ທ່ານ ພູຂົງ ບັນນະວົງ ຮອງເຈົ້າຄອງນະຄອນຫຼວງວຽງຈັນ (ນວ) ຫົວໜ້າພະແນກແຜນການ ແລະ ການລົງທຶນ ນວ ຜູ້ຊີ້ນຳລວມໂຄງການພັດທະນາຕະຫຼາດເຊົ້າ ລົງພົບປະຊາວຄ້າ-ຂາຍ ແລະ ຜູ້ພັດທະນາຕະຫຼາດເຊົ້າ ວັນທີ 28 ສິງຫາ 2020 ເພື່ອຊີ້ນຳການຈັດຕັ້ງປະຕິບັດແຜນພັດທະນາຕະຫຼາດດັ່ງກ່າວ ໃຫ້ເປັນສູນການຄ້າທີ່ທັນສະໄໝ ບັນລຸໄດ້ຕາມສັນຍາສຳປະທານ ແລະ ແຜນທີ່ວາງໄວ້ ໂດຍມີທ່ານນາງ ວັນມະນີ ພິມມະສານ ຫົວໜ້າພະແນກອຸດສາຫະກຳ ແລະ ການຄ້າ ນວ ຮອງເຈົ້າເມືອງຈັນທະບູລີ ປະທານຊາວຄ້າ-ຂາຍຕະຫຼາດເຊົ້າ ຜູ້ສຳປະທານໂຄງການພັດທະນາຕະຫຼາດເຊົ້າ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ທ່ານນາງ ວັນມະນີ ພິມມະສານ ກ່າວວ່າ: ເພື່ອເຮັດໃຫ້ໂຄງການພັດທະນາຕະຫຼາດເຊົ້າ ເປັນໄປຕາມສັນຍາສຳປະທານ ແລະ ບັນລຸໄດ້ຕາມກຳນົດເວລາທີ່ໄດ້ວາງໄວ້ ຄະນະສະເພາະກິດທີ່ໄດ້ຮັບການແຕ່ງຕັ້ງ ໄດ້ປະຊຸມປຶກສາຫາລືຮ່ວມກັບທຸກພາກສ່ວນ ຕະຫຼອດຮອດຊາວຄ້າ-ຂາຍ ເພື່ອແລກປ່ຽນຄຳຄິດເຫັນ ການຮ່ວມມື ແລະ ສ້າງຄວາມເປັນເອກະພາບກັນ ປັດຈຸບັນມີຄວາມພ້ອມດ້ານສະຖານທີ່ຮອງຮັບຊາວຄ້າ-ຂາຍໃນອາຄານ Mall 1 ແລະ ອາຄານ Mall 2 ພ້ອມນີ້ ຍັງໄດ້ລົງທະບຽນຊາວຄ້າ-ຂາຍ ແລະ ແຈ້ງເຈດຈຳນົງທັງໝົດ ທີ່ຍັງດຳເນີນທຸລະກິດຢູ່ອາຄານໂຕ U ເພື່ອຍ້າຍໄປຂາຍຢູ່ອາຄານມໍ 1 ແລະ ອາຄານມໍ 2 ບໍ່ໃຫ້ເກີນ 90 ວັນ ນັບແຕ່ມື້ອອກແຈ້ງການເປັນຕົ້ນໄປ ພາຍຫຼັງການຍົກຍ້າຍຊາວຄ້າ-ຂາຍສຳເລັດແລ້ວ ຈະໄດ້ລົງມືທຸບມ້າງ ເພື່ອກໍ່ສ້າງເປັນສູນການຄ້າທີ່ທັນສະໄໝ ເປັນອາຄານ 8 ຊັ້ນ ອາຍຸສຳປະທານ 40 ປີ ເນື້ອທີ່ 26.000 ກວ່າຕາແມັດ ຄາດວ່າຈະໃຫ້ສ້າງສຳເລັດໃນປີ 2025.
