ພົບກັນປະຈຳວັນນີ້ ມີຂ່າວກ່ຽວກັບທາງການຍີ່ປຸ່ນ ສັ່ງຫ້າມບໍລິໂພກຊີ້ນ-ຕັບໝູດິບ ເລື່ອງການປ້ອງກັນພະຍາດຫູໝູກ່ຳຢູ່ມາເລເຊຍ ແລະ ຂ່າວກ່ຽວກັບມາດຕະການຮັບປະກັນອາຫານທະເລຢູ່ອົດສະຕຣາລີ.
ທີ່ຍີ່ປຸ່ນ: ໃນໂລກເຮົານີ້ ຄົນໃນປະເທດທີ່ກິນປາດິບ ອາຫານທະເລດິບ ລວມທັງຊີ້ນດິບຊະນິດຕ່າງໆຄົງບໍ່ມີໃຜລື່ນຊາວຍີ່ປຸ່ນເດັດຂາດ ຍ້ອນແນວນີ້ເອງ ຍີ່ປຸ່ນ ຈຶ່ງມີຊື່ນ້ອຍຫ້ອຍຕິດວ່າ “ແດນປາດິບ” ແຕ່ແລ້ວເມື່ອປະມານເກືອບ 4 ປີຫຼັງນີ້ ທາງການຍີ່ປຸ່ນຜັດໄດ້ອອກຄຳສັ່ງຫ້າມຮ້ານອາຫານຕ່າງໆ ທີ່ບໍລິການເຍື່ອງອາຫານເຮັດດ້ວຍຊີ້ນໝູ ແລະ ຕັບໝູດິບ ທັງນີ້ເພື່ອປ້ອງກັນສານພິດໃນອາຫານປະເພດນີ້ ໃນປີ 2012 ທາງກະຊວງສາທາລະນະສຸກຍີ່ປຸ່ນ ກໍເຄີຍສັ່ງຫ້າມຮ້ານອາຫານຕ່າງໆໃຫ້ບໍລິການອາຫານຕັບງົວດິບ ດ້ວຍເຫດຜົນດຽວກັນນີ້ລະ ນີ້ກໍແມ່ນສາເຫດໜຶ່ງທີ່ຮ້ານອາຫານຕ່າງໆໃນຍີ່ປຸ່ນ ຫັນມາໃຫ້ບໍລິການອາຫານ ປະເພດຊີ້ນ ແລະ ຕັບໝູດິບແທນຕັບງົວດິບ.
ໃນຄຳສັ່ງຫ້າມຄັ້ງນີ້ ທາງກະຊວງສາທາລະນະສຸກຍີ່ປຸ່ນ ໄດ້ອ້າງເຖິງຄວາມເປັນໄປໄດ້ທີ່ເຄື່ອງໄນໝູອາດປົນເປື້ອນ ດ້ວຍພະຍາດອັກເສບຕັບຊະນິດ hepatitis-E ຊຶ່ງເຮັດໃຫ້ຕັບຄົນເຮົາໄຄ່-ບວມ ແລະ ອັກເສບໄດ້ ຄຳສັ່ງຫ້າມໄດ້ລະບຸວ່າ ຊີ້ນ-ຕັບໝູທີ່ຈະບໍລິໂພກນັ້ນ ຕ້ອງຄົວໃຫ້ສຸກ ໂດຍໃຊ້ເວລາຢ່າງໜ້ອຍ 30 ນາທີ ດ້ວຍຄວາມຮ້ອນ 63 ອົງສາຂຶ້ນໄປ ຫຼື ຂ້າເຊື້ອດ້ວຍຄວາມຮ້ອນຕາມວິທີອື່ນໆ ຮ້ານອາຫານໃດລະເມີດຄຳສັ່ງນີ້ຈະໄດ້ຮັບໂທດຈຳຄຸກເປັນເວລາສູງສຸດ 2 ປີ ຫຼື ຖືກປັບໃໝເປັນເງິນ 2 ລ້ານເຢັນ ສ່ວນຢູ່ຕາມຄົວເຮືອນນັ້ນ ຖ້າຈະບໍລິໂພກຊີ້ນໝູກໍຕ້ອງລວກ ຫຼື ດາດດ້ວຍຄວາມຮ້ອນຢ່າງໜ້ອຍ 1 ນາທີ ໃນຄວາມຮ້ອນ 75 