ສະມາຄົມນັກຂ່າວແຫ່ງ ສປປ ລາວ ຈັດກອງປະຊຸມຄົ້ນຄວ້າທີດຊີ້ນໍາຂອງນາຍົກລັດຖະມົນຕີ ທີ່ວ່າ: ສື່ມວນຊົນຕ້ອງເປັນ “ຜູ້ກ້າປາກອອກແສງ ຜູ້ແທງຈິດໃຈ ຜູ້ສະດຸ້ງໄວເມື່ອອ່ານ ຜູ້ຮູ້ຜ່ານອຸປະສັກ ຜູ້ທີ່ຮັກຄວາມຈິງ ຜູ້ທີ່ຍິງຖືກເປົ້າ” ຂຶ້ນວັນທີ 10 ກັນຍາ 2020 ຢູ່ສໍານັກງານໜັງສືພິມພາສາຕ່າງປະເທດ ໂດຍເປັນປະທານຂອງທ່ານ ສະຫວັນຄອນ ຣາຊມຸນຕຣີ ຮອງລັດຖະມົນຕີກະຊວງຖະແຫຼງຂ່າວ ວັດທະນະທໍາ ແລະ ທ່ອງທ່ຽວ ປະທານສະມາຄົມນັກຂ່າວແຫ່ງ ສປປ ລາວ ມີຮອງປະທານສະມາຄົມນັກຂ່າວ ຫົວໜ້າກົມ ວິທະຍາກອນຮັບເຊີນຈາກພາກສ່ວນຕ່າງໆ ພ້ອມດ້ວຍບັນນາບັນນາທິການໂທລະພາບ ວິທະຍຸ ສື່ສິ່ງພິມ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ຈຸດປະສົງເພື່ອຄົ້ນຄວ້າ ວິເຄາະ ວິໄຈ ນິຍາມ ແລະ ຜັນຂະຫຍາຍທິດຊີ້ນຳຂອງທ່ານນາຍົກລັດຖະມົນຕີ ທີ່ວ່າ: ສື່ມວນຊົນຕ້ອງເປັນ “ຜູ້ກ້າປາກອອກແສງ ຜູ້ຮູ້ແທງຈິດໃຈ ຜູ້ສະດຸ້ງໄວເມື່ອອ່ານ ຜູ້ຮູ້ຜ່ານອຸປະສັກ ຜູ້ທີ່ຮັກຄວາມຈິງ ຜູ້ທີ່ຍິງຖືກເປົ້າ” ພ້ອມທັງຮັບຟັງການສະແດງຄວາມຄິດເຫັນຈາກພາກສ່ວນຕ່າງໆ ແລະ ເປີດໂອກາດໃຫ້ຜູ້ເຂົ້າຮ່ວມໄດ້ແລກປ່ຽນຄຳຄິດເຫັນຢ່າງກົງໄປກົງມາກ່ຽວກັບບັນຫາດັ່ງກ່າວ ເພື່ອສ້າງຄວາມເປັນເອກະພາບ ແລະ ນໍາໄປຈັດຕັ້ງປະຕິບັດຕົວຈິງຢ່າງມີປະສິດທິຜົນ.
