ທ່ານນາງ ຈັນນະພາ ວົງສະໝໍລະພູມ ປະທານບໍລິສັດ ຊີເອັນພີ ສຳຫຼວດ-ຂຸດຄົ້ນບໍ່ແຮ່ ຂາອອກ-ຂາເຂົ້າ ຈຳກັດ ໃຫ້ສຳພາດວັນທີ 14 ກັນຍາ 2020 ວ່າ: ກຸ່ມບໍລິສັດ ຊີເອັນພີ (CNP) ສ້າງຕັ້ງປີ 1995 ເຊິ່ງເບື້ອງຕົ້ນ ເປັນບໍລິສັດ ຊີເອັນພີ ການຄ້າ ຂາອອກ-ຂາເຂົ້າ ຈຳກັດ ດຳເນີນກິດຈະການຂຸດຄົ້ນໄມ້ຢູ່ເຂື່ອນນ້ຳງື່ມ 1 ເພື່ອຜະລິດເຟີນີເຈີສົ່ງອອກ ກິດຈະການຂຸດຄົ້ນຖ່ານຫີນ ປີ 2000 ຮັບເໝົາກໍ່ສ້າງໂຮງງານຊີມັງວັງວຽງ ຫຼັງທີ 2 ກິດຈະການດູດຫີນ-ຊາຍ ແລະ ຂຸດຄົ້ນຫີນປູນ-ຖ່ານຫີນ ໃຫ້ໂຮງງານດັ່ງກ່າວ ແລະ ບໍລິສັດເອກະຊົນຈຳນວນໜຶ່ງ ພາຍຫຼັງດຳເນີນກິດຈະການຕ່າງໆມີຜົນສຳເລັດເປັນຢ່າງດີ ພັກ-ລັດ ກໍຄືກະຊວງພະລັງງານ ແລະ ບໍ່ແຮ່ ກໍໄດ້ໃຫ້ການສະໜັບສະໜູນ ແລະ ອະນຸຍາດໃຫ້ພວກເຮົາສ້າງຕັ້ງເປັນບໍລິສັດ ຊີເອັນພີ ສຳຫຼວດ-ຂຸດຄົ້ນບໍ່ແຮ່ ຂາອອກ-ຂາເຂົ້າ ຈຳກັດ ໃນປີ 2004 ແລະ ຂໍອະນຸຍາດດຳເນີນການສຳຫຼວດ-ຂຸດຄົ້ນບໍ່ເຫຼັກ ບໍ່ທອງແດງ ບໍ່ຊືນ ສັງກະສີ ຢູ່ເມືອງຫຼາ ແຂວງອຸດົມໄຊ ພ້ອມທັງລົງທຶນສ້າງຕັ້ງໂຮງງານປຸງແຕ່ງ ເລີ່ມແຕ່ປີ 2013 ເປັນຕົ້ນມາ ໄດ້ຂຸດຄົ້ນແຮ່ເຫຼັກສົ່ງອອກ ສປ ຈີນ 500.000 ໂຕນ ແລະ ໄດ້ຂຸດຄົ້ນ-ປຸງແຕ່ງເພື່ອກຽມສົ່ງອອກປະມານ 700.000-800.000 ໂຕນ ເນື່ອງຈາກແຮ່ດັ່ງ ກ່າວໄດ້ປຸງແຕ່ງຖືກຕ້ອງຕາມລະບຽບການ.
ປີ 2020 ໄດ້ຮັບອະນຸຍາດໃຫ້ສົ່ງອອກແຮ່ເຫຼັກ ໄປ ສປ ຈີນ 200.000 ໂຕນ ເຊິ່ງເລີ່ມສົ່ງອອກແຕ່ເດືອນກໍລະກົດເປັນຕົ້ນມາ ປັດຈຸບັນສົ່ງອອກໄດ້ແລ້ວ 50.000 ໂຕນ ເຖິງວ່າພົບຄວາມຫຍຸ້ງຍາກ ໂດຍສະເພາະຜົນກະທົບຂອງພະຍາດໂຄວິດ-19 ບໍລິສັດກໍໄດ້ພະຍາຍາມສູງ ເພື່ອໃຫ້ສາມາດສົ່ງສິນຄ້າອອກເພື່ອສ້າງລາຍຮັບເຂົ້າປະເທດ ແລະ ປະກອບສ່ວນພັນທະອາກອນໃຫ້ປະເທດຊາດ ແລະ ກຳລັງດຳເນີນສົ່ງອອກໃຫ້ຄົບຕາມຈຳນວນ ເຊິ່ງນອກຈາກສ້າງລາຍຮັບເຂົ້າປະເທດແລ້ວ ຍັງສາມາດສ້າງວຽກເຮັດງານທຳໃຫ້ປະຊາຊົນ ໂດຍກ່ອນໜ້າເກີດມີການລະບາດຂອງພະຍາດໂຄວິດ-19 ມີຊ່ຽວຊານ ພະນັກງານ-ກຳມະກອນ 500 ກວ່າຄົນ ໃນນີ້ຄົນລາວກວມເອົາ 90% ແລະ ຫຼາຍກວ່າ 70% ເປັນຄົນທ້ອງຖິ່ນທີ່ໂຮງງານຕັ້ງຢູ່ ນອກນັ້ນແມ່ນວິຊາການຄົນລາວ ແລະ ວິຊາການຕ່າງປະເທດ.
