ທ່ານ ນາງ ຄຳ ນັດສຸລິດ ເຈົ້າຂອງຕະຫຼາດກຳແພງເມືອງ ໃຫ້ສຳພາດວັນທີ 3 ກັນຍາ 2020 ວ່າ: ຕະຫຼາດກຳແພງເມືອງ ມີສະຖານທີ່ຕັ້ງຢູ່ຖະໜົນກຳແພງເມືອງ ບ້ານໜອງໄຮ ເມືອງຫາດຊາຍຟອງ ນະຄອນຫຼວງວຽງຈັນ ມີເນື້ອທີ່ 19.000 ຕາແມັດ.
ກ່ອນຈະມາເຮັດຕະຫຼາດ ກໍຍ້ອນໃຈມັກຮັກ ຍ້ອນຜ່ານມາກໍເຄີຍເປັນແມ່ຄ້າ ແລະ ອີກຢ່າງໜຶ່ງກໍຍ້ອນຢາກແກ້ໄຂການຂາຍເຄື່ອງຊະຊາຍຕາມແຄມທາງເຂດບ້ານໜອງໄຮ ຢາກໃຫ້ບ້ານໜອງໄຮ່ມີຕະຫຼາດເປັນຂອງຕົນເອງ ແລະ ຜ່ານມາ ປະຊາຊົນບ້ານໜອງໄຮໄດ້ມາຂາຍເຄື່ອງຢູ່ດິນເປົ່າຫວ່າງນີ້ ຖືວ່າມີການຄ້າຂາຍຢູ່ຈຸດນີ້ກ່ອນ ຈຶ່ງເກີດມີຕະຫຼາດມາຕາມຫຼັງ ແລະ ຈຸດພິເສດຂອງຕະຫຼາດແຫ່ງນີ້ ຢູ່ດ້ານຫຼັງຕະຫຼາດມີກຳແພງເມືອງວຽງຈັນ ແລະ ໃນຕະຫຼາດມີກົກໄຮໃຫຍ່ທີ່ເປັນຮົ່ມ ໂດຍລວມແລ້ວ ຊື່ຕະຫຼາດກຳແພງເມືອງແມ່ນຕິດພັນກັບປະຫວັດສາດຂອງຊາດລາວເຮົາ.
ຕະຫຼາດແຫ່ງນີ້ໄດ້ເລີ່ມສ້າງມາແຕ່ປີ 2018 ແລະ ສຳເລັດສົມບູນ ພ້ອມເປີດບໍລິການເດືອນກຸມພາ 2020 ໄລຍະ 4 ເດືອນທຳອິດ ເຈົ້າຂອງຕະຫຼາດບໍ່ໄດ້ເກັບຄ່າເຊົ່າ ແລະ ຄ່າອື່ນໆນຳແມ່ຄ້າ ແລະ ມາຮອດປັດຈຸບັນ ນະໂບຍາຍຍັງມີ ຄືບໍ່ເກັບຄ່າຝາກລົດຈັກລົດໃຫຍ່ນຳແມ່ຄ້າ ແລະ ຜູ້ມາຊື້ເຄື່ອງ ຕະຫຼາດເປີດແຕ່ 5-20:30 ໂມງ ເຊິ່ງການຄ້າຂາຍມີຂາຍເຄື່ອງກິນສຸກ ພືດຜັກ ຊິ້ນປາ ໝາກໄມ້ ກໍຄືເຄື່ອງບໍລິໂພກ-ອຸປະໂພກຕ່າງໆ ລາຄາຄືກັບຕະຫຼາດທົ່ວໄປ.
