ພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວ ນະຄອນຫຼວງວຽງຈັນ (ຖວທ ນວ) ສົມທັບກັບແນວລາວສ້າງຊາດ ນວ ອົງການປົກຄອງເມືອງໄຊເສດຖາ ນວ ແລະ ຫ້ອງການອົງການພຸດທະສາສະໜາສຳພັນລາວ ຈັດສາມະນາວິທະຍາສາດເພື່ອລະດົມແນວຄວາມຄິດໃນການຈັດງານບຸນນະມັດສະການພະທາດຫຼວງວຽງຈັນ ປະຈຳປີ 2020 ຂຶ້ນວັນທີ 12 ກັນຍາ 2020 ທີ່ຫໍທຳມະສະພາ ເປັນປະທານຂອງທ່ານນາງ ວິໄລວອນ ຈັນທະລາຕີ ຫົວໜ້າພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວ ມີພະເຖລານຸເຖລະ ທ່ານ ຖະໜອມ ທຳທອງ ປະທານແນວລາວສ້າງຊາດ ນວ ພ້ອມດ້ວຍຜູ້ປະກອບການ ເຖົ້າແກ່ແນວໂຮມ ອຳນາດການປົກຄອງບ້ານ ແລະ ຂະແໜງການກ່ຽວຂ້ອງເຂົ້າຮ່ວມ.
ໂດຍອີງຕາມທິດຊີ້ນຳຂອງອົງການປົກຄອງນະຄອນຫຼວງວຽງຈັນ ທີ່ໄດ້ຊີ້ນຳໃຫ້ພະແນກ ຖວທ ນວ ສົມທັບກັບພາກສ່ວນກ່ຽວຂ້ອງ ຈັດສຳມະນາວິທະຍາສາດຄັ້ງນີ້ ເພື່ອເປັນການຍາດແຍ່ງເອົາທັດສະນະ ຄວາມຄິດເຫັນຈາກຄູບາອາຈານ ນັກວິຊາການ ຜູ້ຊົງຄຸນວຸດທິ ແລະ ພາກສ່ວນຕ່າງໆຂອງສັງຄົມ ຕໍ່ກັບການຈັດງານບຸນພະທາດຫຼວງວຽງຈັນປີ 2020 ເພື່ອໃຫ້ມີຄວາມຮັບປະກັນ ບັນລຸຕາມຈຸດປະສົງ ແລະ ຄາດໝາຍ ຄື: ຮັກສາໄດ້ມູນເຊື້ອ ຮີດຄອງປະເພນີ ວັດທະນະທຳອັນດີງາມຂອງຊາດ ຂອງປະຊາຊົນລາວບັນດາເຜົ່າ ເຕົ້າໂຮມໄດ້ຄວາມສາມັກຄີເປັນປຶກແຜ່ນ ຍູ້ແຮງຂະບວນການຜະລິດເປັນສິນຄ້າ ແລະ ຖືເອົາໂອກາດບຸນນະມັດສະການພະທາດຫຼວງປີນີ້ ເປັນການຟື້ນຟູ ຊຸກຍູ້ການບໍລິການ ການທ່ອງທ່ຽວພາຍໃນ ແຕ່ຕ້ອງຮັບປະກັນໄດ້ມາດຕະການປ້ອງກັນພະຍາດໂຄວິດ-19.
