ອຳນາດຂອງຄວາມໂລບເຮັດໃຫ້ຄົນຕາດີ ກາຍເປັນຄົນຕາບອດ ເຮັດໃຫ້ຄົນໃຈດີກາຍເປັນຄົນໃຈມືດບອດ ບໍ່ສາມາດແຍກແຍະຜິດຖືກຊົ່ວດີ ເຊັ່ນດຽວກັບຍັກກຸມພັນທີ່ເຮັດຜິດຮີດຄອງສິນທຳ ໄປລັກເອົານາງ ສຸມຸນທາ ມາເປັນເມຍທີ່ຂາດຈິດສຳນຶກ ບໍ່ເຄົາລົບກົດໝາຍຂອງບ້ານເມືອງ ເຊິ່ງສາມາດຕີຄວາມໄດ້ວ່າ ຍັກກຸມພັນໃຊ້ອຳນາດບາດໃຫຍ່ ຍາດຊິງເອົາສິ່ງທີ່ຕົນຢາກໄດ້ ເຖິງແມ່ນວ່າມັນຈະຜິດມະນຸດສະທຳ ຍັກກຸມພັນ ກໍບໍ່ຄຳນຶງເຖິງ.
ສິນໄຊ ໄດ້ໄປຕາມເອົາອາສຸມຸນທາ ຢູ່ເມືອງອະໂນລາດ ນຳຍັກກຸມພັນ ເຊິ່ງສິນໄຊພະຍາຍາມໃຊ້ ວິທີການສັນຕິວິທີເຈລະຈາ ແຕ່ຍັກກຸມພັນບໍ່ເອົາ ໃຈໃສ່ເຄົາລົບສິນທຳ ຈຶ່ງເກີດການຕໍ່ສູ້ ນຳມາເຊິ່ງ ການສູນເສຍຊີວິດ ຊັບສິນ ເພາະສົງຄາມ ຍ່ອມມີ ແຕ່ການທຳລາຍ ຍັກກຸມພັນຕາຍໄປ ສິນໄຊ ຈຶ່ງໄດ້ນຳເອົານາງ ສຸມຸນທາ ກັບເມືອງເປັງຈານ ແລະ ໄດ້ແຕ່ງຕັ້ງທ້າວ ຍັກ ວັນນຸລາ ເຊິ່ງເປັນລູກຂອງຍັກກຸມພັນຂຶ້ນເປັນຜູ້ຄອງເມືອງແທນ ແລ້ວໄດ້ອະທິບາຍເຖິງວິທີປົກຄອງບ້ານເມືອງໃຫ້ຢູ່ເປັນສຸກ ດັ່ງຈະຍົກບາງປະເດັນລຸ່ມນີ້:
ສິນໄຊ ໄດ້ກ່າວຖາມຍັກ ວັນນຸລາ ວ່າ: ໂຕເອງເປັນ ຜູ້ໃຫຍ່ ປຽບດັ່ງຂື່ຂາງເມືອງ ເປັນຫຍັງຈຶ່ງວາງເສີຍ ບໍ່ເຂົ້າຫ້າມປາມເຈລະຈາໄກ່ເກ່ຍ ເຊິ່ງບໍ່ສົມກັບເປັນຜູ້ໃຫຍ່.
ສິນໄຊ ໄດ້ຍົກເອົາສິນ 5 ແລະ ອະລິຍະມັກຄື ທຳທັງ 8 ເປັນຫຼັກມາສອນໃຫ້ພວກຍັກທີ່ມືດບອດ ບໍ່ຮູ້ເຄົາລົບສິນທຳຮີດຄອງ ສິນໄຊ ໄດ້ກ່າວສອນ ວ່າ: ອັນໜຶ່ງຢ່າໄດ້ຄິດໂລບລົ້ນ ບັງບຽດແສນສັດ ເຊິ່ງຈະນຳໃຫ້ຕົກນາຮົກ ສອງ ຢ່າທຳຕົນເປັນໂຈນ ທ່ຽວລັງແກບັງບຽດຄົນອື່ນດ້ວຍອຳນາດບໍ່ທ່ຽງທຳ ສາມ ຢ່າອວດອ້າງເຕັງລາດລວງ ຂຸນ ແລະ ລະເມີດສິນ ຍາດຊິງລູກເມຍຄົນອື່ນ ທີ່ຜິດສິນທຳ ສີ່ ຢ່າເປັນຄົນເວົ້າຕົວະຍົວະຫຼອກລວງ ເວົ້າບໍ່ມີສັດຈະເວົ້າລັບລວງໝາງ ເພື່ອສ້າງປະໂຫຍດແກ່ຕົນ ໃຫ້ເວັ້ນຈາກອະບາຍຍະມຸກທັງປວງ ເພາະມີໂທດຫຼາຍປະການ ສ້າງຄວາມບໍ່ສະຫງົບແກ່ບ້ານເມືອງ.
ສິນໄຊ ສອນຍັກ ຜູ້ຂຽນພຽງຍົກເອົາບາງປະເດັນນຳສະເໜີ ພໍເປັນຕົວຢ່າງໃຫ້ສັງຄົມເກີດສະຕິ ສຶກສາໃຫ້ຮູ້ແຈ້ງວ່າ: ສິນທຳ ຄືແນວທາງປົກຄອງ ນັ້ນສຳຄັນຕໍ່ຊີວິດປະຊາຊົນ ແລະ ຄວາມຍຸຕິທຳ.