ກອງປະຊຸມສາມັນ ຄັ້ງທີ 17 ຂອງຄະນະກຳມະການບໍລິຫານ ກອງຄຸ້ມຄອງອຸທິຍານແຫ່ງຊາດນາກາຍ-ນ້ຳເທີນ (ກອຊ ນທ) ຈັດຂຶ້ນວັນທີ 14 ສິງຫາ 2020 ທີ່ນະຄອນຫຼວງວຽງຈັນ ມີທ່ານ ລຽນ ທິແກ້ວ ລັດຖະມົນຕີກະຊວງກະສິກຳ ແລະ ປ່າໄມ້ ທ່ານຮອງເຈົ້າແຂວງຄຳມ່ວນ ແຂວງບໍລິຄຳໄຊ ຮອງລັດຖະມົນຕີກະຊວງກ່ຽວຂ້ອງ ເຈົ້າເມືອງນາກາຍ ເຈົ້າເມືອງຄຳເກີດ ອົງການຈັດຕັ້ງສາກົນປະຈຳລາວຈາກນ້ຳເທີນ 2 ແລະ ພະນັກງານຂະແໜງການກ່ຽວຂ້ອງເຂົ້າຮ່ວມ.
ກອງປະຊຸມ ໄດ້ຮັບຟັງບົດສະເໜີກ່ຽວກັບຜົນການຈັດຕັ້ງປະຕິບັດວຽກງານປະຈຳປີ 2019 ແລະ ຄວາມຄືບໜ້າຂອງຜົນການຈັດຕັ້ງປະຕິບັດແຜນການ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2020 ຂອງ ກອຊ ນທ ເຊິ່ງເຫັນວ່າ ຮູບແບບ ແລະ ຄວາມພະຍາຍາມທີ່ນຳໃຊ້ເຂົ້າໃນການປົກປັກຮັກສາອຸທິຍານແຫ່ງຊາດທີ່ກຳລັງຈັດຕັ້ງປະຕິບັດຢູ່ ແມ່ນມີຄວາມສອດຄ່ອງກັບພຶດຕິກຳຕົວຈິງຢູ່ໃນທ້ອງຖິ່ນ ເນື່ອງຈາກການກຳນົດອົງປະກອບຕ່າງໆມີຄວາມກົມກຽວເຊິ່ງກັນ ແລະ ກັນ ຈະບໍ່ເນັ້ນໜັກໃສ່ແຕ່ດ້ານໃດດ້ານໜຶ່ງ ລະຫວ່າງການອະນຸຮັກ ແລະ ການພັດທະນາ ແລະ ເປັນການຈັດຕັ້ງປະຕິບັດວຽກງານທີ່ເກີດຈາກຄວາມຕ້ອງການທີ່ແທ້ຈິງຂອງປະຊາຊົນບັນດາເຜົ່າ ເຊິ່ງໄດ້ນຳຜົນປະໂຫຍດຄວາມຢູ່ດີກິນດີໄປໃຫ້ປະຊາຊົນ ເພື່ອສາມາດຫຼຸດພົ້ນອອກຈາກຄວາມທຸກຍາກເປັນກ້າວໆ ໄປຄຽງຄູ່ກັບການປົກປັກຮັກສາປ່າໄມ້ ແລະ ຊີວະນາໆພັນ ທັງນີ້ ກໍເນື່ອງຈາກ ກອຊ ນທ ໄດ້ປະສານສົມທົບ ແລະ ເຮັດວຽກງານຢ່າງໃກ້ຊິດກັບຄູ່ຮ່ວມງານ ແລະ ປະຊາຊົນ ລວມທັງໄດ້ມີການຊຸກຍູ້ຊີ້ນຳ ສ້າງຄວາມເຂັ້ມແຂງ ຕອບສະໜອງທາງດ້ານທຶນຮອນ ແລະ ເຕັກນິກວິຊາການໃຫ້ປະຊາຊົນ ເຊິ່ງມັນໄດ້ສະແດງອອກຢູ່ຜົນງານຫຼາຍດ້ານ.
ຄຽງຄູ່ກັບດ້ານຕັ້ງໜ້າ ກໍຍັງມີດ້ານອ່ອນຂໍ້ຄົງຄ້າງທີ່ເກີດຂຶ້ນ ອັນໄດ້ມີຜົນກະທົບຕໍ່ປ່າໄມ້ທີ່ດິນ ຊີວະນາໆພັນ ແລະ ຊີວິດການເປັນຢູ່ຂອງປະຊາຊົນໃນທາງກົງ ແລະ ທາງອ້ອມ ເຊິ່ງຈະຕ້ອງໄດ້ເອົາໃຈໃສ່ປັບປຸງແກ້ໄຂ ໂດຍສະເພາະດ້ານປາກົດການຫຍໍ້ທໍ້ທີ່ມີຢູ່ໃນອຸທິຍານ ເຊິ່ງກອງປະຊຸມໄດ້ແລກປ່ຽນຄຳຄິດຄຳເຫັນ ແລະ ຂໍ້ສະເໜີແນະນຳຕ່າງໆຂອງຜູ້ທີ່ເຂົ້າຮ່ວມກອງປະຊຸມຄັ້ງນີ້ ແລະ ຈາກອົງການກວດສອບເອກະລາດໃນບັນຫາຕ່າງໆ ທີ່ຈະເປັນບົດຮຽນທີ່ລ້ຳຄ່າ ເປັນຂໍ້ມູນທີ່ດີເພື່ອນຳໄປປັບປຸງແກ້ໄຂ ເພື່ອເຮັດໃຫ້ວຽກງານມີປະສິດທິພາບດີກວ່າເກົ່າ.