ເພື່ອຊ່ວຍເຫຼືອບັນເທົາທຸກໃຫ້ປະຊາຊົນແຂວງໄຊຍະບູລີ ທີ່ໄດ້ຮັບຜົນກະທົບຈາກໄພນ້ຳຖ້ວມ ໃນວັນທີ 10 ສິງຫາ 2020 ທີ່ສຳນັກງານໃຫຍ່ທະນາຄານຮ່ວມພັດທະນາ (JDB) ນະຄອນຫຼວງວຽງຈັນ ໄດ້ມີພິທີມອບເງິນຊ່ວຍເຫຼືອ 100 ລ້ານກີບ ກ່າວຮັບໂດຍທ່ານ ເພັດພິໄຊ ສູນວິໄລ ຫົວໜ້າຫ້ອງວ່າການແຂວງໄຊຍະບູລີ ມີທ່ານ ພົງສະຫວັນ ສິດພະວົງ ເຈົ້າແຂວງໄຊຍະບູລີ ທ່ານ ເອກະພັນ ພະພິທັກ ປະທານສະພາບໍລິຫານ ທະນາຄານຮ່ວມພັດທະນາ ຄະນະຜູ້ບໍລິການທະນາຄານຮ່ວມພັດທະນາ ຕະຫຼອດຮອດວິຊາການທີ່ກ່ຽວຂ້ອງທັງສອງຝ່າຍເຂົ້າຮ່ວມ.
ທ່ານ ວິໄລ ສີພະພອນ ຜູ້ອຳນວຍການໃຫຍ່ JDB ໄດ້ກ່າວຈຸດປະສົງໃນການຊ່ວຍເຫຼືອຄັ້ງນີ້ ເຊິ່ງແຂວງໄຊຍະບູລິ ແລະ JDB ໄດ້ມີສາຍພົວພັນກັນມາຍາວນານ ຈຶ່ງເຫັນໄດ້ຜົນກະທົບຈາກໄພນ້ຳຖ້ວມ ແລະ ລົມພະຍຸພັດຖະຫຼົ່ມ ເຮັດໃຫ້ໂຮງຮຽນໃນເຂດພູດອຍໄດ້ຮັບຄວາມເສຍຫາຍ ດັ່ງນັ້ນ JDB ຈຶ່ງໄດ້ໃຫ້ການເງິນຊ່ວຍເຫຼືອເງິນ 100 ລ້ານກີບ ຈາກນັ້ນ ທ່ານ ອິນແປງ ອຸທຸມພອນ ປະທານບໍລິສັດ ພັນທະມິດກໍ່ສ້າງ ແລະ ສ້ອມແປງຂົວທາງ ໄດ້ປະກອບສ່ວນເງິນຊ່ວຍເຫຼືອຕື່ມອີກ 50 ລ້ານກີບ ເພື່ອເປັນການປະກອບສ່ວນຊ່ວຍເຫຼືອສັງຄົມ ໂດຍສະເພາະຜູ້ທີ່ໄດ້ຮັບຜົນກະທົບຈາກໄພນ້ຳຖ້ວມທີ່ແຂວງໄຊຍະບູລີ ລວມມູນຄ່າການຊ່ວຍເຫຼືອຄັ້ງນີ້ທັງໝົດ 150 ລ້ານກີບ.
ໂອກາດນີ້ທ່ານຫົວໜ້າຫ້ອງວ່າການແຂວງໄຊຍະບູລີ ໄດ້ສະແດງຄວາມຂອບໃຈເປັນຢ່າງສູງມາຍັງທະນາຄານຮ່ວມພັດທະນາ ແລະ ບໍລິສັດ ພັນທະມິດກໍ່ສ້າງ ແລະ ສ້ອມແປງຂົວທາງ ທີ່ໄດ້ມີນ້ຳໃຈເອື້ອເຟື້ອເພື່ອແຜ່ ປະກອບສ່ວນຊ່ວຍເຫຼືອແຂວງໄຊຍະບູລີ ທີ່ໄດ້ຮັບຜົນກະທົບຈາກໄພນ້ຳຖ້ວມ ແລະ ລົມພະຍຸຄັ້ງນີ້ ແລະ ຫວັງຢ່າງຍິ່ງວ່າໃນໂອກາດໜ້າ ຈະໄດ້ຮັບການຊ່ວຍເຫຼືອຈາກທະນາຄານຮ່ວມພັດທະນາອີກ.