ຜ່ານການລົງສຳຫຼວດເກັບກຳຂໍ້ມູນຂອງສູນໄຂ້ຍຸງແມ່ກາຝາກ ແລະ ແມງໄມ້ ພະແນກສາທາລະນະສຸກນະຄອນຫຼວງວຽງຈັນ (ນວ) ພົບວ່າຢູ່ ນວ ມີ 14 ບ້ານໃນ 6 ເມືອງ ມີໜອນນ້ຳຍຸງລາຍເປັນຈຳນວນຫຼາຍ ເຊິ່ງອາດສົ່ງຜົນໃຫ້ຕົວເລກຄົນເຈັບພະຍາດໄຂ້ຍຸງລາຍມີການເພີ່ມສູງຂຶ້ນ ຖ້າຫາກທຸກຄົນ ກໍຄືທຸກຄອບຄົວບໍ່ເອົາໃຈໃສ່ທຳລາຍແຫຼ່ງເພາະພັນໜອນນໍ້າເປັນປະຈຳໃນທຸກອາທິດ.
ອີງຕາມການລາຍງານຂອງສູນໄຂ້ຍຸງແມ່ກາຝາກ ແລະ ແມງໄມ້ ພະແນກສາທາລະນະສຸກ ນວ ໃຫ້ຮູ້ວ່າ: ຜ່ານການລົງສຳຫຼວດໜອນນໍ້າຍຸງລາຍແຕ່ລະບ້ານ ນັບແຕ່ເດືອນມັງກອນ 2020 ມາຮອດປັດຈຸບັນ ພົບວ່າມີຫຼາຍບ້ານທີ່ມີຄວາມໜາແໜ້ນຂອງໜອນນໍ້າສູງ ເຊິ່ງມີຄວາມສ່ຽງຈະເກີດພະຍາດໄຂ້ຍຸງລາຍເປັນວົງກວ້າງ ສະເພາະເດືອນກໍລະກົດ 2020 ນວ ໄດ້ລົງສຳຫຼວດໜອນນ້ຳ 448 ບ້ານ ໃນນັ້ນ ຜົນສຳຫຼວດເຫັນວ່າ 14 ບ້ານຂອງ 6 ເມືອງຄື: ເມືອງໄຊທານີ ມີບ້ານໂນນແຕ້ ຊ້າງຄູ້ ຫົວນາ ເມືອງໄຊເຊດຖາ ມີບ້ານໂພນສະຫວັນ ໂພນເຄັງ ທາດຫຼວງກາງ ແລະ ສະພັງໝໍ້ ເມືອງສີໂຄດຕະບອງ ມີບ້ານວຽງຄຳ ແລະ ຂາມງອຍ ເມືອງສັງທອງມີບ້ານອ່າງນ້ອຍ ແລະ ເພຍລາດ ເມືອງຈັນທະບູລີ ມີບ້ານຫ້ວຍຫົງ ເມືອງສີສັດຕະນາກ ມີບ້ານໜອງຈັນ ແລະ ດອນກອຍ ແມ່ນມີໜອນນ້ຳຍຸງລາຍເປັນຈຳນວນຫຼາຍ.
ເພື່ອເຮັດໃຫ້ຂະບວນການທຳລາຍແຫຼ່ງເພາະພັນຂອງໜອນນ້ຳຍຸງລາຍໝົດໄປເທື່ອລະກ້າວ ແລະ ເຮັດໃຫ້ຈຳນວນຄົນເຈັບພະຍາດໄຂ້ຍຸງລາຍຫຼຸດໜ້ອຍລົງ ອົງການປົກຄອງບ້ານຕ້ອງໄດ້ເປັນເຈົ້າການຊຸກຍູ້ປະຊາຊົນພາຍໃນ ຊ່ວຍກັນທຳລາຍແຫຼ່ງເພາະພັນຂອງຍຸງ ໂດຍສະເພາະຢູ່ບໍລິເວນໃນເຮືອນ ແລະ ນອກເຮືອນເປັນປະຈຳໄປຄຽງຄູ່ກັບການຈັດຕັ້ງປະຕິບັດຫຼັກການ 5 ປ ທີ່ກະຊວງສາທາລະນະສຸກວາງອອກ.
# ຂ່າວ & ພາບ: ເພັດສະໝອນ