ທ່ານ ໂມເຕງິ ໂທຊິມິດຊຶ ລັດຖະມົນຕີຕ່າງປະເທດຍີ່ປຸ່ນ ພ້ອມດ້ວຍຄະນະ ໄດ້ເດີນທາງມາຢ້ຽມຢາມ ສປປ ລາວ ລະຫວ່າງວັນທີ 22-24 ສິງຫາ 2020.
ໃນວັນທີ 23 ສິງຫາ 2020 ທີ່ກະຊວງການຕ່າງປະເທດ ໄດ້ມີການພົບປະສອງຝ່າຍ ລະຫວ່າງທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດແຫ່ງ ສປປ ລາວ ແລະ ທ່ານ ໂມເຕງິ ໂທຊິມິດຊຶ ລັດຖະມົນຕີຕ່າງປະເທດຍີ່ປຸ່ນ ໃນໂອກາດນີ້ ທ່ານ ສະເຫຼີມໄຊ ກົມມະສິດ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການມາຢ້ຽມຢາມ ສປປ ລາວ ຂອງທ່ານລັດຖະມົນຕີຕ່າງປະເທດຍີ່ປຸ່ນ ພ້ອມດ້ວຍຄະນະໃນຄັ້ງນີ້ ເຊິ່ງເປັນນິມິດໝາຍທີ່ສຳຄັນໃນການສືບຕໍ່ເພີ່ມທະວີຮັດແໜ້ນສາຍພົວພັນມິດຕະພາບ ແລະ ການຮ່ວມມື ລະຫວ່າງ ສປປ ລາວ ແລະ ຍີ່ປຸ່ນ ໂດຍສະເພາະການຢ້ຽມຢາມໃນຄັ້ງນີ້ ໄດ້ເປັນການປະກອບສ່ວນອັນສຳຄັນໃນການສະເຫຼີມສະຫຼອງວັນສ້າງຕັ້ງສາຍພົວພັນການທູດ ຄົບຮອບ 65 ປີ (05 ມິນາ 1955) ແລະ ການເປັນຄູ່ຮ່ວມຍຸດທະສາດລະຫວ່າງສອງປະເທດ ລາວ ແລະ ຍີ່ປຸ່ນ ຄົບຮອບ 05 ປີ ໃນປີ 2020 ໃນການພົບປະຄັ້ງນີ້ ສອງຝ່າຍໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືຂອງສອງປະເທດ ລາວ-ຍີ່ປຸ່ນ ໃນຖານະເປັນຄູ່ຮ່ວມຍຸດທະສາດທີ່ນັບມື້ນັບຂະຫຍາຍຕົວເຂົ້າສູ່ລວງກວ້າງ ລວງເລິກ ແລະ ເປັນຮູບປະທຳຢ່າງຕໍ່ເນື່ອງ ສອງຝ່າຍໄດ້ສະແດງຄວາມຍິນດີທີ່ສອງປະເທດໄດ້ມີການຮ່ວມມືເພື່ອພັດທະນາ ສປປ ລາວ ແບບຍືນຍົງຮ່ວມກັນ ເຊິ່ງໄດ້ຮັບການຈັດຕັ້ງປະຕິບັດນັບແຕ່ປີ 2016 ເປັນຕົ້ນມາ ແຜນການຮ່ວມມືດັ່ງກ່າວ ໄດ້ປະກອບສ່ວນຢ່າງຕັ້ງໜ້າ ເຂົ້າໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ 8 ຂອງ ສປປ ລາວ ແລະ ໄດ້ນຳເອົາໝາກຜົນທີ່ເປັນຮູບປະທຳມາສູ່ປະຊາຊົນລາວຢ່າງແທ້ຈິງ. ພ້ອມດຽວກັນນີ້ ສອງຝ່າຍຍັງໄດ້ປຶກສາຫາລືກ່ຽວກັບການປັບປຸງແຜນປະຕິບັດງານການເປັນຄູ່ຮ່ວມຍຸດທະສາດລະຫວ່າງ ສປປ ລາວ ແລະ ຍີ່ປຸ່ນ ໃຫ້ແທດເໝາະກັບສະພາບຕົວຈິງ ແນໃສ່ຊຸກຍູ້ສົ່ງເສີມ ແລະ ຮັດແໜ້ນການພົວພັນຮ່ວມມືໃຫ້ໃກ້ຊິດ ແລະ ຂະຫຍາຍຕົວຍິ່ງໆຂຶ້ນ ນອກນີ້ ສອງຝ່າຍໄດ້ປຶກສາຫາລືກ່ຽວກັບຄວາມອາດສາມາດ ແລະ ເງື່ອນໄຂໃນການຈັດຕັ້ງປະຕິບັດມາດຕະການຜ່ອນຜັນສຳລັບພົນລະເມືອງຂອງສອງປະເທດ ຜູ້ທີ່ໄດ້ຮັບອະນຸຍາດມາຢູ່ໄລຍະຍາວ ທີ່ມີທີ່ຕັ້ງພູມລຳເນົາແລ້ວ (Residence Track) ແລະ ສຳລັບພາກທຸລະກິດ (Business Track) ເຊິ່ງຈະໄດ້ສືບຕໍ່ເຮັດວຽກຮ່ວມກັນ ເພື່ອໃຫ້ມີການຈັດຕັ້ງປະຕິບັດຊ່ອງທາງດັ່ງກ່າວໃນອະນາຄົດ ພ້ອມນີ້ ຝ່າຍລາວໄດ້ເຊີນຊວນ ແລະ ຊຸກຍູ້ຝ່າຍຍີ່ປຸ່ນຂົນຂວາຍນັກລົງທຶນໃຫ້ມາລົງທຶນຢູ່ ສປປ ລາວ ນັບມື້ນັບເພີ່ມຂຶ້ນ ສອງຝ່າຍຍັງໄດ້ປຶກສາຫາລືກ່ຽວກັບການຮ່ວມມືດ້ານວຽກງານປ້ອງກັນຊາດ-ປ້ອງກັນຄວາມສະຫງົບ ເສດຖະກິດ ການພັດທະນາລະບົບພື້ນຖານໂຄງລ່າງ (ສຶກສາຄວາມເປັນໄປໄດ້ໃນການອອກແບບກໍ່ສ້າງເສັ້ນທາງດ່ວນ ວຽງຈັນ-ຮ່າໂນ້ຍ) ແລະ ອື່ນໆ ພ້ອມດຽວກັນນັ້ນ ສອງຝ່າຍຍັງໄດ້ແລກປ່ຽນຄຳຄິດຄຳເຫັນຕໍ່ສະພາບການພາກພື້ນ ແລະ ສາກົນ ທີ່ສອງຝ່າຍມີຄວາມສົນໃຈຮ່ວມກັນ.