ທ່ານ ຊ່າງ ຊຽງ ໝິງ ຜູ້ອຳນວຍການບໍລິສັດ ຮົວຊິນພັດທະນາ ຈຳກັດ ຜູ້ສຳປະທານຕະຫຼາດເຊົ້າ ກ່າວວ່າ: ບໍລິສັດມີຄວາມພ້ອມທີ່ຈະຮອງຮັບຊາວຄ້າ-ຂາຍທີ່ມາຈາກອາຄານໂຕ U ເພື່ອຍ້າຍມາຂາຍຢູ່ຊັ້ນໃຕ້ດິນ ຊັ້ນ 1 2 3 ແລະ ອາຄານມໍ 1 ຈຳນວນ 302 ຫ້ອງ ໂດຍມີນະໂຍບາຍຍົກເວັ້ນການເກັບຄ່າເຊົ່າ ລວມໄລຍະຍົກຍ້າຍ 9 ເດືອນ ສ່ວນຄ່າໄຟຟ້າແມ່ນຈ່າຍເອງຕາມການໃຊ້ຕົວຈິງ ຫຼັງຈາກໝົດກຳນົດແມ່ນຈະເກັບຄ່າເຊົ່າ 50% ຈົນກວ່າຈະມີແຈ້ງການໃຫ້ຂຶ້ນອາຄານໃໝ່ຕາມລາຄາເຕັມ ສຳລັບຊາວຄ້າ-ຂາຍທີ່ມີຄວາມສົນໃຈຢາກຊື້ຫ້ອງເພື່ອຂາຍເຄື່ອງ ແມ່ນມີສ່ວນຫຼຸດ 20% ຂອງມູນຄ່າຫ້ອງ ໂດຍກຳນົດໄວ້ແມ່ນຫ້ອງລະ 2.800-5.500 ໂດລາສະຫະລັດຕໍ່ຕາແມັດ ແລະ ສັນຍາວ່າຈະສຸມທຸກຄວາມສາມາດເພື່ອເຮັດໃຫ້ໂຄງການ ກໍຄືພັດທະນາຕະຫຼາດເຊົ້າໃຫ້ສຳເລັດຕາມແຜນການ ທັງຈະຮ່ວມມືກັນກັບຊາວຄ້າ-ຂາຍ ຄືດັ່ງປາກັບນ້ຳ.
ໂອກາດນີ້ ທ່ານ ພູຂົງ ບັນນະວົງ ກໍໄດ້ໃຫ້ທິດຊີ້ນຳ ເພື່ອເຮັດໃຫ້ການຈັດຕັ້ງປະຕິບັດໂຄງການດັ່ງກ່າວ ບັນລຸໄດ້ຕາມຈຸດປະສົງ ແລະ ຄາດໝາຍທີ່ວາງໄວ້ ໂດຍເນັ້ນໃຫ້ທຸກພາກສ່ວນເປັນເຈົ້າການຮ່ວມມືກັນ ພ້ອມທັງເຊື່ອໝັ້ນໃນການພັດທະນາ ແລະ ຢັ້ງຢືນຕາມສັນຍາທີ່ ນວ ໄດ້ເຊັນຮັບຮອງແລ້ວ ຈົດທະບຽນສານແລ້ວ ໂດຍຂັ້ນຕອນການຄົ້ນຄວ້າແມ່ນຜ່ານຂະບວນການຖືກຕ້ອງ ມີຄວາມເປັນທຳທີ່ສຸດ ພ້ອມນີ້ ການພັດທະນາແມ່ນໃຫ້ໄປຕາມແຜນຜັງທີ່ລັດຖະບານຮັບຮອງໃນທຸກຂັ້ນຕອນ ການກໍ່ສ້າງແມ່ນໃຫ້ປະຕິບັດຕາມລະບຽບການ ຮຽກຮ້ອງມາຍັງຊາວຄ້າ-ຂາຍ ແລະ ບໍລິສັດ ຕ້ອງໄດ້ຮ່ວມມືກັນເພື່ອເຮັດໃຫ້ການກໍ່ສ້າງສຳເລັດຕາມເວລາທີ່ກຳນົດ ສ່ວນການຕົບແຕ່ງພາຍໃນແມ່ນໃຫ້ຊາວ-ຄ້າຂາຍ ແລະ ບໍລິສັດສົມທົບກັນ ເພື່ອຄວາມຈົບງາມ ຄວາມສີວິໄລ ແລະ ທັນສະໄໝ.