ອົງສາຂຶ້ນໄປ ໃນປີ 2011 ຊາວຍີ່ປຸ່ນ ທີ່ຕິດພະຍາດຕັບຊະນິດ hepatitis-E ນັ້ນມີຈຳນວນ 55 ຄົນ ສ່ວນໃນປີ 2014 ຈຳນວນຜູ້ຕິດເຊື້ອໄດ້ເພີ່ມຂຶ້ນເປັນ 146 ຄົນ ແລະ ພິສູດໄດ້ວ່າ ເຊື້ອພະຍາດນີ້ຕິດມາຈາກຊີ້ນ-ຕັບໝູ ແລະ ງົວດິບນັ້ນເອງ ຮ້ານອາຫານທີ່ບໍລິການຊີ້ນ-ຕັບໝູດິບຢູ່ຍີ່ປຸ່ນນັ້ນໄດ້ເພີ່ມຂຶ້ນຢ່າງໄວວາ ເຊັ່ນ: ໃນປີ 2012 ນັ້ນມີ 80 ຮ້ານ ແລະ ເພີ່ມຂຶ້ນເປັນ 190 ຮ້ານໃນລະດູຮ້ອນຂອງປີ 2013.
ທີ່ມາເລເຊຍ: ສືບເນື່ອງມາຈາກການລະບາດຂອງພະຍາດໄຂ້ຫວັດໝູ ອາຟຣິກາ ຫຼື ທີ່ຮູ້ກັນຢູ່ ປະເທດພວກເຮົາວ່າພະຍາດ “ຫູໝູກ່ຳ” ຫວ່າງບໍ່ພໍເທົ່າໃດປີຜ່ານມານີ້ ທາງສະຫະພັນຟາມສັດລ້ຽງຂອງມາເລເຊຍ (FLFAM) ກໍໄດ້ອອກຄຳສັ່ງໃຫ້ບັນດາເຈົ້າຂອງຟາມລ້ຽງໝູມີມາດຕະການເຄັ່ງຄັດ ເພື່ອປ້ອງກັນບໍ່ໃຫ້ພະຍາດໄຂ້ຫວັດໝູສາຍພັນອາຟຣິກາ ລະບາດໃນມາເລເຊຍ ພ້ອມດຽວກັນກໍໄດ້ປະກາດຫ້າມປະຊາຊົນຊື້ຊີ້ນ ກໍຄື ຜະລິດຕະພັນຊີ້ນໝູ ໂດຍຜ່ານອອນລາຍຈາກບັນດາປະເທດທີ່ມີການລະບາດຂອງພະຍາດນີ້ ສ່ວນຢູ່ໃນບັນດາຟາມລ້ຽງໝູນັ້ນ ທາງ FLFAM ກໍໄດ້ກຳນົດມາດຕະຖານເພື່ອປ້ອງກັນສາຍພັນໝູມາເລເຊຍ ດ້ວຍຫຼາຍວິທີ ລວມທັງການສີດຢາປ້ອງກັນເປັນປະຈຳ.
ທີ່ອົດສະຕຣາລີ: ໜັງສືພິມວຽງຈັນທາມ ສະບັບວັນທີ 19 ຕຸລາ 2015 ໃຫ້ຮູ້ວ່າ: ທາງການອົດສະຕຣາລີ ມີແຜນຕິດປ້າຍເຄື່ອງໝາຍບອກທີ່ມາຂອງທະເລ ເພື່ອໃຫ້ປະຊາຊົນສາມາດເລືອກອາຫານທະເລທີ່ມີຄຸນນະພາບສູງ ອົດສະຕຣາລີນຳເຂົ້າອາຫານທະເລ ປະມານ 70% ມາດຕະການຕິດປ້າຍບອກທີ່ມາຂອງອາຫານທະເລນີ້ ນອກຈາກຈະສະໜອງທາງເລືອກເພື່ອໄດ້ຮັບອາຫານທີ່ມີຄຸນນະພາບແລ້ວ ຍັງຈະເປັນການສົ່ງເສີມອາຫານທະເລທ້ອງຖິ່ນພາຍໃນປະເທດອີກດ້ວຍ.