ໂດຍການສະໜັບສະໜູນຈາກລັດຖະບານອົດສະຕຣາລີ ແລະ ສະຫະພາບເອີຣົບ ຮ່ວມກັບກະຊວງສຶກສາທິການ ແລະ ກີລາ ຜ່ານແຜນງານການປັບປຸງຄຸນນະພາບ ແລະ ຂະຫຍາຍໂອກາດເຂົ້າຮຽນສຳລັບການສຶກສາຂັ້ນພື້ນຖານໃນລາວ (ບີຄວາ) ໄດ້ຈັດເຝິກອົບຮົມລວມທັງໝົດ 366 ຄັ້ງ ພາຍຫຼັງໂຮງຮຽນທຸກແຫ່ງ ເລີ່ມພັກພາກຮຽນໃນເດືອນກໍລະກົດ ຈຸດປະສົງເພື່ອເຝິກວິທີການນຳໃຊ້ຫຼັກສູດປະຖົມສຶກສາສະບັບປັບປຸງໃໝ່ ໃຫ້ຄູສອນຊັ້ນປະຖົມ ຂັ້ນ ປ2 ເພື່ອເປັນການກະກຽມຄວາມພ້ອມຂັ້ນພື້ນຖານ ແລະ ທັກສະທີ່ຈຳເປັນໃນການສອນຫຼັກສູດສະບັບປັບປຸງໃໝ່ນີ້ ທີ່ຈະນຳເຂົ້າສອນສົກຮຽນ 2020-2021.
ການເຝິກອົບຮົມ ແມ່ນສອນໂດຍຄູເຝິກຂັ້ນແຂວງ ແລະ ນະຄອນຫຼວງວຽງຈັນ 597 ຄົນ ທີ່ໄດ້ຜ່ານການເຝິກອົບຮົມຫຼັກສູດນີ້ມາແລ້ວກ່ອນໜ້ານີ້ ເຊິ່ງໄດ້ແບ່ງອອກເປັນ 18 ທີມ ລົງເຝິກໃຫ້ຄູສອນ ຂັ້ນ ປ2 ໃນຂອບເຂດທົ່ວປະເທດ ຈຳນວນຄູທີ່ໄດ້ເຝິກ 6 ອາທິດຄັ້ງນີ້ ມີທັງໝົດ 10.283 ຄົນ ໃນນັ້ນຄູສອນ ຂັ້ນ ປ2 9.883 ຄົນ ແລະ ຄູສຶກສານິເທດ 421 ຄົນ.
ວັນທີ 24-28 ສິງຫາ 2020 ທີ່ໂຮງຮຽນປະຖົມສົມບູນຜາງແຫ້ງ ພະແນກສຶກສາທິການ ແລະ ກີລາ ນະຄອນຫຼວງວຽງຈັນ (ນວ) ໄດ້ຈັດເຝິກອົບຮົມໃຫ້ຄູສອນ ຂັ້ນ ປ2 ທົ່ວເມືອງນາຊາຍທອງ ໂດຍການຄັດເລືອກຕົວແທນຄູສອນຂັ້ນປະຖົມໃນແຕ່ລະໂຮງຮຽນເຂົ້າຮ່ວມ ມີທ່ານ ນາງ ອຳພອນ ອານຸໄຊຍາ ຫົວໜ້າຂະແໜງພັດທະນາຄູ ພະແນກສຶກສາທິການ ແລະ ກີລາ ນວ ພະນັກງານຄູ-ອາຈານ ແລະ ຄະນະຮັບຜິດຊອບໂຄງການເຂົ້າຮ່ວມ.
ຊຸດອົບຮົມຄັ້ງນີ້ ຜູ້ເຂົ້າຮ່ວມໄດ້ຮັບການເຝິກຝົນກ່ຽວກັບຫຼັກສູດ ຂັ້ນ ປ2 ສະບັບປັບປຸງໃໝ່ທັງດ້ານເນື້ອໃນການສອນ ແລະ ອຸປະກອນເສີມ ໂຄງຮ່າງ ແລະ ວິທີການສອນທີ່ນຳໃຊ້ເຂົ້າໃນຫຼັກສູດໃໝ່ ໄດ້ຮຽນຮູ້ກ່ຽວກັບເນື້ອໃນອັນໃໝ່ ເຝິກຝົນສິ່ງໃໝ່ໆທີ່ນຳເຂົ້າມາໃນຫຼັກສູດ ພ້ອມທັງແຫຼ່ງຂໍ້ມູນອັນໃໝ່ ຜູ້ເຂົ້າຮ່ວມໄດ້ມີໂອກາດສຶກສາ ທົດລອງ ແລະ ທົບທວນຄືນກິດຈະກຳຕ່າງໆໃນຫ້ອງຮຽນ ທີ່ຖືກອອກແບບມາໃຫ້ນຳໃຊ້ເຂົ້າກັບການຮຽນຮູ້ແບບມີສ່ວນຮ່ວມ ພວກເຂົາໄດ້ຄົ້ນພົບເຕັກນິກຕ່າງໆເຊັ່ນການຕັ້ງຄຳຖາມ ເພື່ອໃຫ້ນັກຮຽນປະກອບສ່ວນ ແລະ ຊຸກຍູ້ໃຫ້ເຂົາເຈົ້ານຳໃຊ້ຄວາມຮູ້ທີ່ມີຢູ່ປະກອບສ່ວນເຂົ້າໃນຫົວຂໍ້ບົດຮຽນ ນອກນີ້ຍັງຮຽນຮູ້ກ່ຽວກັບການກະກຽມຫ້ອງຮຽນ ເພື່ອເປັນການສົ່ງເສີມການຮຽນແບບມີສ່ວນຮ່ວມໄດ້ດີທີ່ສຸດຕື່ມອີກ.