ໃນໄລຍະຜ່ານມາ ພະແນກແຮງງານ ແລະ ສະຫວັດດີການ-ສັງຄົມ ນະຄອນຫຼວງວຽງຈັນ (ຮສສ ນວ) ໄດ້ເອົາໃຈໃສ່ປະຕິບັດພາລະບົດບາດ ສິດ ແລະ ໜ້າທີ່ຂອງຕົນຢ່າງຕັ້ງໜ້າ ຕິດພັນກັບການປະຕິບັດມະຕິ ແລະ ແຜນພັດທະນາວຽກງານ ຮສສ ຂອງກະຊວງ ກໍຄື ນວ ໂດຍຫັນມາເປັນແຜນງານ ໂຄງການຈຸດສຸມລະອຽດ ແລະ ຈັດຕັ້ງປະຕິບັດໄດ້ຮັບຜົນສຳເລັດເປັນກ້າວໆ.
ທ່ານນາງ ລຳພອຍ ສີອັກຄະຈັນ ຫົວໜ້າພະແນກ ຮສສ ນວ ໃຫ້ສຳພາດວັນທີ 17 ສິງຫາ 2020 ວ່າ: ການຈັດຕັ້ງປະຕິບັດໜ້າທີ່ວຽກງານໃນໄລຍະຜ່ານມາ ມີຫຼາຍດ້ານໄດ້ຮັບຜົນສຳເລັດ ແລະ ມີບາງດ້ານຍັງຄົງຄ້າງ ທີ່ຈະຕ້ອງໄດ້ສືບຕໍ່ແກ້ໄຂ ຈຶ່ງໄດ້ວາງແຜນການເພື່ອສືບຕໍ່ແກ້ໄຂແຕ່ປີ 2021-2025 ປະກອບມີ 4 ແຜນງານ 33 ໂຄງການ ໃນນີ້ ຈະສູ້ຊົນອັດຕາການວ່າງງານໃຫ້ຢູ່ໃນລະດັບ 2% ພັດທະນາສີມືແຮງງານໃຫ້ໄດ້ 6.000 ຄົນຕໍ່ປີ ເຝິກອົບຮົມເຄື່ອນທີ່ໃຫ້ໄດ້ 100 ຄົນຕໍ່ປີ ສ້າງມາດຖານສີມີແຮງງານດ້ວຍການເຝິກອົບຮົມ ທົດສອບ ອອກໃບຢັ້ນຢືນໃຫ້ໄດ້ 100 ຄົນຕໍ່ປີ ຈັດຕະຫຼາດນັດແຮງງານໃຫ້ໄດ້ປີລະຄັ້ງ ເຜີຍແຜ່ຈຸດບໍລິການຈັດຫາງານ ແນະນຳອາຊີບໃຫ້ໄດ້ 10 ຄັ້ງຕໍ່ປີ ໂຄສະນາເຜີຍແຜ່ກົດໝາຍແຮງງານໃຫ້ໄດ້ 360 ຄັ້ງຕໍ່ປີ ສ້າງຫົວໜ່ວຍແຮງງານທີ່ມີຜູ້ອອກແຮງງານແຕ່ 100 ຄົນຂຶ້ນໄປ ຕ້ອງຕັ້ງຄະນະກຳມະການຄວາມປອດໄພສຸຂະພາບແຮງງານໃຫ້ໄດ້ 300 ແຫ່ງ ສ້າງກົນໄກ ມາດຕະຖານຫົວໜ່ວຍແຮງງານແຫ່ງຊາດໃຫ້ໄດ້ 7 ແຫ່ງ ລົບລ້າງການນຳໃຊ້ແຮງງານເດັກໃຫ້ໄດ້ 90% ຄຸ້ມຄອງແຮງງານຕ່າງປະເທດໃຫ້ໄດ້ 80% ສ້າງໂຮງຈັກ-ໂຮງງານຕົວແບບໃຫ້ໄດ້ 12 ຫົວໜ່ວຍ ປະສານສົມທົບກັບກົມຄຸ້ມຄອງແຮງງານ ແລະ ການປະຕິບັດລະບຽບກົດໝາຍໃຫ້ໄດ້ 300 ຫົວໜ່ວຍຕໍ່ປີ.
ນອກນີ້ ຍັງຈະເອົາໃຈໃສ່ວຽກງານສະຫວັດດີການສັງຄົມ ເປັນຕົ້ນສ້າງອັດຕາການປົກຄຸມປະກັນສັງຄົມໃຫ້ກວມ 360 ຄົນຕໍ່ປີ ເຜີຍແຜ່ກົດໝາຍປະກັນສັງຄົມໃຫ້ໄດ້ 20 ຄັ້ງຕໍ່ປີ ແກ້ໄຂບັນຫາຫຍໍ້ທໍ້ ຄົນຂໍທານ ບ້າໄບ້ ເສຍຈິດ ແລະ ບັນຫາອື່ນໆໃຫ້ນັບມື້ຫຼຸດລົງ.