ໄລຍະຜ່ານມາ ລັດຖະບານໄດ້ມີຄຳສັ່ງໃຫ້ຢຸດດຳເນີນກິດຈະການຊົ່ວຄາວ ເພື່ອແນໃສ່ຄວບຄຸມ ແລະ ປ້ອງກັນພະຍາດໂຄວິດ-19 ເຊິ່ງໄດ້ສົ່ງຜົນກະທົບຕໍ່ການດຳເນີນທຸລະກິດຢ່າງໜັກໜ່ວງ ຢຸດກິດຈະການ ແລະ ບໍ່ມີລາຍຮັບ ແຕ່ພວກເຮົາກໍບໍ່ໄດ້ໃຫ້ພະນັກງານ-ກຳມະກອນອອກວຽກ ແຕ່ໃຫ້ເຮັດວຽກຢູ່ເຮືອນ ພ້ອມທັງໃຫ້ເງິນເດືອນ ແລະ ເງິນນະໂຍບາຍຕ່າງໆຢ່າງເຕັມສ່ວນ ສ່ວນຊ່ຽວຊານຕ່າງປະເທດ ກໍໄດ້ໃຫ້ກັບຄືນປະເທດ ແລະ ເຮັດວຽກຮ່ວມກັນແບບອອນລາຍ ນອກນີ້ ຍັງໄດ້ລົງທຶນຢ່າງຫຼວງຫຼາຍຊື້ວັດຖຸອຸປະກອນເພື່ອປ້ອງກັນພະຍາດໂຄວິດ-19 ແລະ ປະຕິບັດຕາມຄຳສັ່ງແນະນຳຂອງລັດຖະບານຢ່າງເຂັ້ມງວດ ເຮັດໃຫ້ຊ່ຽວຊານ ພະນັກງານ-ກຳມະກອນພາຍໃນບໍລິສັດປາສະຈາກພະຍາດດັ່ງກ່າວ.
ທ່ານນາງ ເພັນນະພາ ວົງສະໝໍລະພູມ ຜູ້ຈັດການບໍລິສັດ ຊີເອັນພີ ສຳຫຼວດ-ຂຸດຄົ້ນບໍ່ແຮ່ ຂາອອກ-ຂາເຂົ້າ ຈຳກັດ ກ່າວວ່າ: ຄຽງຄູ່ກັບການດຳເນີນກິດຈະກຳມີຜົນສຳເລັດ ແລະ ມີຜົນກຳໄລແລ້ວ ພວກເຮົາຍັງໄດ້ເອົາໃຈໃສ່ ແລະ ຖືສຳຄັນໃນການປະກອບສ່ວນພັນທະໃຫ້ລັດຖະບານຢ່າງຖືກຕ້ອງ ແລະ ທັນກຳນົດມາໂດຍຕະຫຼອດ ນອກນີ້ ຍັງໄດ້ປະກອບສ່ວນສ້າງໂຮງຮຽນ ວັດ ເສັ້ນທາງໃນເຂດໂຄງການ ນອກນີ້ ຍັງມີແຜນສ້າງໂຮງໝໍ ສຸກສາລາ ແລະ ອື່ນໆ ສະເພາະ 2 ເດືອນກວ່າຜ່ານມາ ທີ່ເລີ່ມມີການສົ່ງສິນຄ້າອອກ ພວກເຮົາໄດ້ປະກອບສ່ວນລາຍຮັບໃຫ້ງົບປະມານລັດ 10 ຕື້ກີບ ແລະ ໃນໄລຍະການແຜ່ລະບາດຂອງພະຍາດໂຄວິດ-19 ໄດ້ປະກອບສ່ວນດ້ານເງິນ ອາຫານ ເຄື່ອງອຸປະໂພກ-ບໍລິໂພກ ກໍຄືອຸປະກອນການແພດມູນຄ່າຫຼາຍຮ້ອຍລ້ານກີບ ສຳລັບແຜນການຕໍ່ໜ້າ ພວກເຮົາຈະສືບຕໍ່ເພີ່ມກຳລັງການຜະລິດໃຫ້ຫຼາຍຂຶ້ນ ເພື່ອຕອບສະໜອງຄວາມຕ້ອງການຂອງຕະຫຼາດ.