ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ພ້ອມຄະນະ ເຄື່ອນໄຫວຢ້ຽມຢາມ ແລະ ຊຸກຍູ້ວຽກງານທ່ອງທ່ຽວຢູ່ຕາດຮ້ອຍຄົວ ເມືອງຈອມເພັດ ແຂວງຫຼວງພະບາງ ເມື່ອບໍ່ດົນມານີ້ ໂດຍໄດ້ຮັບການຕ້ອນຮັບຈາກທ່ານ ຄຳຂັນ ຈັນທະວີສຸກ ເຈົ້າແຂວງຫຼວງພະບາງ ທ່ານ ອາຄົມ ພົມມະຫານ ຜູ້ອຳນວຍການຕາດຮ້ອຍຄົວ ແລະ ພາກສ່ວນກ່ຽວຂ້ອງ.
ທ່ານ ອາຄົມ ພົມມະຫານ ໄດ້ລາຍງານວ່າ: ນ້ຳຕົກຕາດຮ້ອຍຄົວ ຕັ້ງຢູ່ບ້ານປາກຫຼຶງ ຫ່າງຈາກເທສະບານເມືອງຈອມເພັດ ປະມານ 12 ກິໂລແມັດ ເປັນນ້ຳຕົກຕາດທີ່ມີຄວາມສວຍງາມ ແລະ ມີຕາດນ້ອຍຫຼາຍຊັ້ນ ທີ່ມີນ້ຳໃສໄຫຼເຢັນຕະຫຼອດປີ ມີຄວາມສູງ 90 ແມັດ ຕົກລົງໃສ່ອ່າງເກັບນ້ຳທຳມະຊາດທີ່ສະຫວັນສ້າງມາຢ່າງສວຍງາມ ໂດຍມີເນື້ອທີ່ 20 ເຮັກຕາ ແລະ ເຕັມໄປດ້ວຍພູຜາ ປ່າໄມ້ ທີ່ໃຫ້ຄວາມສົດຊື່ນ ເຢັນສະບາຍ.
ປີ 2015 ອົງການປົກຄອງເມືອງຈອມເພັດ ໄດ້ມອບໃຫ້ບໍລິສັດສຳປະທານ ໂດຍໄດ້ປັບປຸງຫຼາຍກິດຈະກຳ ແນໃສ່ດຶງດູດເອົານັກທ່ອງທ່ຽວທັງພາຍໃນ ແລະ ຕ່າງປະເທດ ໃຫ້ເຂົ້າມາທ່ຽວຊົມຫຼາຍຂຶ້ນ ໃນນີ້ໄດ້ປັບປຸງທາງຍ່າງ ບໍລິການຮ້ານອາຫານ ສວນດອກໄມ້ ກິດຈະກຳຍ່າງປ່າ ຂີ່ສະລິງ ແລະ ອື່ນໆ.
ນັບແຕ່ທ້າຍປີ 2019 ເຖິງປັດຈຸບັນ ຍ້ອນສະພາບການລະບາດຂອງພະຍາດໂຄວິດ-19 ໄດ້ສົ່ງຜົນກະທົບຕໍ່ການທ່ອງທ່ຽວ ແລະ ເຮັດໃຫ້ແຂກທີ່ເຂົ້າມາທ່ຽວຊົມນ້ຳຕົກຕາດຮ້ອຍຄົວນັບມື້ຫຼຸດລົງ ສຳລັບແຜນການຕໍ່ໜ້າ ຈະສືບຕໍ່ປັບປຸງ ແລະ ປົກປັກຮັກສາສະຖານທີ່ທ່ອງທ່ຽວແຫຼ່ງນີ້ໃຫ້ມີຄວາມສວຍງາມ ຍືນຍົງ ແລະ ສີຂຽວ ເພື່ອດຶງດູດເອົານັກທ່ອງທ່ຽວຄົນລາວມາທ່ຽວ ຕາມແຜນທີ່ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ວາງອອກ ຄື: ລາວທ່ຽວລາວ.
ໂອກາດນີ້ ທ່ານ ສອນໄຊ ສີພັນດອນ ກໍໄດ້ເນັ້ນໃຫ້ບໍລິສັດສຳປະທານ ສືບຕໍ່ປົກປັກຮັກສາປ່າໄມ້ໃນແຫຼ່ງທ່ອງທ່ຽວຕາດຮ້ອຍຄົວໃຫ້ມີຄວາມຍືນຍົງ ປັບປຸງກິດຈະກຳໃຫ້ສອດຄ່ອງ ຮັກສາໄດ້ຄວາມສວຍງາມ ອາກາດສົດຊື່ນ ເພື່ອຮັບປະກັນເຮັດໃຫ້ການດຶງດູດເອົານັກທ່ອງທ່ຽວເຂົ້າມາທ່ຽວຊົມ ນັບມື້ຫຼາຍຂຶ້ນ.