ຄິດກ່ອນຊື້ ຫຼື ບາງຄົນຊື້ກ່ອນຄິດ ຊີວິດອາດ ຜິດຫວັງເພາະບໍ່ໄດ້ສຶກສາຂໍ້ມູນໃນສິ່ງຂອງທີ່ຕົນ ຢາກໄດ້ແຕ່ຖ້າຄິດກ່ອນຊື້ ໂດຍພິຈາລະນາລະອຽດ-ສຶກສາຂໍ້ມູນວ່າ ສິ່ງທີ່ເຮົາຈະຈ່າຍເງິນຊື້ນັ້ນ ມັນມີຄຸນນະພາບດີແທ້ພຽງໃດ ບໍ່ແມ່ນເຊື່ອງ່າຍ ໃຈເບົາ ຕາມທີ່ເຂົາໂຄສະນາ ເຊັ່ນ: ຢາບາງຊະນິດ ສາມາດປິ່ນປົວໄດ້ຫຼາຍພະຍາດ ເຊິ່ງຢ່າລືມວ່າ ຫຼາຍສິນຄ້າທີ່ເຂົາໂຄສະນາຂາຍທາງອອນລາຍ ບໍ່ຜ່ານການຈັດຕັ້ງອາຫານ ແລະ ຢາ.
ເຕັກນິກການຕະຫຼາດ ວິທີໂຄສະນາຊວນເຊື່ອຂອງພວກລວງໂລກນັ້ນ ເຂົາຈະສະຫຼາດໃຊ້ສື່ເປັນເຄື່ອງມືເປົ່າຫູ ແລະ ສ້າງສິນຄ້າໃຫ້ມີຮູບລັກສວຍງາມ ໂຄສະນາເກີນຈິງ ເກີນຄຸນນະພາບ ແລະ ສັບພະຄຸນຂອງສິນຄ້າ ເຊິ່ງບໍ່ຕ່າງຫຍັງກັບນັກວິຊາການບາງຄົນ ທີ່ຢາກດັງອາໄສໂຄສະນາສ້າງພາບພົດເກີນຄຸນນະພາບທີ່ຕົນມີ ຫຼື ຈະທຽບໃສ່ສາວົກບາງຄົນໃນພຸດທະສາສະໜາ ກໍປຽບໄດ້ກັບພວກອວດລິດເດດ ຫຼື ເວົ້າເກີນຄວາມເປັນຈິງ ເພື່ອໃຫ້ຄົນສັດທາ ເຊື່ອແລ້ວຈົກຖົງບໍລິຈາກທານ.
ຜູ້ຂຽນຍົກຕົວຢ່າງ: ຄີມທາໜ້າຂາວ ຫຼື ອາຫານເສີມ ຫຼຸດຄວາມອ້ວນ ຫຼຸດໄຂມັນ ເຊິ່ງຄວາມຈິງຕາມແພດຜູ້ຊຽວຊານແນະນຳວ່າ ວິທີຫຼຸດໄຂມັນທີ່ດີທີ່ສຸດ ກໍຄື ບໍລິໂພກອາຫານໃຫ້ຖືກຫຼັກໂພຊະນາການ ແລະ ໃຫ້ອອກກຳລັງກາຍເປັນປະຈຳ ການອອກກຳລັງກາຍຈຶ່ງເປັນວິທີຮັບປະກັນໃຫ້ສຸຂະພາບດີ ແລະ ແຂງແຮງ ພາໃຫ້ອາລົມດີ ແລະ ສົ່ງຜົນຕໍ່ການເຮັດວຽກໄດ້ດີຂຶ້ນກວ່າຜູ້ທີ່ກິນຫຼາຍເກີນຄວາມຈຳເປັນຂອງຮ່າງກາຍ ຈະພາໃຫ້ເກີດສ່ວນເກີນຂອງຮ່າງກາຍທີ່ບໍ່ຈຳເປັນ ເວລາໄປການກໍມີແຕ່ຫາວນອນ ການເຄື່ອນໄຫວກໍຊ້າ ເຮັດໃຫ້ສັກກະຍະພາບຮ່າງກາຍຫຼຸດລົງ ບັນຫາສ່ວນໃຫຍ່ ກໍມາຈາກອິດທິພົນຂອງບໍລິໂພກນິຍົມທີ່ຫຼາຍຄົນບໍ່ຮູ້ສຶກໂຕ.
ການຄິດກ່ອນຊື້ ຈຶ່ງເປັນວິທີສ້າງສະຕິໃຫ້ເຮົາໄດ້ ລະວັງກ່ອນຈົກຖົງຈ່າຍເງິນຊື້ອາຫານ ຫຼື ສິນຄ້າມາບໍລິໂພກ ຫຼື ນຸ່ງຖື ຢ່າລືມວ່າ ລັດຖະບານໄດ້ເນັ້ນໃຫ້ສັງຄົມ ມີສະຕິ ປະຢັດ ບໍ່ຟຸມເຟືອຍ ການປະຢັດ ຄືທາງທີ່ມີກຽດ ຫຼີກລ່ຽງການໂຊອວດເຄື່ອງໃຊ້ ເຄື່ອງນຸ່ງຂອງຄົນບາງກຸ່ມ ພາກັນສ້າງຄ່ານິຍົມ ຕາມບໍລິໂພກນິຍົມບູຮານສອນວ່າ: “…ເຫັນຊ້າງຂີ້ ຢ່າຂີ້ຕາມຊ້າງ…”.
ໂດຍ: ດັ້ນກີບເມກ