ພິທີລົງນາມຂໍ້ຕົກລົງຮ່ວມມືລະຫວ່າງກົມຕຳຫຼວດກວດຄົນເຂົ້າ-ອອກເມືອງ (ຕມ) ກົມໃຫຍ່ສັນຕິບານ ກະຊວງປ້ອງກັນຄວາມສະຫງົບ (ປກສ) ແລະ ອົງການຈັດຕັ້ງສາກົນເພື່ອການເຄື່ອນຍ້າຍຖິ່ນຖານ (IOM) ພາຍໃຕ້ໂຄງການກຽມຄວາມພ້ອມໃນການຮັບມືກັບຄວາມສ່ຽງຈາກໂຄວິດ-19 ຢູ່ຊາຍແດນ ແລະ ສະໜາມບິນສາກົນຢູ່ ສປປ ລາວ ຈັດຂຶ້ນວັນທີ 17 ສິງຫາ 2020 ທີ່ໂຮງແຮມລາວພລາຊາ ຮ່ວມລົງນາມໂດຍທ່ານ ພັນເອກ ສາຍສະໝິງ ສິວິໄລ ຫົວໜ້າກົມ ຕມ ກະຊວງ ປກສ ແລະ ທ່ານນາງ ຊີນ່າແວນ ແບມເມວໂຟກເນີ ຮັກສາການຫົວໜ້າຫ້ອງການອົງການ IOM ປະຈຳລາວ ມີຫົວໜ້າ ຕມ ສະໜາມບິນ ດ່ານ ແລະ ຂະແໜງການກ່ຽວຂ້ອງທັງສອງຝ່າຍເຂົ້າຮ່ວມ.
ໃນພິທີລົງນາມການຮ່ວມມືລະຫວ່າງສອງຝ່າຍ ໄດ້ສະເໜີແຜນກິດຈະກຳສ້າງຂີດຄວາມສາມາດໃຫ້ແກ່ເຈົ້າໜ້າທີ່ປະຈຳດ່ານຊາຍແດນ ແລະ ສະໜາມບິນສາກົນ ໃນການຮັບມືກັບການເດີນທາງກັບຄືນປະເທດຂອງແຮງງານ ເພື່ອຫຼຸດຜ່ອນຄວາມສ່ຽງໃນໄລຍະການແຜ່ລະບາດຂອງໂຄວິດ-19 ໂຄງການດັ່ງກ່າວຈະຈັດຕັ້ງປະຕິບັດໄລຍະ 6 ເດືອນ ນັບແຕ່ມື້ລົງລາຍເຊັນເປັນຕົ້ນໄປ ເຊິ່ງຈະຊ່ວຍໃນການພັດທະນາມາດຕະຖານຂັ້ນຕອນການດຳເນີນງານ ແລະ ຈັດເຝິກອົບຮົມເພື່ອສ້າງຂີດຄວາມອາດສາມາດໃຫ້ແກ່ເຈົ້າໜ້າທີ່ປະຈຳດ່ານຊາຍແດນ ແລະ ສະໜາມບິນສາກົນຢູ່ 10 ດ່ານ ເພື່ອກຽມຄວາມພ້ອມໃນການຮັບມືກັບໂຄວິດ-19 ຢູ່ ສປປ ລາວ ນອກຈາກນີ້ໂຄງການດັ່ງກ່າວບໍ່ພຽງແຕ່ຈະສ້າງຜົນປະໂຫຍດໃຫ້ກົມຕຳຫຼວດກວດຄົນເຂົ້າອອກ-ເມືອງເທົ່ານັ້ນ ແຕ່ຍັງສາມາດຊ່ວຍເຈົ້າໜ້າທີ່ປະຈຳດ່ານອື່ນໆ ໃນການປະຕິບັດໜ້າທີ່ດ້ວຍຄວາມປອດໄພ ພ້ອມກັນນັ້ນ ໂຄງການຍັງ ຊ່ວຍໃນການພັດທະນາຊຸດເຄື່ອງມືສື່ສານເພື່ອປ້ອງກັນການຕິດເຊື້ອສຳລັບຜູ້ເດີນທາງເຂົ້າ-ອອກ ແລະ ແຮງງານເຄື່ອນຍ້າຍເປັນຫຼາຍພາສາ ການຈັດຕັ້ງປະຕິບັດກິດຈະກຳ ຈະເນັ້ນໃສ່ໃຫ້ແທດເໝາະກັບຄວາມຈຳເປັນຈິງ ຄວາມຕ້ອງການດ້ານອຸປະກອນ ແລະ ສະຖານທີ່ດ່ານເປົ້າໝາຍເປັນຫຼັກ ເນື່ອງຈາກວ່າການເດີນທາງເຂົ້າ-ອອກຢູ່ດ່ານຊາຍແດນ ແລະ ສະໜາມບິນສາກົນ ກ່ຽວຂ້ອງກັບຫຼາຍໜ່ວຍງານ ດັ່ງນັ້ນ ລັດຖະບານຈຳເປັນຕ້ອງມີແຜນຮັບມືກັບຄວາມສ່ຽງໃນການເດີນທາງຜ່ານດ່ານໃນໄລຍະການແຜ່ລະບາດຂອງໂຄວິດ-19 ພາຍໃຕ້ທຶນສະໜັບສະໜູນຈາກລັດຖະບານປະເທດອົດສະຕຣາລີ ແລະ ກອງທຶນຮ່ວມຂອງອົງການສະຫະປະຊາຊາດເພື່ອຮັບມືກັບໂຄວິດ-19 ອົງການ IOM ຈະຮ່ວມມືກັບກະຊວງ ປກສ ກອງເລຂາສະເພາະກິດແຫ່ງຊາດໂຄວິດ-19 ອົງການ WHO ອົງການ UNODC ແລະ ກະຊວງທີ່ກ່ຽວຂ້ອງອື່ນໆ ເພື່ອສ້າງແຜນກຽມຄວາມພ້ອມໃນການຮັບມືກັບໂຄວິດ-19 ທັງນີ້ກໍເພື່ອສະໜັບສະໜູນລັດຖະບານລາວໃນການບໍລິຫານດ່ານ ຄຸ້ມຄອງແຮງງານເຄື່ອນຍ້າຍຜ່ານດ່ານ ແລະ ຊ່ວຍເຫຼືອປະຊາຊົນທີ່ມີຄວາມສ່ຽງ.
