ກອງປະຊຸມປະຈຳປີຂອງເຄືອຂ່າຍອົງການຈັດຕັ້ງທາງສັງຄົມ ເພື່ອສົ່ງເສີມໂພຊະນາການ (SUN CSA) ຈັດຂຶ້ນວັນທີ 25 ສິງຫາ 2020 ຢູ່ໂຮງແຮມດອນຈັນພາເລດ ນະຄອນຫຼວງວຽງຈັນ ເປັນປະທານຂອງທ່ານ ພອນປະເສີດ ອຸນາພົມ ຫົວໜ້າກົມອະນາໄມ ແລະ ສົ່ງເສີມສຸຂະພາບ ກະຊວງສາທາລະນະສຸກ ມີຕາງໜ້າຈາກສະມາຊິກຂອງ SUN CSA ແລະ ອົງກອນທີ່ກ່ຽວຂ້ອງເຂົ້າຮ່ວມ.
ທ່ານ ພອນປະເສີດ ອຸນາພົມ ກ່າວວ່າ: ຂະບວນການສົ່ງເສີມໂພຊະນາການໃນລາວ ໄດ້ຖືກອອກແບບມາເພື່ອໃຫ້ໂຄງຮ່າງການຈັດຕັ້ງວຽກ ໃນດ້ານການປະສານສົມທົບຄວາມພະຍາຍາມຮ່ວມກັນ ໃນການປັບປຸງໂພຊະນາການຈາກຂະແໜງການຕ່າງໆ ສູນໂພຊະນາການແຫ່ງຊາດ ແມ່ນຈຸດປະສານງານຂອງວຽກງານຂະບວນການສົ່ງເສີມໂພຊະນາການໃນລາວ ແລະ ໄດ້ເຮັດວຽກຮ່ວມກັນກັບອົງການຈັດຕັ້ງທາງສັງຄົມລາວນັບຕັ້ງແຕ່ SUN CSA ໄດ້ຮັບການສ້າງຕັ້ງຂຶ້ນປີ 2014 ຖືເປັນສິ່ງສຳຄັນສຳລັບອົງການຈັດຕັ້ງທາງສັງຄົມທັງລາວ ແລະ ສາກົນ ໃນການສືບຕໍ່ຈັດຕັ້ງປະຕິບັດໂຄງການດ້ານໂພຊະນາການ ໂດຍການຮ່ວມມືຢ່າງໃກ້ຊິດກັບພາກລັດຖະບານ ເພື່ອໃຫ້ວຽກງານກະສິກຳ ສາທາລະນະສຸກ ການສຶກສາ ແລະ ແຮງງານ ສະຫວັດດີການສັງຄົມ ສາມາດປະກອບສ່ວນສະໜັບສະໜູນໃຫ້ວຽກງານໂພຊະນາການໄດ້ຮັບການປັບປຸງ.
ຕາງໜ້າກະຊວງສາທາລະນະສຸກ ຂໍສະແດງຄວາມຂອບໃຈມາຍັງບັນດາອົງການຈັດຕັ້ງທາງສັງຄົມ ທີ່ເຮັດວຽກດ້ານໂພຊະນາການ ເພື່ອບັນລຸເປົ້າໝາຍໃນການປັງປຸງໂພຊະນາການໃນລາວ ເຖິງຢ່າງໃດກໍຕາມ ພວກເຮົາຕ່າງກໍຮູ້ວ່າການປັບປຸງໂພຊະນາການແມ່ນຄວາມພະຍາຍາມ ແລະ ໃຊ້ເວລາ ເນື່ອງຈາກວ່າຕ້ອງມີການປ່ຽນແປງພຶດຕິກຳຂອງບ້ານ ຄອບຄົວ ແລະ ໂຕບຸກຄົນເອງ ພວກເຮົາຄວນສືບຕໍ່ການເຮັດວຽກເພື່ອປ່ຽນແປງພຶດຕິກຳ ແລະ ປັບປຸງໂພຊະນາການ ແລະ ສືບຕໍ່ລາຍງານຜົນສຳເລັດນີ້ໃນລະດັບຊາດ.
ພາຍຫຼັງທີ່ສຳເລັດກອງປະຊຸມສາມັນປະຈຳປີ ຂອງເຄືອຂ່າຍອົງການຈັດຕັ້ງທາງສັງຄົມເພື່ອໂພຊະນາການແລ້ວ ກໍໄດ້ມີກອງປະຊຸມສຳມະນາແລກປ່ຽນບົດຮຽນຂອງອົງກອນທີ່ເຮັດວຽກດ້ານໂພຊະນາການໃນວັນທີ 26 ສິງຫາ 2020 ເຊິ່ງຈະເນັ້ນໃສ່ການແລກປ່ຽນ ແລະ ສົນທະນາກ່ຽວກັບບົດຮຽນ ແລະ ຜົນໄດ້ຮັບໃນການຈັດຕັ້ງປະຕິບັດ ແບ່ງປັນການຮຽນຮູ້ ແລະ ຜົນກະທົບຂອງພະນັກງານຈາກບັນດາອົງກອນທີ່ເຮັດວຽກດ້ານໂພຊະນາການ ເປັນການເປີດໂອກາດໃນການແລກປ່ຽນຜົນສຳເລັດການຫຼຸດຜ່ອນການຂາດສານອາຫານ ແລະ ການສົ່ງເສີມສຸຂະພາບຂອງຊຸມຊົນໃນລາວ ທີ່ເປັນສ່ວນສຳຄັນໃນການພັດທະນາວິຊາຊີບ ແລະ ການປະສານງານຢ່າງໃກ້ຊິດ ເຊິ່ງຈະສົ່ງຜົນກະທົບໃນໄລຍະຍາວ ຕໍ່ສະຖານະໂພຊະນາການຂອງປະຊາຊົນລາວທົ່ວປະເທດ.