ກຸ່ມກະສິກຳອິນຊີບ້ານທົ່ງມັ່ງ ນະຄອນຫຼວງວຽງຈັນ ເປັນກຸ່ມໜຶ່ງທີ່ວາງເປົ້າໝາຍການຜະລິດ ໃສ່ຜູ້ມີລາຍຮັບໜ້ອຍໃຫ້ສາມາດບໍລິໂພກພືດ-ຜັກປອດສານພິດ ແລະ ໃຫ້ມີພືດ-ຜັກອິນຊີເຂົ້າເຖິງຕະຫຼາດໃນທຸກລະດັບ ເພີ່ມປະລິມານການຜະລິດໃຫ້ມີຄຸນນະພາບ ຕອບສະໜອງໄດ້ຄວາມຕ້ອງການຂອງຕະຫຼາດ.
ທ່ານນາງ ຄຳມອນ ຫຼວງລາດ ຕາງໜ້າຜູ້ປູກພືດກະສິກຳອິນຊີ ບ້ານທົ່ງມັ່ງ ໄດ້ຂຶ້ນປະກອບຄຳເຫັນໃນກອງປະຊຸມໃຫຍ່ ຄັ້ງທີ VIII ຜູ້ແທນແມ່ຍິງນະຄອນຫຼວງວຽງຈັນ ວ່າ: ກຸ່ມກະສິກຳອິນຊີພວກເຮົາ ສ້າງຕັ້ງຂຶ້ນເດືອນພຶດສະພາ 2015 ເບື້ອງຕົ້ນມີສະມາຊິກ 12 ຄອບຄົວ ການດຳເນີນການປູກຜັກກະສິກຳອິນຊີ 6 ເດືອນທຳອິດ ມີທ່າອ່ຽງຈະລົ້ມລະລາຍ ມາຮອດທ້າຍປີ 2015 ຫ້ອງການກະສິກຳ ແລະ ປ່າໄມ້ ເມືອງໄຊທານີ ໄດ້ລະດົມ ແລະ ປັບປຸງໂຄງຮ່າງການຈັດຕັ້ງເລືອກເຟັ້ນສະມາຊິກຊຸດໃໝ່ ເຊິ່ງໃຫ້ໂອກາດສະເພາະຄອບຄົວທີ່ມີຄວາມເຂົ້າໃຈ ຕໍ່ຄວາມໝາຍຄວາມສຳຄັນຂອງພືດ-ຜັກອິນຊີ ແລະ ຜູ້ທີ່ມີຄວາມຄິດອຸດົມການດຽວກັນ ພ້ອມທັງໄດ້ຈັດສັນເນື້ອທີ່ການຜະລິດຄືນໃໝ່ ເຊິ່ງໄດ້ເຊົ່າດິນ 1 ຕອນ ເນື້ອທີ່ 1,5 ເຮັກຕາ ໂດຍອອກທຶນກັນບຸກເບີກເນື້ອທີ່ ແລະ ຫ້ອງການກະສິກຳ ແລະ ປ່າໄມ້ເມືອງ ໄດ້ສະໜັບສະໜູນຜ້າຢາງ 5 ກໍ້ ແລະ ແນວພັນພືດ ມູນຄ່າ 18 ລ້ານກີບ ນອກນັ້ນແມ່ນທຶນຂອງຊາວສວນ ສ່ວນວິຊາການກໍໄດ້ຮັບການເຝິກອົບຮົມການເຮັດສະໝຸນໄພ ຝຸ່ນບົ່ມ ການບໍລິຫານ-ຈັດການກຸ່ມ ການກວດມາດຕະຖານນາອິນຊີ ແລະ ອື່ນໆ.
ປີ 2016 ໄດ້ຈັດຕັ້ງຄະນະຮັບຜິດຊອບບໍລິຫານງານກຸ່ມ 5 ສະຫາຍ ຍິງ 3 ສະຫາຍ ໄດ້ປັບປຸງນິຕິກຳຄືນໃໝ່ ໄດ້ຮັບຮອງມາດຕະຖານອິນຊີຈາກທາງການ ຈາກນັ້ນ ຈຶ່ງໄດ້ນຳຜົນຜະລິດເຂົ້າຂາຍໃນຕະຫຼາດກະສິກຳອິນຊີ ນະຄອນຫຼວງວຽງຈັນ ໃນເວລານັ້ນ ເນື້ອທີ່ການຜະລິດມີເຮືອນຮົ່ມ 15 ຫຼັງ ລາຍຮັບຂອງສະມາຊິກ 800.000 ກີບຕໍ່ເດືອນຕໍ່ຄອບຄົວ ມາຮອດປີ 2017 ການປູກຜັກອິນຊີມີລາຍໄດ້ດີ ຈຶ່ງໄດ້ຂະຫຍາຍເນື້ອທີ່ຈາກ 1,5 ເຮັກຕາ ເປັນ 4 ເຮັກຕາ ຂະຫຍາຍສະມາຊິກເປັນ 18 ຄອບຄົວ ພິເສດ ປີນີ້ໄດ້ເຂົ້າເປັນສະມາຊິກເຄືອຄ່າຍຊາວກະສິກອນລາວ ໄດ້ນຳສະເໜີຂໍໃບຢັ້ງຢືນມາດຕະຖານອິນຊີຈາກກົມປູກຝັງ ເພື່ອຢັ້ງຢືນຜົນຜະລິດເປັນສິນຄ້າ ພ້ອມນີ້ຍັງຂະຫຍາຍເຮືອນຮົ່ມ ຈາກ 15 ຫຼັງ ເປັນ 50 ຫຼັງ ມາຮອດປີ 2019 ໄດ້ຂະຫຍາຍເນື້ອທີ່ຈາກ 4 ເຮັກຕາ ເປັນ 31,5 ເຮັກຕາ ໃນນີ້ ມີໄມ້ໃຫ້ໝາກ 11,5 ເຮັກຕາ ຕົ້ນກ້ວຍ ແລະ ໝາກຮຸ່ງ 12 ເຮັກຕາ ພືດຜັກ 4 ເຮັກຕາ ສະມາຊິກເພີ່ມເປັນ 56 ຄົນ ແລະ ມີໄວໜຸ່ມມາເປັນອາສາສະໝັກ 12 ຄົນ ເຊິ່ງ 6 ເດືອນທ້າຍປີ 2019 ສາມາດສົ່ງຜົນຜະລິດປ້ອນຕະຫຼາດ ຄື: ພືດກິນໝາກ ກິນໜໍ່ 5.240 ກິໂລ ພືດກິນໃບ 29.400 ກິໂລ ສະເລ່ຍລາຄາຂາຍ 10.000 ກີບຕໍ່ກິໂລ ສ້າງລາຍຮັບ 346 ລ້ານກວ່າກີບຕໍ່ປີ.