ຫ້ອງວ່າການປົກຄອງນະຄອນຫຼວງວຽງຈັນ (ນວ) ຮ່ວມກັບກົມສ່ວຍສາອາກອນ ກະຊວງການເງິນ ຈັດກອງປະຊຸມແຜນລົງຊຸກຍູ້ການຈັດເກັບລາຍຮັບ ແລະ ປະຕິບັດລາຍຈ່າຍຢູ່ 9 ເມືອງ ແລະ ບັນດາດ່ານຢູ່ ນວ 6 ເດືອນທ້າຍປີ 2020 ຂຶ້ນວັນທີ 17 ສິງຫາ 2020 ຢູ່ຫ້ອງວ່າການປົກຄອງ ນວ ໂດຍເປັນປະທານຂອງທ່ານ ອາດສະພັງທອງ ສີພັນດອນ ຮອງເຈົ້າຄອງ ນວ ມີທ່ານ ພູທະນູເພັດ ໄຊສົມບັດ ຫົວໜ້າກົມສ່ວຍສາອາກອນ ທ່ານ ສີລິລາດທົງສິນ ທອງເພັງ ຫົວໜ້າພະແນກການເງິນ ນວ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ເພື່ອຮັບປະກັນໃຫ້ການຈັດຕັ້ງປະຕິບັດມະຕິຂອງສະພາແຫ່ງຊາດ ວ່າດ້ວຍການຮັບຮອງເອົາບັນດາ ບົດລາຍງານການຈັດຕັ້ງປະຕິບັດແຜນງົບປະມານແຫ່ງລັດ 5 ເດືອນຕົ້ນປີ ແລະ ການສະເໜີດັດແກ້ແຜນງົບປະມານແຫ່ງລັດປີ 2020 ແລະ ແຈ້ງການຕ່າງໆຂອງກະຊວງການເງິນ ທີ່ເປັນຈຸດເລັ່ງໃສ່ການຈັດຕັ້ງປະຕິບັດງົບປະມານລາຍຮັບ-ລາຍຈ່າຍ ສົກປີ 2020 ໃຫ້ປາກົດຜົນເປັນຈິງ ສົມທົບກັບອຳນາດການປົກຄອງ ນວ ບັນດາເມືອງ ແລະ ດ່ານສາກົນ-ທ້ອງຖິ່ນຢູ່ ນວ ເພື່ອເກັບກຳຂໍ້ມູນ ແລະ ພ້ອມກັນຈັດເກັບລາຍຮັບປົກກະຕິ ແລະ ບົ່ມຊ້ອນໃຫ້ໄດ້ຢ່າງຄົບຖ້ວນ ຕາມກົດໝາຍກຳນົດ ກວດກາຄືນການປະຕິບັດຕົວເລກລາຍຈ່າຍຂອງແຕ່ລະຂະແໜງການ ຕາມການອະນຸມັດຂອງສະພາແຫ່ງຊາດ.
ນອກນີ້ຍັງເລັ່ງໃສ່ໜ້າວຽກຈັດເກັບລາຍຮັບທີ່ເປັນຈຸດສຸມສະເພາະ ເປັນຕົ້ນວຽກງານດັດປັບລາຍຮັບ-ລາຍຈ່າຍງົບປະມານປີ 2020 ແລະ ຂຶ້ນແຜນ 2021 ວຽກງານລາຍຮັບຈາກອາກອນ ພາສີ ຊັບສິນ ແລະ ການເງິນທີ່ລັດລົງທຶນ ຄ່າທຳນຽມ-ຄ່າບໍລິການ ແລະ ອື່ນໆໃນປີ 2020 ໃຫ້ສອດຄ່ອງຕາມລະບຽບກົດໝາຍ ເປັນການຊຸກຍູ້ດ້ານລາຍຮັບ-ລາຍຈ່າຍ ແລະ ເຕັກນິກດ້ານວິຊາການໄປພ້ອມກັນ ເຊິ່ງຕ້ອງໄດ້ມີການສົມທົບກັນລະຫວ່າງສູນກາງ ແລະ ທ້ອງຖິ່ນ ເພື່ອແກ້ໄຂບັນຫາຄົງຄ້າງຕ່າງໆ ທີ່ຍັງບໍ່ທັນເອື້ອອຳນວຍແກ່ການຈັດເກັບລາຍຮັບ ໂດຍການຈັດຕັ້ງປະຕິບັດຄັ້ງນີ້ ຈະເລີ່ມແຕ່ວັນທີ 17 ສິງຫາ-24 ກັນຍາ 2020 ໃຫ້ສຳເລັດ.