ໃນບົດປະຈຳວັນນີ້ ຜູ້ຂຽນໄດ້ສັງລວມເອົາຂ່າວກ່ຽວກັບເລື່ອງວຸ້ນວາຍທີ່ເກີດຈາກການນຳໃຊ້ສື່ສັງຄົມອອນລາຍໄປໃນທາງຜິດພາດ ຢູ່ບາງປະເທດທັງຢູ່ໃກ້ ແລະ ໄກ ດັ່ງລຸ່ມນີ້:
ສິງກະໂປ-ມາເລເຊຍ: ໃນຕົ້ນເດືອນກັນຍາ 2017 ຂ່າວໃຫຍ່ດັງໄກຈາກສິງກະໂປ ແລະ ມາເລເຊຍເລື່ອງໜຶ່ງ ກໍຄື ກ່ຽວກັບຜົນສຳເລັດຮ່ວມກັນລະຫວ່າງສອງປະເທດນີ້ໃນການເລີກຮື້ກຸ່ມແກ້ງຕົ້ມຕຸ໋ນທີ່ໃຊ້ສື່ສັງຄົມອອນລາຍ ເປັນເຄື່ອງມືຫາກິນ ກໍລະນີຕົ້ມຕຸ໋ນຂ້າມຊາຍແດນຄັ້ງນີ້ລວມມີທັງໝົດ 32 ຄະດີ 7 ຄະດີຢູ່ສິງກະໂປ ແລະ 25 ຄະດີຢູ່ມາເລເຊຍເງິນທີ່ຖືກເສຍຫາຍຈາກຄະດີເຫຼົ່ານີ້ລວມມີຈຳນວນ 245.000 ໂດລາສິງກະໂປ ເປົ້າໝາຍຕົ້ມຕຸ໋ນຂອງກຸ່ມແກ້ງກໍຄື ຄົນໃນສອງປະເທດນີ້ ຮູບການເຄື່ອນໄຫວຫາກິນແບບຜິດກົດໝາຍຂອງໂຈນທາງອິນເຕີເນັດນັ້ນ ກໍຄື ກ່ອນອື່ນໝົດພວກເຂົາຈະສ້າງສາຍສຳພັນ ລຶ້ງແກວ່ນຮັກແພງກັບບັນດາເປົ້າໝາຍທີ່ເປັນເຫຍື່ອ ຈາກນັ້ນ ກໍປັ້ນເລື່ອງຂີ້ຕົວະນາໆປະການເຊັ່ນ ບອກວ່າ ພວກເຂົາຖືກເຈົ້າໜ້າທີ່ທາງການກັກຂັງຈຳເປັນຕ້ອງມີເງິນສຳລັບໄຖ່ຖອນ ບາງລາຍກໍຕົວະວ່າ ຕົນເປັນນັກທຸລະກິດທີ່ລ້ຳລວຍ ເປັນຄົນສັງຄົມສູງ ເມື່ອເຫຍື່ອຕາຍໃຈຫຼົງເຊື່ອແລ້ວພວກເຂົາກໍມີວິທີໃຫ້ເຫຍື່ອຈ່າຍເງິນໃຫ້ພວກເຂົາເຈົ້າ ສະມາຊິກກຸ່ມແກ້ງທີ່ຖືກຈັບກຸມຢູ່ມາເລເຊຍໃນບັ້ນເລີກຮື້ຄັ້ງນີ້ມີທັງໝົດ 11 ຄົນ ໃນນັ້ນ 10 ຄົນ ເປັນຊາວອາຟຣິກາ ສ່ວນຢູ່ສິງກະໂປນັ້ນ ຈັບໄດ້ 3 ຄົນ ຊຶ່ງເປັນຄົນສິງກະໂປ ທີ່ເຮັດໜ້າທີ່ໂອນເງິນໃຫ້ກຸ່ມແກ້ງ ນີ້ຖືວ່າເປັນຜົນສຳເລັດຄັ້ງສຳຄັນໃນການຮ່ວມມື ລະຫວ່າງກົມກິດຈະກຳການຄ້າ (CAD) ກອງກຳລັງຕຳຫຼວດສິງກະໂປ ແລະ ກຸ່ມສອບສວນອາຊະຍາກຳການຄ້າ (CCID) ຂອງກອງກຳລັງຕຳຫຼວດມາເລເຊຍ ໃນການປາບປາມກຸ່ມແກ້ງຕົ້ມຕຸ໋ນທາງອິນເຕີເນັດຄັ້ງນີ້.
ທີ່ອີຣັກ: ນີ້ກໍເປັນຂ່າວກ່ຽວກັບບັນຫາທີ່ເກີດຂຶ້ນ ຈາກການນຳໃຊ້ສື່ສັງຄົມສະໄໝໃໝ່ເຊັ່ນກັນ ເລື່ອງມີຢູ່ວ່າ ໃນວັນທີ 17 ເມສາ 2019 ລັດຖະສະພາປະເທດອີຣັກໄດ້ຮັບຮອງເອົາກົດໝາຍສະບັບໜຶ່ງທີ່ໃຫ້ສິດລັດຖະບານ ໃນການເກືອດຫ້າມການຫຼີ້ນເກມອິນເຕີເນັດ ທີ່ຂັດຕໍ່ວັດທະນະທຳ ແລະ ຮີດຄອງປະເພນີຂອງອີຣັກ ທັງເປັນຊະນວນກໍ່ໃຫ້ມີການໃຊ້ຄວາມຮຸນແຮງການເສຍທາດຂາດຄຸນຂອງຊາວໜຸ່ມ ເຍົາວະຊົນ ເຮັດໃຫ້ພວກເຂົາບໍ່ເອົາໃຈໃສ່ຕໍ່ການຮຽນ ຍ້ອນຕິດເກມຢ່າງງອມແງມ ເກມທີ່ກົດໝາຍກຳນົດຫ້າມນັ້ນໄດ້ແກ່ເກມ “ຟອດໄນບະລູແວວ” ຫຼື PUBG ວ່າກັນວ່າ ເກມ PUBG ນີ້ໄດ້ເຮັດໃຫ້ເກີດກໍລະນີຢ່າຮ້າງຫຼາຍຂຶ້ນໃນອີຣັກ.