຽນ ຜົນການກວດກາດ້ານເຕັກນິກ ການວິໄຈ ບັນຫາຄວາມປອດໄພຂອງເຂື່ອນໃຫຍ່ 54 ໂຄງການ ແລະ ເຂື່ອນນ້ອຍ 71 ໂຄງການ ທີ່ໄດ້ຮັບການຊ່ວຍເຫຼືອດ້ານວິຊາການຈາກທະນາຄານໂລກ ແລະ ບັນດາປະເທດຄູ່ຮ່ວມພັດທະນາ ເພື່ອເປັນການແລກປ່ຽນຂໍ້ມູນຂ່າວສານຮ່ວມກັນ ໃນການດຳເນີນການຄຸ້ມຄອງຄວາມປອດໄພຂອງເຂື່ອນ ແລະ ແຜນການໃນຕໍ່ໜ້າລະຫວ່າງເຂື່ອນດ້ວຍກັນ ໂດຍສະເພາະເຂື່ອນຢູ່ອ່າງໂຕ່ງດຽວກັນ ແລະ ເຂື່ອນຜະລິດພະລັງງານເພື່ອຮັບໃຊ້ພາຍໃນ ແລະ ສົ່ງອອກຕ່າງປະເທດ ພ້ອມນັ້ນ ໄດ້ສັງເກດຕີລາຄາຈຸດດີ ຂໍ້ຄົງຄ້າງ ແລະ ຫາວິທີ ມາດຕະການແກ້ໄຂຮ່ວມກັນລະຫວ່າງພາກລັດ ແລະ ພາກລັດຜູ້ປະກອບການໃນການຄຸ້ມຄອງ ຕິດຕາມກວດກາຄວາມປອດໄພຂອງເຂື່ອນ ແລະ ບໍລິຫານຈັດການອ່າງນ້ຳໃນຕໍ່ໜ້າ ແລະ ຍາວນານໃຫ້ມີຜົນສຳເລັດຍິ່ງຂຶ້ນ.