ໃນໂອກາດນີ້ ທ່ານ ສະເຫຼີມໄຊ ກົມມະສິດ ໄດ້ຕາງໜ້າໃຫ້ລັດຖະບານ ແລະ ປະຊາຊົນລາວ ສະແດງຄວາມຮູ້ບຸນຄຸນ ແລະ ຂອບໃຈຢ່າງເລິກເຊິ່ງ ຕໍ່ລັດຖະບານ ແລະ ປະຊາຊົນຍີ່ປຸ່ນ ທີ່ໄດ້ໃຫ້ການສະໜັບສະໜູນ ແລະ ຊ່ວຍເຫຼືອ ສປປ ລາວ ຕະຫຼອດມາ ໂດຍສະເພາະການຊ່ວຍເຫຼືອທາງການ ເພື່ອການພັດທະນາ (ODA) ຕໍ່ ສປປ ລາວ ການສົ່ງອາສາສະໝັກ ແລະ ຊ່ຽວຊານ ຂອງ ຍີ່ປຸ່ນ ມາຊ່ວຍເຫຼືອ ສປປ ລາວ ໃນທຸກໆປີ ລວມທັງການໃຫ້ການຊ່ວຍເຫຼືອລັດຖະບານລາວ ໃນການປ້ອງກັນ ແລະ ຄວບຄຸມພະຍາດ ໂຄວິດ-19.
ພ້ອມດຽວກັນນີ້ ທ່ານ ໂມເຕງິ ໂທຊິມິດຊຶ ກໍໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ແລະ ຕີລາຄາສູງຕໍ່ການຮ່ວມມືລະຫວ່າງ ສປປ ລາວ ແລະ ຍີ່ປຸ່ນ ທັງໃນຂອບການຮ່ວມມືສອງຝ່າຍ ແລະ ຫຼາຍຝ່າຍ ພ້ອມທັງສະແດງຄວາມຍິນດີ ສືບຕໍ່ໃຫ້ການຮ່ວມມືກັບຝ່າຍລາວ ເພື່ອເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມ ທີ່ມີມາແຕ່ດົນນານ ແລະ ການເປັນຄູ່ຮ່ວມຍຸດທະສາດ ລະຫວ່າງ ສປປ ລາວ ແລະ ຍີ່ປຸ່ນ ໃຫ້ນັບມື້ນັບກ້າວເຂົ້າສູ່ລວງເລິກ.
ພາຍຫຼັງກອງປະຊຸມພົບປະສອງຝ່າຍ ໄດ້ມີພິທີລົງນາມເອກະສານແລກປ່ຽນ 2 ໂຄງການ ຄື: 1) ໂຄງການປັບປຸງວິທະຍາໄລສ້າງຄູ ໃຫ້ແກ່ ສປປ ລາວ ມູນຄ່າ 1.922 ລ້ານເຢັນ ຫຼື ປະມານ 18 ລ້ານ ໂດລາສະຫະລັດ 2)ໂຄງການຊ່ວຍເຫຼືອລົດເມ ອາໄຫຼ່ ແລະ ອຸປະກອນສຳລັບສ້ອມແປງລົດເມ ມູນຄ່າ 500 ລ້ານເຢັນ ຫຼື ປະມານ 4,6 ລ້ານ ໂດລາສະຫະລັດ ນອກຈາກນັ້ນ ໄດ້ມີພິທີມອບ-ຮັບ ອຸປະກອນການແພດຈຳນວນໜຶ່ງ ຂອງໂຄງການຊ່ວຍເຫຼືອອຸປະກອນການແພດໃຫ້ແກ່ ສປປ ລາວ ເພື່ອຕ້ານການແຜ່ລະບາດຂອງພະຍາດໂຄວິດ-19 ມູນຄ່າ 1,5 ຕື້ເຢັນ (13,7 ລ້ານໂດລາສະຫະລັດ).
ໃນໂອກາດຢ້ຽມຢາມ ສປປ ລາວ ໃນຄັ້ງນີ້ ທ່ານ ໂມເຕງິ ໂທຊິມິດຊຶ ພ້ອມດ້ວຍຄະນະ ຍັງໄດ້ເຂົ້າຢ້ຽມຂ່ຳນັບພະນະທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ທີ່ ສຳນັກງານນາຍົກລັດຖະມົນຕີ ຕື່ມອີກ.