ກອງປະຊຸມໃຫຍ່ຄັ້ງທີ V ອົງຄະນະພັກເມືອງສັງທອງ ນະຄອນຫຼວງວຽງຈັນ (ນວ) ອັດລົງດ້ວຍຜົນສຳເລັດວັນທີ 26 ສິງຫາ 2020 ພາຍຫຼັງດຳເນີນມາເປັນເວລາວັນເຄິ່ງ ໂດຍເປັນປະທານຂອງສະຫາຍ ພົງສະຫວັນ ສິລິພັນ ຮັກສາການເລຂາຄະນະພັກເມືອງ ເຈົ້າເມືອງສັງທອງ ມີສະຫາຍ ອານຸພາບ ຕຸນາລົມ ກຳມະການສູນກາງພັກ ຮອງເລຂາຄະນະພັກ ປະທານສະພາປະຊາຊົນ ນວ ພ້ອມດ້ວຍຄະນະພັກ ນວ ເລຂາພັກເມືອງ ເລຂາຄະນະພັກຮາກຖານ ອະດີດການນຳເມືອງ ພະນັກງານປະຕິວັດອາວຸໂສບຳນານ ຜູ້ແທນສົມບູນ ແລະ ແຂກຖືກເຊີນເຂົ້າຮ່ວມ.
ກອງປະຊຸມໃຫຍ່ຄັ້ງນີ້ ໄດ້ພ້ອມກັນຄົ້ນຄວ້າ ແລະ ເປັນເອກະພາບກັນຮັບຮອງເອົາລາຍງານການເມືອງກອງປະຊຸມໃຫຍ່ ຄັ້ງທີ V ອົງຄະນະພັກເມືອງສັງທອງ ແລະ ແຜນພັດທະນາເສດຖະກິດ-ສັງຄົມ ຂອງຄະນະບໍລິຫານງານພັກເມືອງສັງທອງ ຊຸດທີ V ປ່ອນບັດເລືອກເອົາຄະນະບໍລິຫານງານພັກເມືອງສັງທອງຊຸດທີ V ຈຳນວນ 25 ສະຫາຍ ຍິງ 2 ສະຫາຍ ເພື່ອເປັນແກນນຳໃນການສືບຕໍ່ປະຕິບັດມະຕິກອງປະຊຸມໃຫຍ່ຄັ້ງທີ V ອົງຄະນະພັກເມືອງສັງທອງໃຫ້ປາກົດຜົນເປັນຈິງ ແລະ ເລືອກເອົາຜູ້ແທນສົມບູນໄປຮ່ວມກອງປະຊຸມໃຫຍ່ ຄັ້ງທີ VII ຂອງອົງຄະນະພັກ ນວ 17 ສະຫາຍ ຍິງ 3 ສະຫາຍ ແລະ ຜູ້ແທນສຳຮອງ 2 ສະຫາຍ ຍິງ 1 ສະຫາຍ ຮັບຮອງເອົາເລຂາ ຮອງເລຂາຄະນະພັກ ມີສະຫາຍ ພົງສະຫວັນ ສິລິພັນ ເປັນເລຂາຄະນະພັກ ສະຫາຍ ຄຳສວຍ ອຸ່ນດາລາ ເປັນຮອງເລຂາຄະນະພັກ ທັງເປັນປະທານກວດກາພັກ ສະຫາຍ ລຸນທອງ ບຸນມະນີ ເປັນຮອງເລຂາຄະນະພັກ ສະຫາຍ ພັນຕີ ພິນສະຫວັນ ແລະ ສະຫາຍ ນາງ ບົວຂຽວ ທອງຄຳມີ ເປັນຮອງປະທານກວດກາພັກ.
ໂອກາດນີ້ ສະຫາຍ ອານຸພາບ ຕຸນາລົມ ໄດ້ໃຫ້ກຽດໂອ້ລົມ ເນັ້ນໃຫ້ອົງຄະນະພັກເມືອງສັງທອງພິຈາລະນາຄົ້ນຄວ້າໃຫ້ແຈ້ງຕື່ມ ຂໍ້ສະດວກ ສິ່ງອຳນວຍຄວາມສະດວກ ຂໍ້ຫຍຸ້ງຍາກ ແລະ ສິ່ງທ້າທາຍທີ່ກຳລັງປະເຊີນຢູ່ ໃຫ້ບຸກບືນຈັດຕັ້ງປະຕິບັດໃຫ້ສຳເລັດໃນຕໍ່ໜ້າ ພ້ອມທັງກຳແໜ້ນເນື້ອໃນ ເຊື່ອມຊຶມ ແລະ ກຽມພ້ອມຜັນຂະຫຍາຍແນວທາງນະໂຍບາຍຂອງພັກ-ລັດຖະບານທີ່ພວມສົນທະນາ ຫ້າງຫາກະກຽມຢ່າງເຄັ່ງຮ້ອນ ໃຫ້ແກ່ກອງປະຊຸມໃຫຍ່ ຄັ້ງທີ XI ຂອງພັກ ແຜນພັດທະນາເສດຖະກິດ-ສັງຄົມ 5 ປີ ສະບັບທີ IX ກຳແໜ້ນ ເຊື່ອມຊຶມ ຜັນຂະຫຍາຍມະຕິຂອງກົມການເມືອງສູນກາງພັກ ວ່າດ້ວຍການພັດທະນາ ນວ ໃນໄລຍະໃໝ່ (2020-2030) ສະບັບເລກທີ 107/ກມສພ ໃນນັ້ນໄດ້ກຳນົດ 3 ທັດສະນະ 4 ທິດທາງ 4 ຄາດໝາຍ ແລະ 6 ໜ້າທີ່ສຳຄັນ ໃນການພັດທະນາ ນວ ກຳແໜ້ນເຊື່ອມຊຶມ ແລະ ຜັນຂະຫຍາຍຈິດໃຈບົດລາຍງານການເມືອງ ການພັດທະນາເສດຖະກິດ-ສັງຄົມ 5 ປີ (2021-2025) ຂອງ ນວ ສ້າງບ້ານເພຍລາດໃຫ້ກາຍເປັນເທສະບານເປັນຕົວເມືອງ ແລະ ມີພື້ນຖານຫັນເປັນອັດສະລິຍະແຕ່ຫົວທີ ສ້າງເຂດຊານເມືອງໃຫ້ກາຍເປັນຕົວເມືອງນ້ອຍ ແລະ ຊົນນະບົດໃໝ່ ນອກນັ້ນ ຍົກລະດັບການພັດທະນາບ້ານເທສະບານເມືອງ ກຳນົດມາດຕະຖານເຮືອນຢູ່ໃຫ້ເໝາະສົມ ເພື່ອຫຼຸດຜ່ອນການສິ້ນເປືອງຊັບພະຍາກອນທີ່ດິນ ຕິດພັນກັບການພັດທະນາ 3 ເຂດ ທີ່ໄດ້ກຳນົດໄວ້ໃຫ້ແຂງແຮງ ແລະ ເປັນຮູບປະທຳ ສຸມໃສ່ສ້າງເມືອງສັງທອງໃຫ້ເປັນເມືອງເຂັ້ມແຂງຮອບດ້ານໃນ 5 ປີຕໍ່ໜ້າ ໃຫ້ເພິ່ງຕົນເອງກຸ້ມຕົນເອງດ້ານລາຍຈ່າຍບໍລິຫານໂດຍພື້ນຖານ ແລະ ພັດທະນາ 8 ບ້ານທີ່ຍັງເຫຼືອໃຫ້ກາຍເປັນບ້ານພັດທະນາ.