ສປປ ລາວ ກວດພົບຜູ້ຕິດເຊື້ອໂຄວິດ-19 ເພີ່ມອີກ 2 ກໍລະນີ ໃນອາທິດຜ່ານມາ ເຊິ່ງສະແດງໃຫ້ເຫັນວ່າພະຍາດນີ້ຍັງວົນວຽນ ແລະ ເຂົ້າມາລາວໄດ້ຕະຫຼອດເວລາ ການທີ່ກວດພົບຜູ້ຕິດເຊື້ອໃໝ່ ອາດເປັນສັນຍານເຕືອນໃຫ້ທຸກຄົນຫັນມາເອົາໃຈໃສ່ປ້ອງກັນພະຍາດດັ່ງກ່າວຢ່າງເຂັ້ມງວດຂຶ້ນ ດ້ວຍການປະຕິບັດມາດຕະການປ້ອງກັນ ກໍຄືສືບຕໍ່ການດຳລົງຊີວິດປົກກະຕິແບບໃໝ່ ເພື່ອບໍ່ໃຫ້ມີການລະບາດເກີດຂຶ້ນອີກ.
ວັນທີ 18 ສິງຫາ 2020 ທ່ານ ດຣ ສີສະຫວາດ ສຸດທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ໄດ້ລາຍງານສະພາບການລະບາດຂອງພະຍາດໂຄວິດ-19 ວ່າ: ມາຮອດ 17 ໂມງ ຂອງວັນທີ 17 ສິງຫາ 2020 ທົ່ວປະເທດມີຜູ້ເດີນທາງເຂົ້າມາ 2.212 ຄົນ ໃນນີ້ ຜ່ານດ່ານ ລາວ-ໄທ 1.093 ຄົນ ດ່ານ ລາວ-ຈີນ 117 ຄົນ ແລະ ຜ່ານສະໜາມບິນວັດໄຕ 329 ຄົນ (ຄົນຈີນ 255 ຄົນ ຄົນລາວ 7 ຄົນ ຕ່າງປະເທດ 67 ຄົນ) ເຊິ່ງທຸກຄົນໄດ້ຮັບການວັດແທກອຸນຫະພູມຮ່າງກາຍ ແຕ່ບໍ່ພົບຜູ້ມີອາການເປັນໄຂ້ ແລະ ໄດ້ເກັບຕົວຢ່າງທຸກຄົນມາກວດ (ຍົກເວັ້ນແຕ່ຜູ້ຂັບລົດຂົນສົ່ງ ແລະ ຜູ້ຕິດຕາມ) ແລ້ວຈຶ່ງນຳສົ່ງໄປຫາສະຖານທີ່ຈຳກັດບໍລິເວນທີ່ກຳນົດໄວ້ຈົນກວ່າຈະຄົບກຳນົດ 14 ວັນ ປັດຈຸ ບັນ ທົ່ວປະເທດມີສູນຈຳກັດບໍລິເວນ 53 ສູນ ມີຜູ້ຖືກຈຳກັດບໍລິເວນຢູ່ສູນ 3.773 ຄົນ ໄດ້ເກັບຕົວຢ່າງມາກວດວິເຄາະ ທັງໝົດບໍ່ພົບຜູ້ຕິດເຊື້ອ ແລະ ວັນທີ 17 ສິງຫາ ໄດ້ເກັບຕົວຢ່າງມາກວດວິເຄາະ 422 ຄົນ ຜົນກວດວິເຄາະທັງໝົດບໍ່ພົບເຊື້ອ ບໍ່ມີຜູ້ຕິດເຊື້ອໃໝ່ ປັດຈຸບັນມີຄົນເຈັບຕິດເຊື້ອພະຍາດໂຄວິດ-19 ປິ່ນປົວຢູ່ໂຮງໝໍມິດຕະພາບ 3 ຄົນ.
ທ່ານ ດຣ ສີສະຫວາດ ສຸດທານີລະໄຊ ກ່າວຕື່ມອີກວ່າ: ເພື່ອຫຼຸດຜ່ອນ ແລະ ຢັບຢັ້ງການລະບາດແຜ່ລາມຂອງພະຍາດນີ້ ຂໍຮຽກຮ້ອງມາຍັງທຸກພາກສ່ວນໃນສັງຄົມໃຫ້ເຫັນຄວາມສຳຄັນໃນການຈັດຕັ້ງປະຕິ ບັດ ໂດຍສະເພາະການຈຳກັດບໍລິເວນເມື່ອສຳຜັດ ຫຼື ເດີນທາງມາແຕ່ເຂດລະບາດ ແລະ ສືບຕໍ່ປະຕິບັດຕາມແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີ ເລກທີ 806/ຫສນຍ ລົງວັນທີ 29 ກໍລະ ກົດ 2020 ພ້ອມນີ້ ກໍສືບຕໍ່ການດຳລົງຊີວິດປົກກະຕິແບບໃໝ່ ໃຫ້ກາຍເປັນຄວາມລຶ້ງເຄີຍ.