ປັດຈຸບັນ ທົ່ວປະເທດມີຜູ້ຕິດເຊື້ອພະຍາດໄຂ້ຍຸງລາຍນັບມື້ນັບເພີ່ມຂຶ້ນ ເພາະການລະບາດຂອງພະຍາດໄຂ້ຍຸງລາຍຍັງບໍ່ມີທ່າອ່ຽງທີ່ຈະຫຼຸດລົງ ສະແດງອອກພຽງວັນດຽວ ຄືວັນທີ 10 ສິງຫາ 2020 ພົບຜູ້ຕິດເຊື້ອພະຍາດໄຂ້ຍຸງທັງໝົດ 66 ກໍລະນີ.
ອີງຕາມການລາຍງານຂອງກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ວັນທີ 11 ສິງຫາ 2020 ໃຫ້ຮູ້ວ່າ:ນັບແຕ່ວັນທີ 1 ມັງກອນ 2020 ຫາ 10 ສິງຫາ 2020 ມີຜູ້ຕິດເຊື້ອກໍລະນີສະສົມທັງໝົດ 4.729 ຄົນ (ມີລາຍງານກໍລະນີໃນ 18 ແຂວງ ແຂວງທີ່ມີການລາຍງານຫຼາຍກວ່າໝູ່ແມ່ນນະຄອນຫຼວງວຽງຈັນ 1.090 ຄົນ ຖັດລົງມາແມ່ນແຂວງວຽງຈັນ 543 ກໍລະນີ ແລະ ແຂວງບໍລິຄຳໄຊ 550 ກໍລະນີ ຈຳນວນຜູ້ເສຍຊີວິດຍ້ອນພະຍາດໄຂ້ຍຸງລາຍມີທັງ ໝົດ 9 ຄົນ (ນະຄອນຫຼວງ 4 ຄົນ ແຂວງບໍລິຄຳໄຊ 2 ຄົນ ຄຳມ່ວນ ໄຊຍະບລີ ແລະ ແຂວງຊຽງຂວາງ ແຂວງ 1 ຄົນ).
ເພື່ອເປັນການປ້ອງກັນ ແລະ ສະກັດກັ້ນການລະບາດຂອງພະຍາດໄຂ້ຍຸງລາຍ ຮຽກຮ້ອງມາຍັງປະຊາຊົນ ແລະ ອຳນາດການປົກຄອງຮ່ວມແຮງຮ່ວມໃຈ ປ້ອງກັນບໍ່ໃຫ້ຍຸງກັດ ແລະ ປະຕິບັດຫຼັກການ 5 ປ ໂດຍສະເພາະແມ່ນ ທຳລາຍແຫຼ່ງເພາະພັນຂອງຍຸງເປັນປະຈຳທຸກອາທິດ ໃຫ້ຖືວ່າ ແມ່ນໜ້າທີ່ຮັບຜິດຊອບຂອງໝົດທຸກຄົນ.