ບໍລິສັດ ພຣູເດັນໂຊລ໌ ປະກັນໄພຊີວິດ ລາວ ຈຳກັດ (ພຣູເດັນໂຊລ໌ ລາວ) ແລະ ທະນາຄານ ມາຣູຮານ ເຈແປນ ລາວ ໄດ້ລົງນາມສັນຍາເປັນຄູ່ຮ່ວມທຸລະກິດໃນການຂາຍປະກັນໄພຊີວິດຜ່ານທະນາຄານ ໄລຍະຍາວ ເຊິ່ງທັງສອງບໍລິສັດຈະຮ່ວມມືກັນພັດທະນາ ແລະ ຈຳໜ່າຍຜະລິດຕະພັນການປະກັນໄພຊີວິດໃຫ້ປະຊາຊົນລາວ ເພື່ອຊ່ວຍຫຼຸດຜ່ອນຄວາມສ່ຽງຕໍ່ການດຳລົງຊີວິດຂອງເຂົາເຈົ້າ.
ທ່ານນາງ ວັນດາລີ ສຸວັນນະສຸກ ຫົວໜ້າພະແນກກົດໝາຍ ລະບຽບການພາຍໃນ ແລະ ການຄຸ້ມຄອງຄວາມສ່ຽງ ບໍລິສັດ ພຣູເດັນໂຊລ໌ ປະກັນໄພຊີວິດ ລາວ ຈຳກັດ ກ່າວວ່າ: ພວກເຮົາມີຄວາມພາກພູມໃຈທີ່ໄດ້ເປັນຄູ່ຮ່ວມທຸລະກິດກັບທະນາຄານ ມາຣູຮານ ເຈແປນ ລາວ ແລະ ຈະໄດ້ນຳເອົາການບໍລິການຂອງທະນາຄານ ມາຣູຮານ ເຈແປນ ລາວ ທີ່ມີຫຼາຍຊ່ອງທາງ ມານຳສະເໜີໃຫ້ປະຊາຊົນລາວ ດ້ວຍຜະລິດຕະພັນປະກັນໄພຊີວິດຂອງພວກເຮົາ ທີ່ຖືກອອກແບບມາໃຫ້ເໝາະສົມກັບຄວາມຕ້ອງການຂອງລູກຄ້າ ພວກເຮົາຫວັງວ່າຈະໄດ້ຮ່ວມມືຢ່າງໃກ້ຊິດກັບທະນາຄານ ມາຣູຮານ ເຈແປນ ລາວ ເພື່ອມອບການປົກປ້ອງ ແລະ ຄຸ້ມຄອງໃຫ້ກັບຄົນທີ່ລູກຄ້າຮັກ ແລະ ເພື່ອອະນາຄົດທີ່ສົດໃສຂອງພວກເຂົາ ການເປັນຄູ່ຮ່ວມທຸລະກິດຂາຍປະກັນໄພຊີວິດຜ່ານທະນາຄານຄັ້ງນີ້ ລູກຄ້າຂອງທະນາຄານ ມາຣູຮານ ເຈແປນ ລາວ ສາມາດເຂົ້າເຖິງການໃຫ້ບໍລິການໃນການໃຫ້ຄຳປຶກສາທາງດ້ານປະກັນໄພຊີວິດທີ່ເໝາະສົມທີ່ສຸດ ໂດຍຜ່ານເຄືອຂ່າຍຂອງທະນາຄານ ລວມເຖິງການບໍລິການຜ່ານທາງອິນເຕີເນັດ ແລະ ຜ່ານລະບົບທະນາຄານເທິງໂທລະສັບມືຖືທີ່ຈະມີຂຶ້ນໃນອະນາຄົດ.
ທ່ານ ແອນໂທນີ່ ຊິນ ຜູ້ອຳນວຍການໃຫຍ່ທະນາຄານ ມາຣູຮານ ເຈແປນ ລາວ ກ່າວວ່າ: ພວກເຮົາຮູ້ສຶກຕື່ນເຕັ້ນຢ່າງຍິ່ງ ທີ່ໄດ້ຮ່ວມມືກັບ ພຣູເດັນໂຊລ໌ ລາວ ເຊິ່ງເປັນໜຶ່ງໃນຜູ້ໃຫ້ບໍລິການດ້ານການປະກັນຊີວິດອັນດັບຕົ້ນໆໃນປະເທດລາວ ແລະ ເປັນອົງການບໍລິຫານດ້ານການເງິນຊັ້ນແນວໜ້າຂອງໂລກ ການຮ່ວມມືກັບ ພຣູເດັນໂຊລ໌ ລາວ ຈະຍົກລະດັບທຸລະກິດການປະກັນໄພຂອງພວກເຮົາໄປອີກຂັ້ນໜຶ່ງ ແລະ ເສີມຂະຫຍາຍຊື່ສຽງຂອງພວກເຮົາໃນລະດັບພາກພື້ນ ພຣູເດັນໂຊລ໌ ລາວ ໄດ້ຕົກລົງຮ່ວມດຳເນີນງານກັບທະນາຄານ ມາຣູຮານ ເຈແປນ ລາວ ໃນຂະນະທີ່ພວກເຮົາໝູນໃຊ້ຄວາມເຂັ້ມແຂງ ຄວາມສາມາດ ແລະ ການປະຕິບັດງານທີ່ດີທີ່ສຸດເພື່ອຕອບສະໜອງຄວາມຕ້ອງການທາງດ້ານການເງິນຂອງລູກຄ້າ ແລະ ການປົກປ້ອງຄຸ້ມຄອງໃນອະນາຄົດ.