ກອງປະຊຸມລະດັບຜູ້ບໍລິຫານຂອງໜ່ວຍງານວິຊາການຂະແໜງການສຶກສາ ແລະ ກີລາ (Education Sector Working Group Meeting: Executive Level) ຈັດຂຶ້ນວັນທີ 18 ສິງຫາ 2020 ທີ່ໂຮງແຮມແລນມາກ ແມ່ຂອງຣີເວີໄຊ ນະຄອນຫຼວງວຽງຈັນ ເປັນປະທານຂອງທ່ານນາງ ແສງເດືອນ ຫຼ້າຈັນທະບູນ ລັດຖະມົນຕີກະຊວງສຶກສາທິການ ແລະ ກີລາ ແລະ ມີທ່ານ ພໍລ ສະຕີເຟັນ ອຸປະທູດສະຖານທູດອົດສະຕຣາລີປະຈຳລາວ ທ່ານ ບຣາຍອັນ ຟໍນາຣີ ອຸປະທູດ ສຳນັກງານຜູ້ຕາງໜ້າສະຫະພາບເອີຣົບປະຈຳລາວ ພ້ອມດ້ວຍທ່ານຫົວໜ້າກົມ ຮອງກົມ ຜູ້ອຳນວຍການ ຮອງຜູ້ອຳນວຍການສະຖາບັນ ພະແນກການ ຕາງໜ້າຈາກກະຊວງ ອົງການຈັດຕັ້ງສາກົນ ແລະ ພາກສ່ວນກ່ຽວຂ້ອງເຂົ້າຮ່ວມ.
ຈຸດປະສົງຂອງກອງປະຊຸມ ຈັດຂຶ້ນເພື່ອປຶກສາຫາລື ແລກປ່ຽນຄຳຄິດຄຳເຫັນ ແລະ ຮັບຮອງເອົາບັນດາເອກະສານສຳຄັນຕ່າງໆ ປະກອບມີເອກະສານເຊັ່ນ: ແຜນພັດທະນາຂະແໜງສຶກສາທິການ ແລະ ກີລາ ປີ 2021-2025 ເພື່ອຮັບຮອງການຕອບຄືນ ຕໍ່ກັບບົດປະເມີນແຜນພັດທະນາຂະແໜງສຶກສາທິການ ແລະ ກີລາ ປີ 2021-2025 ຂອງນັກປະເມີນອິດສະຫຼະ ແລະ ເພື່ອເຜີຍແຜ່ຂໍ້ຕົກລົງຂອງລັດຖະມົນຕີກະຊວງສຶກສາທິການ ແລະ ກີລາ ກ່ຽວກັບພາລະບົດບາດຂອງໜ່ວຍງານວິຊາການຂະແໜງການສຶກສາ ແລະ ກີລາ (ສະບັບປັບປຸງ).
ສຳລັບແຜນພັດທະນາຂະແໜງການສຶກສາ ແລະ ກີລາ ປີ 2021-2025 ແມ່ນໄດ້ແນໃສ່ບົດຮຽນທີ່ຖອດຖອນໄດ້ຈາກການປະຕິບັດແຜນພັດທະນາການສຶກສາ ແລະ ກິລາ ປີ 2016-2020 ແລະ ໄດ້ກຳນົດບຸລິມະສິດຕ່າງໆໃຫ້ສອດຄ່ອງກັບຄວາມຕ້ອງການຕົວຈິງ ໂດຍເລັ່ງໃສ່ປັບປຸງຜົນການຮຽນ ແລະ ຫຼຸດຜ່ອນຄວາມແຕກໂຕນທາງດ້ານການສຶກສາໃນເຂດຕົວເມືອງ ແລະ ຊົນນະບົດ ໂດຍສະເພາະໃນບັນດາເມືອງທີ່ດ້ອຍໂອກາດທາງດ້ານການສຶກສາ 40 ເມືອງ ທີ່ກະຊວງສຶກສາທິການ ແລະ ກີລາ ກຳນົດໃນປັດຈຸບັນ ເປົ້າໝາຍລວມຂະແໜງການສຶກສາ ແລະ ກິລາສຳລັບປີ 2021-2025 ແມ່ນ “ພາຍໃນປີ 2025 ຂະແໜງການສຶກສາ ແລະ ກິລາ ຢູ່ ສປປ ລາວ ມີໂຄງສ້າງ ແລະ ມີຊັບພະຍາກອນທີ່ເໝາະສົມເພື່ອເຮັດໃຫ້ພົນລະເມືອງລາວທຸກຄົນ ເຂົ້າເຖິງການສຶກສາ ແລະ ກິລາ-ກາຍຍະກຳ ທີ່ມີຄຸນນະພາບ.
ກອງປະຊຸມຄັ້ງນີ້ ໄດ້ເປີດໂອກາດໃຫ້ຜູ້ເຂົ້າຮ່ວມກອງປະຊຸມທຸກທ່ານ ໄດ້ປະກອບສ່ວນແລກປ່ຽນຄຳຄິດຄຳເຫັນກ່ຽວກັບບາງບັນຫາທີ່ສຳຄັນ ຕາມເນື້ອໃນຕ່າງໆທີ່ໄດ້ນຳມາສະເໜີ ໂດຍໃຫ້ໄປຕາມພາລະບົດບາດ ສິດ ແລະ ໜ້າທີ່ຄວາມຮັບຜິດຊອບໃນການຈັດຕັ້ງປະຕິບັດວຽກງານດັ່ງກ່າວຂອງທຸກພາກສ່ວນ ເພື່ອເຮັດໃຫ້ການຈັດຕັ້ງປະຕິບັດວຽກງານດັ່ງກ່າວບັນລຸໄດ້ຕາມຈຸດປະສົງ ແລະ ເປົ້າໝາຍ ທີ່ວາງໄວ້.
ສ່ວນບາດກ້າວຕໍ່ໄປ ແມ່ນຈະໄດ້ຮັບຮອງແຜນດັ່ງກ່າວຢ່າງເປັນທາງການ ໃນກອງປະຊຸມປະຈຳປີຂອງຂະແໜງການສຶກສາ ແລະ ກິລາ ໃນທ້າຍເດືອນສິງຫາ 2020.