ເພື່ອເປັນການສ້າງຂະບວນການຄຳນັບຮັບຕ້ອນກອງປະຊຸມໃຫຍ່ ຄັ້ງທີ XI ຂອງພັກ ວັນຊາດທີ 2 ທັນວາ ຄົບຮອບ 45 ປີ ວັນຄ້າຍວັນເກີດປະທານໄກສອນ ພົມວິຫານ ຄົບຮອບ 100 ປີ ກອງປະຊຸມໃຫຍ່ຄັ້ງທີ VII ຂອງອົງຄະນະພັກນະຄອນຫຼວງວຽງຈັນ (ນວ) ແລະ ການສະເຫຼີມສະຫຼອງນະຄອນຫຼວງວຽງຈັນ ຄົບຮອບ 460 ປີ.
ນະຄອນຫຼວງວຽງຈັນ ໄດ້ຈັດງານວາງສະແດງຮູບພາບ ແລະ ແຜນຜັງການພັດທະນາຕະຫຼອດໄລຍະ 45 ປີຜ່ານມາ ຂຶ້ນຢູ່ສຳນັກງານປົກຄອງ ນວ ບ້ານໂພນໄຊ ເມືອງໄຊເສດຖາ ດັ່ງນັ້ນ ຫ້ອງວ່າການ ນວ ກໍຄະນະຮັບຜິດຊອບຈັດງານ ຈຶ່ງແຈ້ງມາຍັງສຳນັກງານອົງການພັກ-ລັດ ເອກະຊົນ ແລະ ຊາວ ນວ ເຂົ້າຮ່ວມຮັບຊົມການວາງສະແດງດັ່ງກ່າວ ເລີ່ມແຕ່ວັນທີ 21 ສິງຫາ ຫາວັນທີ 30 ກັນຍາ 2020 ເວລາ 16-18:00 ໂມງ ຖ້າອົງການຈັດຕັ້ງ ແລະ ບຸກຄົນໃດມີຄວາມສົນໃຈເຂົ້າຢ້ຽມຊົມ ສາມາດຕິດຕໍ່ພົວພັນໄດ້ທີ່ເບີໂທລະສັບ 020 22232944 ນາງ ສິດທິພອນ.
ເພື່ອເຮັດໃຫ້ຂະບວນການຢ້ຽມຊົມງານວາງສະແດງຄັ້ງນີ້ມີຄວາມຄືກຄື້ນ ແລະ ໄດ້ຮັບການເຜີຍແຜ່ໂຄສະນາຢ່າງກວ້າງຂວາງໄວນັ້ນ ຄະນະຮັບຜິດຊອບຈັດງານ ໄດ້ເປີດໂອກາດໃຫ້ພະນັກງານສື່ມວນຊົນ ນວ ປະກອບມີໜັງສືພິມວຽງຈັນໃໝ່ ແລະ ວິທະຍຸ-ໂທລະພາບ ນວ ເຂົ້າຢ້ຽມຊົມ ໃນວັນທີ 25 ສິງຫາ 2020 ພາຍຫຼັງທີ່ເປີດຢ່າງເປັນທາງການມາແຕ່ວັນທີ 21 ສິງຫາ 2020 ເຊິ່ງນຳໂດຍທ່ານ ນາງ ແກ້ວຊ້ອນ ຈັນທະນາມ ຫົວໜ້າບັນນາທິການໜັງສືພິມວຽງຈັນໃໝ່ ແລະ ທ່ານ ສົມປະສົງ ສົມພັກດີ ອຳນວຍການວິທະຍຸ-ໂທລະພາບ ນວ ພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວ ນວ.
ການຢ້ຽມຊົມຄັ້ງນີ້ ໄດ້ຮັບຟັງການບັນລະຍາຍຈາກຄະນະຮັບຜິດຊອບເປັນຢ່າງດີ ໃນການອະທິບາຍຮູບພາບຕ່າງໆຂອງ 4 ຂົງເຂດນັບແຕ່ອະດີດເຖິງປັດຈຸບັນ ທີ່ວາງສະແດງຢູ່ຊັ້ນ 1 ນອກນັ້ນ ຍັງມີຮູບການນຳ ນວ ກໍຄືບັນດາເຈົ້າຄອງ ນວ ນັບແຕ່ປີ 1975 ເຖິງປັດຈຸບັນ ຄະນະບໍລິຫານງານ ແລະ ສະມາຊິກອົງການປົກຄອງ ນວ ແຕ່ລະສະໄໝ ສ່ວນຢູ່ຊັ້ນ 2 ຈະມີແຜນຜັງຕົວເມືອງ ນວ ທີ່ເປັນແຜນຜັງຈຳລອງໃນປັດຈຸບັນ ແລະ ໃນອະນາຄົດ ທີ່ຈະມີການພັດທະນາໄປໃນຮູບແບບໃດທີ່ເປັນແຜນຜັງເມືອງທີ່ໄດ້ມາດຕະຖານ ແລະ ມີຄວາມທັນສະໄໝ ຖ້າພັດທະນາໄປຕາມແຜນຜັງ ນວ ວາງໄວ້ນັ້ນ ຈະເຮັດໃຫ້ ນວ ໄດ້ຮັບການພັດທະນາເປັນເຂດຕາມການຈັດສັນແບ່ງປັນດິນທີ່ເໝາະສົມແຕ່ລະເຂດ ເປັນຕົ້ນເຂດຕົວເມືອງ ຊານເມືອງ ແລະ ການສ້າງພື້ນຖານໂຄງລ່າງ ເສັ້ນທາງຫຼວງ ເສັ້ນທາງລົດໄຟລາວ-ຈີນ ເສັ້ນທາງລົດໄຟລາວ-ໄທ ເສັ້ນທາງດ່ວນ ເສັ້ນທາງໝາຍເລກ 1 ແລະ ເສັ້ນທາງອື່ນໆ.